យោងតាមការចុះផ្សាយរបស់ទស្សនាវដ្ដី Forbes នាវាមុជទឹកឈ្មោះ DeepView 24 នេះ នឹងត្រូវក្រុមហ៊ុន Vingroup ដាក់ឲ្យដំណើរការនៅកោះ Hon Tre ក្នុងសមុទ្រចិនខាងត្បូង និងអាចដឹកអ្នកដំណើរទេសចរណ៍មួយជើងៗ បាន ២៤នាក់។ ក្រុមហ៊ុន Vingroup និយាយថា បង្អួច panoramic របស់នាវាមុជទឹកនេះ គឺល្អឥតខ្ចោះសម្រាប់ការទស្សនាទេសភាពសមុទ្រ។
ទោះយ៉ាងណា ក្រុមហ៊ុនមិនទាន់បានបញ្ចេញឲ្យដឹងអំពីតម្លៃសំបុត្រសម្រាប់ការជិះកម្សាន្តលើនាវាមុជទឹកថ្មីនេះនៅឡើយទេ ប៉ុន្តែ បើយោងតាមពិសោធន៍នៃសេវានាវាមុជទឹកទេសចរណ៍នៅបណ្ដាប្រទេសដទៃទៀត តម្លៃសំបុត្រក្នុងទេសចរម្នាក់ៗ អាចពី ១០០ ទៅ ១៥០ដុល្លារ ក្នុងមួយជើង។
អត្ថបទទាក់ទង
ក្រុមហ៊ុន Vingroup ដែលប្រធានក្រុមប្រឹក្សាភិបាល គឺជាមហាសេដ្ឋីដែលស្ដុកស្ដម្ភជាងគេបំផុតនៅវៀតណាម គឺលោក Pham Nhat Vuong កាន់កាប់ហាងទំនិញធំៗ ផ្សារទំនើបជាច្រើន មានរោងចក្រផលិតរថយន្តមួយ និងផលិតម៉ាកយីហោទូរសព្ទស្មាតហ្វូនមួយផងដែរ ។
កាលពីឆ្នាំ២០១៨ ក្រុមហ៊ុន Vingroup រាយការណ៍ពីចំណូលប្រហែល ៥ពាន់លានដុល្លារ។ ក្រុមហ៊ុននេះក៏មានបុត្រសម្ព័ន្ធវិស័យទេសចរណ៍ផងដែរ ឈ្មោះថា Vinpearl ដែលគ្រប់គ្រងរមណីយដ្ឋាន ៤៣កន្លែង មានបន្ទប់សណ្ឋាគារនិងវីឡាចំនួន ១ម៉ឺន ៧ពាន់បន្ទប់ ។ នាវាមុជទឹកទេសចរណ៍ថ្មី នឹងដំណើរការនៅក្នុងតំបន់រមណីយដ្ឋានមួយរបស់ក្រុមហ៊ុន Vinpearl។
ទេសចរណ៍នៅវៀតណាមកំពុងចាប់ផ្ដើមកម្រើកជីពចរឡើងវិញ នៅក្នុងខែនេះ។ ប៉ុន្តែ ទោះយ៉ាងណា វៀតណាមនៅមិនទាន់បើកព្រំដែនអនុញ្ញាតឲ្យភ្ញៀវទេសចរបរទេសចូលមកក្នុងប្រទេសខ្លួននៅឡើយទេ៕
