លោកស្រី Tri Mela Sari មន្ត្រីជាន់ខ្ពស់នៃក្រសួងកសិកម្មឥណ្ឌូនេស៊ីបានប្រាប់ទូរទស្សន៍ CNAរបស់សិង្ហបុរីថា ការដឹកជញ្ជូនសាច់មាន់ជាលើកដំបូងពីឥណ្ឌូនេស៊ីទៅសិង្ហបុរីនេះ នឹងរួមមានសាច់មាន់ក្លាសេ ផ្គត់ផ្គង់ដោយ សាខាក្រុមហ៊ុនលក់ផលិតផលចំណីអាហាររបស់ថៃប្រចាំប្រទេសឥណ្ឌូនេស៊ីគឺក្រុមហ៊ុន Charoen Pokphand ឬហៅថាក្រុមហ៊ុន CP ។ ចំណែកទំហំនាំចេញប៉ុន្មាននោះ គេនៅមិនទាន់ដឹងច្បាស់នៅឡើយទេនៅឡើយទេ។
មន្ត្រីជាន់ខ្ពស់នៃក្រសួងកសិកម្មឥណ្ឌូនេស៊ីដដែលនេះ បានឲ្យដឹងទៀតថា ឥណ្ឌូនេស៊ីនឹងបញ្ជូនសាច់មាន់លើកដំបូងទៅកាន់ប្រទេសសិង្ហបុរីនៅថ្ងៃពុធទី១៣ ខែកក្កដា ហើយក៏នឹងធ្វើសន្និសីទសារព័ត៌មានបន្ថែមពាក់ព័ន្ធនឹងការនាំចេញនេះ នៅការិយាល័យរបស់ក្រុមហ៊ុន CP នៅឥណ្ឌូនេស៊ីផងដែរ។
បើតាមទីភ្នាក់ងារស្បៀងអាហារសិង្ហបុរី (SFA) បានឱ្យដឹងថា ក្រុមហ៊ុនចំនួន៣មកពីប្រទេសឥណ្ឌូនេស៊ីត្រូវបានផ្តល់ការអនុញ្ញាតឱ្យនាំចេញសាច់មាន់ និងផលិតផលសាច់មាន់ចូលទៅក្នុងប្រទេសសិង្ហបុរី រួមមាន២ក្រុមហ៊ុនជារបស់ក្រុមហ៊ុន Charoen Pokphand ប្រចាំប្រទេសឥណ្ឌូនេស៊ី និងមួយទៀតជាក្រុមហ៊ុនអាហារក្លាសេធំមួយប្រចាំប្រទេសឥណ្ឌូនេស៊ី គឺក្រុមហ៊ុន Japfa Comfeed។
អត្ថបទគួរអាន
នាយកផ្នែកកែច្នៃនិងទីផ្សារផលិតផលសត្វរបស់ក្រសួងកសិកម្មបាននិយាយថា មានក្រុមហ៊ុនឥណ្ឌូនេស៊ីចំនួន១២ផ្សេងទៀតកំពុងសុំការអនុញ្ញាតឱ្យនាំចេញផលិតផលសាច់មាន់ទៅសិង្ហបុរីផងដែរខណៈដែលពាក្យសុំទាំងអស់បានដាក់ទៅទីភ្នាក់ងារ SFA រួចអស់ហើយ។
សិង្ហបុរីបាននាំចូលសាច់មាន់ចំនួន ជាង២១ម៉ឺនតោន កាលពីឆ្នាំមុន ក្នុងនោះមានប្រហែល១ភាគ៣ បាននាំចូលមកពីប្រទេសម៉ាឡេស៊ី ដែលថ្មីៗនេះ ប្រទេសម៉ាឡេស៊ីនេះ ក៏ទើបតែបានដាក់បម្រាមនាំចេញមាន់រហូតដល់ ៣លាន៦សែនក្បាលក្នុងមួយខែ ក្រោយពីមានបញ្ហាការផ្គត់ផ្គង់ និងតម្លៃសាច់មាន់ក្នុងស្រុកកើនឡើង។
បន្ទាប់ពីការដាក់បម្រាមនាំចេញពីប្រទេសម៉ាឡេស៊ីរួចហើយ សិង្ហបុរីបានប្រកាសថា ខ្លួននឹងរកប្រភពទីផ្សារសាច់មាន់ពីកន្លែងផ្សេងទៀតរួមទាំងឥណ្ឌូនេស៊ី និងប្រទេសថៃផងដែរ ហើយទីភ្នាក់ងារ SFA បានប្រកាសកាលពីថ្ងៃទី៣០ ខែមិថុនាថា ខ្លួនបានបន្ថែមប្រទេសឥណ្ឌូណេស៊ីជាប្រភពថ្មីមួយសម្រាប់ការនាំចូលសាច់មាន់ត្រជាក់ ក្លាសេ និងកែច្នៃ៕
