មហាសេដ្ឋីភាគច្រើននៅប្រទេសវៀតណាមបានថមថយចុះនូវតម្លៃសរុបនៃទ្រព្យសម្បត្តិរបស់ខ្លួនក្នុងរយៈពេល១២ខែចុងក្រោយនេះ ប៉ុន្តែ លោកស្រី Nguyen Thi Phuong Thao ប្រធាន និងជានាយិកាប្រតិបត្តិរបស់ក្រុមហ៊ុនអាកាសចរណ៍ Vietjet បានស្ថិតក្នុងស្ថានភាពពិសេសជាងគេ។
គិតត្រឹមថ្ងៃទី៥ ខែមីនា ឆ្នាំ២០២០ ទស្សនាវដ្តីដ៏ល្បី Forbes បានកត់ត្រាការប្រែប្រួលទៅលើតម្លៃទ្រព្យសម្បត្តិរបស់មហាសេដ្ឋី ៥នាក់របស់ប្រទេសវៀតណាម។ ជាមួយគ្នានេះ ព័ត៌មានល្អតែមួយបានកើតឡើងសម្រាប់តែមហាសេដ្ឋីតែម្នាក់ប៉ុណ្ណោះ លោកស្រី Nguyen Thi Phuong ក្រោយពីតម្លៃទ្រព្យសម្បត្តិសរុបរបស់លោកស្រី បានកើនឡើង ធៀបទៅនឹងរយៈពេលដូចគ្នានេះ កាលពីឆ្នាំមុន។
ប៉ុន្តែ អ្នកផ្សេងទៀតដែលស្ថិតនៅលើបញ្ជីឈ្មោះមហាសេដ្ឋីរបស់ Forbes បានធ្លាក់ចុះបន្តិច។ ទ្រព្យសម្បត្តិសរុបរបស់លោក Pham Nhat Vuong ប្រធានក្រុមហ៊ុន Vingroup បានស្ថិតក្នុងចំនួនជាទឹកប្រាក់ ៦,៦ពាន់លានដុល្លារអាមេរិក គិតត្រឹមថ្ងៃទី៥ ខែមីនា ឆ្នាំ២០២០ ពោលគឺធ្លាក់ចុះចំនួន ១,២ពាន់លានដុល្លារអាមេរិក បើធៀបទៅនឹងឆ្នាំមុន។ បើទោះបីធ្លាក់ចុះទ្រព្យសម្បតិ្តច្រើនជាងគេបំផុតក្នុងចំណោមមហាសេដ្ឋីទាំងអស់របស់វៀតណាមក៏ដោយ ប៉ុន្តែ លោក Vuong នៅតែជាមហាសេដ្ឋីមានចំណាត់ថ្នាក់ខ្ពស់ជាងគេបំផុតក្នុងប្រទេសវៀតណាម នៅលើតារាងថ្មីចុងក្រោយបំផុត ដែលចេញផ្សាយដោយទស្សនាវដ្តី Forbes ដដែល។
ទ្រព្យសម្បត្តិសរុបរបស់លោកស្រី Nguyen Thi Phuong Thao បានកើនឡើងចំនួន ០,២ពាន់លានដុល្លារអាមេរិក បើធៀបទៅនឹងខែមីនា ឆ្នាំ២០១៩ ពោលគឺកើនដល់ចំនួន ២,៥ពាន់លានដុល្លារអាមេរិក។
អត្ថបទទាក់ទង
ស្របពេលជាមួយគ្នានេះ ទ្រព្យសម្បត្តិសរុបរបស់លោក Tran Ba Duong ប្រធានក្រុមហ៊ុនសាជីវកម្ម Truong Hai Auto បានធ្លាក់ចុះចំនួន ០,២ពាន់លានដុល្លារអាមេរិក មកនៅត្រឹម ១,៥ពាន់លានដុល្លារអាមេរិក។ ទ្រព្យសម្បត្តិរបស់លោក Ho Hung Anh ប្រធានក្រុមហ៊ុន Techcombank ក៏បានធ្លាក់ចុះចំនួន ០,៦ពាន់លានដុល្លារអាមេរិក មកនៅត្រឹម ១,១ពាន់លានដុល្លារអាមេរិក ផងដែរ។ ទ្រព្យសម្បត្តិសរុបរបស់លោក Nguyen Dang Quang និងក្រុមគ្រួសាររបស់លោក ដែលជាស្ថាបនិកក្រុមហ៊ុន Masan Group បានធ្លាក់ចុះមកនៅត្រឹម ១ពាន់លានដុល្លារអាមេរិក។
