ឥណ្ឌា ដែលកំពុងប្រណាំងជាមួយចិន លើចំនួនប្រជាជនដ៏ច្រើនជាងគេបំផុតក្នុងពិភពលោក កំពុងខិតជិតសម្រចបាននូវសក្តានុពលសេដ្ឋកិច្ចរបស់ខ្លួនហើយ។ លោកនាយករដ្ឋមន្រ្តី Narendra Modi បញ្ជាក់ថា រដ្ឋាភិបាលរបស់លោកនឹងលុបបំបាត់អំពើពុករលួយ និងវិសមភាពសង្គម ដើម្បីសម្រេចបាននូវការរះត្រដែតឡើងរបស់ឥណ្ឌា។ រដ្ឋាភិបាលឥណ្ឌា កំពុងចំណាយស្ទើរជិត ២០%នៃថវិការបស់ខ្លួនក្នុងឆ្នាំសារពើពន្ធនេះ ទៅលើកាវិនិយោគមូលធន ដែលជាចំនួនដ៏ច្រើនបំផុតក្នុងរយៈពេល១ទសវត្សរ៍ចុងក្រោយ។
លោក ណាដាន់ នីលកានី(Nandan Nilekani) ស្ថាបនិកក្រុមហ៊ុន Infosys ដែលជាក្រុមហ៊ុនសេវាបច្ចេកវិទ្យាដ៏ធំបំផុតមួយរបស់ឥណ្ឌា និយាយថា ឥណ្ឌាបានបង្កើតយ៉ាងឆាប់រហ័សនូវសមត្ថភាពក្នុងការគាំទ្រដល់ការចាប់ផ្តើមអាជីវកម្មថ្មីៗចំនួនរាប់ម៉ឺនអាជីវកម្ម និងការផលិតស្មាតហ្វូនរាប់ពាន់លានគ្រឿង។
ចំណែកការលើកឡើងរបស់អ្នកវិភាគពីខ្សែចង្វាក់ផ្គត់ផ្គង់បង្ហាញថា ឥណ្ឌា និងវៀតណាម ក្លាយជាទីកន្លែងថ្មីនៃក្នុងការដាក់រោងចក្រផលិតរបស់ក្រុមហ៊ុនធំៗ បន្ទាប់ពីប្រទេសចិន។ ក្នុងនោះក្រុមហ៊ុនផ្គត់ផ្គង់ឱ្យ Apple ចំនួន៣ សុទ្ធតែទទួលបានការលើកទឹកចិត្តពីរដ្ឋាភិបាលឥណ្ឌាឱ្យដាក់រោងចក្រផលិត និងបើកការនាំចេញ។ ក្នុងនោះគ្រាន់តែការនាំចេញទូរសព្ទម៉ូឌែល iPhone ពីប្រទេសឥណ្ឌា គិតពីខែមេសា ដល់ខែធ្នូគឺមានតម្លៃដល់ទៅ ២ពាន់៥រយលានដុល្លារ។
បើតាមក្រុមហ៊ុនវិនិយោគអាមេរិក Morgan Stanley បានព្យាករថា ឥណ្ឌា ដែលមានប្រជាជនជាង ១ពាន់៤រយលាននាក់នេះ នឹងជំរុញកំណើនសេដ្ឋកិច្ចសាកលប្រមាណ ១ភាគ៥ នៅក្នុងទសវត្សរ៍នេះ ពោលគឺស្ថិតក្នុងចំណោមប្រទេស៣គត់ ដែលអាចបង្កើតប្រាក់បានជាង៤០០ពាន់លានដុល្លារ ក្នុងកំណើនទិន្នផលប្រចាំឆ្នាំ។
អត្ថបទគួរអាន
គួរកត់សម្គាល់ថា នៅឆ្នាំ២០២៣នេះ ឥណ្ឌានឹងធ្វើជាប្រធានរៀបចំកិច្ចប្រជុំកំពូល G-20 ដែលជាឱកាសមួយក្នុងការជួយឱ្យឥណ្ឌា ជះឥទ្ធិពលរបស់ខ្លួនរីកសាយភាយនៅលើពិភពលោក។ យុទ្ធសាស្រ្តរបស់ឥណ្ឌាក្នុងការកសាងសម្ព័ន្ធមិត្តចម្រុះ ពោលគឺមិនថាតែខាងអាមេរិកនោះទ តែសម្រាប់ខាងរុស្ស៊ីផងដែរ ដើម្បីស្វែងរកការបង្កើនផលប្រយោជន៍របស់ខ្លួន។
លោក Modi នាយករដ្ឋមន្ត្រីឥណ្ឌា បានថ្លែងក្នុងថ្ងៃរំលឹកខួបនៃការទទួលបានឯករាជ្យកាលពីពេលកន្លងទៅថា រដ្ឋាភិបាលលោកបានជំរុញខិតខំដោះស្រាយបញ្ហាគ្រប់បែបយ៉ាង ដើម្បីឱ្យឥណ្ឌាក្លាយជាប្រទេសអភិវឌ្ឍន៍មួយក្នុងរយៈពេល ២៥ឆ្នាំខាងមុខ។ ទន្ទឹមនេះកំណើន GDP ឥណ្ឌានឹងឈានឡើងម្តងបន្តិចរហូតដល់ចំណុចកំពូលក្នុងរង្វង់ ៨,៥% នៅដើមទសវត្សរ៍ក្រោយ។ ក្នុងនោះ មជ្ឈមណ្ឌលសម្រាប់ការស្រាវជ្រាវ និងពាណិជ្ជកម្ម បានព្យាករថា ឥណ្ឌានឹងក្លាយជាសេដ្ឋកិច្ចដែលមានទំហំ ១០ទ្រីលានដុល្លារនៅត្រឹមឆ្នាំ២០៣៥។
យោងតាមការប៉ាន់ស្មានរបស់ World Population Review ឱ្យដឹងថាប្រជាជនឥណ្ឌា នឹងមានចំនួន ១ពាន់៤១៧លានលាននាក់គិតត្រឹមចុងឆ្នាំ២០២២។ ពាក់កណ្តាលនៃប្រជាជនឥណ្ឌា គឺស្ថិតក្រោមអាយុ ៣០ឆ្នាំ ដែលជាវ័យកំពុងពេញកម្លាំង អាចជួយជំរុញសកម្មភាពផលិតកម្មយ៉ាងសកម្មបំផុត ផ្ទុយពីប្រទេសចិន ដែលមានប្រជាជនវ័យចាស់កាន់តែច្រើន ហើយអត្រាកំណើតថ្មីកំពុងធ្លាក់ចុះ។ ការធ្លាក់ចុះចំនួនប្រជាជនចិន ក្នុងឆ្នាំ២០២២កន្លងទៅ គឺជាការធ្លាក់ចុះលើកដំបូង គិតចាប់តាំងពីទសវត្សរ៍ទី៦០មក។
បន្ថែមលើសពីនេះទៀត ដើម្បីប្រកួតប្រជែងជាមួយចិន រដ្ឋាភិបាលឥណ្ឌាបានផ្តល់ការលើកចិត្តនូវគម្រោងទឹកប្រាក់ជាង ២៤ពាន់លានដុល្លារសម្រាប់រយៈពេលពីរបីឆ្នាំក្រោយក្នុងឧស្សាហកម្មជាច្រើន ជាពិសេសគឺឧស្សាហកម្មបច្ចេកវិទ្យាតែម្តង៕
អត្ថបទ ៖ នៅ សំភី
