តើសង្គ្រាមនៅអ៊ុយក្រែន កំពុងខិតទៅរកការចរចាសន្ដិភាព ឬយ៉ាងណា ក្រោយលោក ហ្សេឡេនស្គី ស្នើឱ្យមេដឹកនាំអាម៉េរិក និងចិន ចូលរួមក្នុងកិច្ចប្រជុំកំពូលសន្ដិភាពនៅខែក្រោយ?

ប្រទេសអ៊ុយក្រែន សង្ឃឹមថា នឹងរៀបចំកិច្ចប្រជុំកំពូលសន្តិភាពក្នុងប្រទេសស្វីស នៅខែមិថុនា ដ៏ខ្លីខាងមុខនេះ ដែលនឹងអញ្ជើញមេដឹកនាំនៃប្រទេសជាច្រើនទូទាំងពិភពលោកឱ្យចូលរួមតាមដែលអាចធ្វើទៅបាន ដើម្បីប្រមូលអនុសាសន៍ល្អៗស្ដីពីវិធីបញ្ឈប់សង្រ្គាមឈ្លានពាន និងដាក់សម្ពាធលើប្រធានាធិបតីរុស្ស៊ី លោក វ៉្លាឌីមៀ ពូទីន ដែលមិនត្រូវបានអញ្ជើញឱ្យចូលរួម។

តាមរយៈវីដេអូមួយថតនៅទីក្រុងខាគីវ (Kharkiv) ភាគឦសាននៃប្រទេសអ៊ុយក្រែន លោក ហ្សេឡេនស្គី បានអះអាងថា ប្រទេសជាង៨០នឹងចូលរួមក្នុងកិច្ចប្រជុំកំពូលសន្តិភាពរបស់អ៊ុយក្រែន។

ទោះជាយ៉ាងណា គេមិនទាន់ច្បាស់ថា តើលោក ចូ បៃឌិន នឹងចូលរួមក្នុងកិច្ចប្រជុំកំពូលនេះ ឬក៏អត់នោះទេ ហើយលោក ស៊ី ជិនភីង ក៏ដូចគ្នាដែរ ខណៈដែលក្រុងប៉េកាំង នៅតែរក្សាទំនាក់ទំនងជិតស្និទ្ធជាមួយក្រុងមូស្គូ។

ឆ្លើយតបទៅនឹងមន្ទិលនេះ មន្ត្រីអាម៉េរិក មួយរូបបានអះអាងកាលពីថ្ងៃអាទិត្យចុងសប្ដាហ៍កន្លងទៅថា សហរដ្ឋអាម៉េរិក នឹងចូលរួមក្នុងកិច្ចប្រជុំកំពូលនេះ ប៉ុន្តែបានបដិសេធមិនបញ្ជាក់ថា ឥស្សរជនរូបណា ឬមន្ត្រីកម្រិតណានឹងចូលរួមនោះទេ។

លោក ហ្សេឡេនស្គី បានអំពាវនាវឱ្យមេដឹកនាំទូទាំងពិភពលោករួមទាំងប្រធានាធិបតីអាម៉េរិក លោក ចូ បៃឌិន និងប្រធានាធិបតីចិន លោក ស៊ី ជិនភីង ផងដែរ ចូលរួមក្នុងកិច្ចប្រជុំកំពូលសន្តិភាពនេះ ហើយលោកបានបន្ថែមថា កិច្ចប្រជុំកំពូលនេះនឹងបង្ហាញឱ្យពិភពលោកឃើញច្បាស់ថា អ្នកណាខ្លះមានឆន្ទៈចង់បញ្ចប់សង្គ្រាមឈ្លានពាននៅអ៊ុយក្រែន ដោយពិតប្រាកដ៕

ដោយ: តែម សុខុម