ការរឹតបន្ដឹងវិធានការពីសំណាក់រដ្ឋាភិបាលឥណ្ឌូនេស៊ីនាពេលនេះ គឺធ្វើឡើងដើម្បីឆ្លើយតប ចំពោះការអំពាវនាវពីអង្គការកាកបាទក្រហមប្រចាំប្រទេស ដោយសារតែគ្រែសម្រាកព្យាបាលអ្នកជំងឺកូវីដ១៩នៅតាមមន្ទីរពេទ្យបានពេញហូរហៀរដោយអ្នកជំងឺ ទាំងកម្រិតស្រាល និងកម្រិតធ្ងន់ ខណៈដែលយុទ្ធនាការចាក់វ៉ាក់សាំង ដំណើរការក្នុងល្បឿនយឺតបំផុត។
ការរឹតបន្ដឹងបន្ថែមនឹងផ្តើមអនុវត្តចាប់ពីថ្ងៃសៅរ៍សប្តាហ៍នេះតទៅ រហូតដល់ថ្ងៃទី២០កក្កដា នេះបើតាមការអះអាងពីប្រធានាធិបតីឥណ្ឌូនេស៊ី លោក ចូកូ វីដូដូ ផ្ទាល់តែម្តង។ ក្នុងនោះ មានទីក្រុងដល់ទៅ ១២២ លើកោះធំៗទាំងពីរ រួមទាំងរដ្ឋធានីហ្សាកាតាផងដែរ នឹងត្រូវស្ថិតនៅក្រោមការរឹតត្បិត ក្នុងគោលដៅកាត់បន្ថយចំនួនឆ្លងប្រចាំថ្ងៃឲ្យចុះមកនៅក្រោម ១ម៉ឺនករណី។
អត្ថបទគួរអាន
គួរជម្រាបថា ការរឹតត្បិតបន្ថែមនេះ រួមបញ្ជូលជាអាទិ៍ ការធ្វើការងារពីផ្ទះសម្រាប់បុគ្គលិក និងនិយោជក ដែលបម្រើការក្នុងវិស័យមិនសូវចាំបាច់ ដូចជាក្រុមហ៊ុនឯកជនជាដើម ខណៈផ្សារទំនើប សាលារៀន និងកន្លែងសក្ការបូជាបែបសាសនាទាំងអស់ត្រូវបិទទ្វារ ដោយអនុញ្ញាតឲ្យតែហាងលក់ទំនិញចាំបាច់ និងកន្លែងលក់ម្ហូបអាហារប៉ុណ្ណោះ អាចនៅបន្តបើកទ្វារបាន ប៉ុន្តែអាចលក់បានដោយវិចខ្ចប់តែប៉ុណ្ណោះ។
សូមបញ្ជាក់ថា ឥណ្ឌូនេស៊ីជាប្រទេសឈរកំពូលតារាង ដែលមានអ្នកឆ្លងប្រចាំថ្ងៃ និងអ្នកឆ្លងសរុបច្រើនជាងគេ បើធៀបនឹងប្រទេសតំបន់អាស៊ានទាំង១០ ក្នុងនោះអ្នកឆ្លងប្រចាំថ្ងៃមានជាមធ្យម ២ម៉ឺននាក់ ហើយបច្ចុប្បន្នឥណ្ឌូនេស៊ីមានអ្នកឆ្លងសរុបជាង ២លាន១សែននាក់ ខណៈអ្នកបាត់បង់ជីវិតមានជិត ៦ម៉ឺននាក់ហើយ។ បើក្រឡេកមើលពីយុទ្ធនាការចាក់វ៉ាក់សាំងវិញឃើញថា ឥណ្ឌូនេស៊ីកំពុងដើរអូសជើងមែនទែន ដោយការចាក់វ៉ាក់សាំងចាប់ផ្តើមពីខែមករាឆ្នាំ២០២១ មកដល់ពេលនេះ ទើបមានពលរដ្ឋ១០%ប៉ុណ្ណោះដែលទទួលបានយ៉ាងហោចណាស់វ៉ាក់សាំងមួយដូស ក្នុងចំណោមពលរដ្ឋគោលដៅ ៧០% ដែលស្មើនឹងប្រមាណ ១៨០លាននាក់៕
None