ប៉ុន្តែ បើទោះបីមានការធ្លាក់ចុះបែបនេះក៏ដោយ ប៉ុន្តែ ទ្រព្យសម្បត្តិសរុបរបស់លោកស្រី Nguyen Thi Phuong Thao បានកើនឡើងចំនួន ០,២ពាន់លានដុល្លារអាមេរិក បើធៀបទៅនឹងខែមីនា ឆ្នាំ២០១៩ ពោលគឺកើនដល់ចំនួន ២,៥ពាន់លានដុល្លារអាមេរិក។ ទ្រព្យសម្បត្តិរបស់លោកស្រី Thao បានកើនឡើង បើទោះបីរងនូវផលប៉ះពាល់ដ៏ចម្បងដោយសារតែការរាតត្បាតនៃជំងឺកូវីដ-១៩ ដែលកើតមាននៅទីផ្សារភាគហ៊ុនពិភពលោកក៏ដោយ។ បើទោះបីលោកស្រី Thao ជាម្ចាស់កម្មសិទ្ធិទ្រព្យសម្បត្តិនៅលើទីផ្សារភាគហ៊ុនក៏ដោយ ប៉ុន្តែ ប្រភពទ្រព្យសម្បត្តិរបស់មហាសេដ្ឋីនីដំបូងគេប្រចាំតំបន់អាស៊ីអាគ្នេយ៍រូបនេះ បានបង្ហាញឲ្យឃើញពីភាពរឹងមាំ។ ការដាក់ចំណាត់ថ្នាក់មហាសេដ្ឋីរបស់ទស្សនាវដ្តី Forbes ក៏ផ្អែកទៅលើទ្រព្យសម្បត្តិផ្សេងទៀតផងដែរ នៅពេលដែលធ្វើការវិភាគទៅលើទ្រព្យសម្បត្តិសរុបរបស់បុគ្គលនីមួយៗ។
រឿងរ៉ាវទាក់ទងនឹងមហាសេដ្ឋី និងទស្សនវិស័យសេដ្ឋកិច្ច
បើយោងទៅតាមទស្សនាវដ្តី Forbes វៀតណាម គឺជាប្រទេសមួយក្នុងចំណោមប្រទេសទាំង ៦ នៅក្នុងតំបន់អាស៊ាន ដែលមានឈ្មោះមហាសេដ្ឋីច្រើនជាងគេនៅលើតារាងបញ្ជីទូទាំងពិភពលោក។ ប៉ុន្តែ ទោះបីជាយ៉ាងណា មហាសេដ្ឋីមានប្រាក់រាប់លានដុល្លាររបស់វៀតណាម ស្ថិតក្នុងចំណាត់ថ្នាក់ទាបជាងគេបំផុតក្នុងចំណោមប្រទេសទាំង ៦ ក្នុងតំបន់អាស៊ាន បើផ្អែកទៅលើទាំងបរិមាណ និងតម្លៃនៃទ្រព្យសម្បត្តិរបស់ពួកគេ។ ទ្រព្យសម្បត្តិសរុបរបស់មហាសេដ្ឋីទាំង៥នាក់របស់វៀតណាម ក្នុងឆ្នាំ២០១៩ មានចំនួន ១៣,៦ពាន់លានដុល្លារអាមេរិក។
បើក្រឡេកមើលប្រទេសជិតខាងវិញ ថៃមានមហាសេដ្ឋីចំនួន ៣១នាក់ ជាមួយនឹងទ្រព្យសម្បត្តិសរុបចំនួន ៩៤,៨ពាន់លានដុល្លារអាមេរិក (ច្រើនជាងវៀតណាមជិត ៧ដង)។ ម៉ាឡេស៊ី មានមហាសេដ្ឋីចំនួន ១៣នាក់ ដែលមានទ្រព្យសម្បត្តិសរុប ៦១,៦ពាន់លានដុល្លារអាមេរិក ស្របពេលដែលហ្វីលីពីន មានមហាសេដ្ឋី ១៧នាក់ ជាមួយនឹងទ្រព្យសម្បត្តិសរុប ៤៧,៧ពាន់លានដុល្លារអាមេរិក។
ក្នុងនាមជាប្រទេសមួយក្នុងចំណោមប្រទេសដែលមានសេដ្ឋកិច្ចរីកចម្រើនបំផុតក្នុងពិភពលោក ក្នុងរយៈពេលប៉ុន្មានឆ្នាំចុងក្រោយនេះ អ្នកអង្កេតជាច្រើនជឿជាក់ថា វៀតណាមនឹងមានមហាសេដ្ឋីកាន់តែច្រើនក្នុងពេលឆាប់ៗ។ ការកើនឡើងមហាសេដ្ឋី និងអាជីវកម្មរបស់ពួកគេ បានចូលរួមចំណែកជួយដល់ការអភិវឌ្ឍ និងការរីកចម្រើននៃសេដ្ឋកិច្ចក្នុងស្រុករបស់វៀតណាម៕
