កងកម្លាំងអ៊ីស្រាអែល បានបន្តទម្លាក់គ្រាប់បែកលើតំបន់ហ្គាហ្សា កាលពីថ្ងៃចន្ទ ទី២៣ ខែតុលា ក្រោយកងកម្លាំងអាកាសបានវាយប្រហារភាគខាងត្បូង ប្រទេសលីបង់ ពេញមួយយប់ ដែលធ្វើឱ្យសង្គ្រាមរវាងអ៊ីស្រាអែល ជាមួយក្រុមសកម្មប្រយុទ្ធហាម៉ាស ប៉ាឡេស្ទីន កាន់តែក្តៅ និងអាចរីកកាន់តែធំ។ ជាមួយគ្នានេះនាយករដ្ឋមន្រ្តី អ៊ីស្រាអែល លោក បេនចាមីន ណេតាន់យ៉ាហ៊ូ បានកោះប្រជុំក្រុមឧត្តមសេនីយ៍កំពូលៗ និងគណៈរដ្ឋមន្ត្រីសង្រ្គាមរបស់លោក ដើម្បីវាយតម្លៃជម្លោះដែលកំពុងកើនឡើងនៅតំបន់ហ្គាហ្សា។
ពាក់ព័ន្ធនឹងការវាយប្រហារនេះប្រព័ន្ធផ្សព្វផ្សាយប៉ាឡេស្ទីន បានរាយការណ៍ថា ការវាយប្រហាររបស់អ៊ីស្រាអែល ផ្តោតទៅលើភាគកណ្តាល និងភាគខាងជើងតំបន់ហ្គាហ្សា។ មកដល់ពេលនេះមនុស្សជាង៤ពាន់៦រយនាក់ បានស្លាប់ ចាប់តាំងពីការទម្លាក់គ្រាប់បែករបស់អ៊ីស្រាអែល បានចាប់ផ្តើមនៅដើមខែតុលា ជាការឆ្លើយតបទៅនឹងការវាយប្រហាររបស់ក្រុមសកម្មប្រយុទ្ធហាម៉ាស នៅភាគខាងត្បូងប្រទេសអ៊ីស្រាអែល កាលពីថ្ងៃទី៧ ខែតុលា។
អត្ថបទគួរអាន
ឆ្លើយតបនឹងការវាយប្រហារនេះ មេដឹកនាំក្រុមហាម៉ាស់ ប៉ាឡេស្ទីនគឺលោក អ៊ីស្មាអ៊ីល ហានីយេស ( Ismail Haniyeh ) និងរដ្ឋមន្ត្រីការបរទេសអ៊ីរ៉ង់ លោក ហូសេន អាមីរ៉ាដូឡាអៀន ( Hossein Amirabdollahian ) បានពិភាក្សាគ្នាតាមទូរសព្ទកាលពីល្ងាចថ្ងៃអាទិត្យ ដើម្បីរកដំណោះស្រាយ និងមធ្យោបាយបញ្ឈប់ឧក្រិដ្ឋកម្ម និងអំពើឃោឃៅដោយសារតែជម្លោះ ខណៈដែលគេដឹងថា នៅពេលនេះ កងកម្លាំងអ៊ីស្រាអែល កំពុងត្រៀមបម្រុង និងប្រមូលកងកម្លាំង និងរថពាសដែករបស់ខ្លួនដាក់ពង្រាយតាមតំបន់ព័ទ្ធជុំវិញហ្គាហ្សា។
ជុំវិញសភាពការណ៍សង្គ្រាមវិវត្តន៍ទៅមុខនេះដែរ ទីក្រុងវ៉ាស៊ីនតោន ក៏បានប្រកាសពីការដាក់ពង្រាយប្រព័ន្ធការពារដែនអាកាសកម្រិតខ្ពស់ផងដែរ។ មន្ទីរបញ្ចកោណបានបញ្ជូនកម្លាំងទ័ពជើងទឹកយ៉ាងច្រើនទៅកាន់មជ្ឈិមបូព៌ា រួមទាំងនាវាផ្ទុកយន្តហោះពីរ នាវាជំនួយ និងកងម៉ារីន ប្រហែល២ពាន់នាក់ ដើម្បីជួយទប់ស្កាត់ការវាយប្រហារដោយកងកម្លាំងពាក់ព័ន្ធរបស់អ៊ីរ៉ង់។
លោក ឡូយ អូស្ទីន ( Lloyd Austin ) រដ្ឋមន្ត្រីការពារជាតិអាមេរិក បាននិយាយកាលពីថ្ងៃអាទិត្យថា អ្វីដែលខ្លួនកំពុងមើលឃើញ គឺជាការរំពឹងទុកនៃការកើនឡើងគួរឱ្យកត់សម្គាល់នៃការវាយប្រហារលើកងទ័ព និងប្រជាជនរបស់អាម៉េរិកទូទាំងតំបន់។ ជាមួយគ្នានេះ អាម៉េរិក ក៏បានព្រមានឆ្លើយតបដោយកម្លាំងយោធាផងដែរ ប្រសិនបើកងកម្លាំងរបស់ខ្លួនរងការវាយប្រហារដោយក្រុមណាមួយ។
ដោយឡែក បេសកជនពិសេសចិន គឺ លោក ជៃ ជន ( Zhai Jun) ដែលកំពុងបំពេញទស្សនកិច្ចក្នុងតំបន់បានព្រមានថា ហានិភ័យនៃជម្លោះទ្រង់ទ្រាយធំកំពុងកើនឡើង ហើយជម្លោះដែលផ្ទុះឡើងនៅក្នុងតំបន់គឺ "គួរឱ្យព្រួយបារម្ភ"៕
ដោយៈ សរ សុជាតិ
None
