ប្រភពព័ត៌មានបានឲ្យដឹងទៀតថា សហស្ថាបនិកក្រុមហ៊ុនអាលីបាបា បានឈានដល់កម្រិតកំពូលដោយមានទ្រព្យសម្បត្តិជាទឹកប្រាក់សរុប៦១,៧ ពាន់លានដុល្លារអាមេរិកនៅឆ្នាំនេះ និងបានបម្រុងនឹងក្លាយទៅជាអ្នកមានទ្រព្យសម្បត្តិច្រើនជាងគេបំផុតនៅអាស៊ីទៅហើយ ជាមួយនឹងការបោះផ្សាយលក់ភាគហ៊ុនក្រុមហ៊ុនរបស់ខ្លួន គឺ Ant Group។ ប៉ុន្ដែ បន្ទាប់ពីដំណើរការនៃការបោះផ្សាយលក់ភាគហ៊ុន Ant Group របស់លោក JacK Ma ត្រូវបានបរាជ័យ ដោយសារតែមានការអន្តរាគមន៍ និងត្រួតពិនិត្យឡើងវិញដោយអាជ្ញាធរចិនរួចមក ឃើញថា ទ្រព្យសម្បត្តិរបស់មហាសេដ្ឋីសំដីចាក់ទឹកមិនលិចរូបនេះ បានធ្លាក់មកនៅត្រឹមតែ ៥០,៩ ពាន់លានដុល្លារប៉ុណ្ណោះ នៅពេលបច្ចុប្បន្ននេះ។
អត្ថបទទាក់ទង!
អាជ្ញាធរចិនបានបង្កើនការស៊ើបអង្កេតទៅលើអាណាចក្រជំនួញរបស់លោក Jack Ma និងបានបង្គាប់ឲ្យថ្នាក់ដឹកនាំក្រុមហ៊ុន Ant ត្រូវកែតម្រូវ នូវបច្ចេកវិទ្យាហិរញ្ញវត្ថុ ទាក់ទងនឹងការផ្ដល់ប្រាក់កម្ចី របស់ក្រុមហ៊ុននេះ រួមទាំង សេវាធានារ៉ាប់រង និងអាជីវកម្មគ្រប់គ្រងទ្រព្យសម្បត្តិរបស់ក្រុមហ៊ុន។
កាលពីសប្ដាហ៍មុន ប្រទេសចិនបានចាប់ផ្ដើមការស៊ើបអង្កេតលើរបាយការណ៍ដែលមានការអនុវត្តបែបផ្ដាច់មុខ និងបានកោះហៅក្រុមហ៊ុន Ant ឲ្យជួបប្រជុំពិភាក្សាស្ដីអំពីបទបញ្ញត្តិហិរញ្ញវត្ថុផងដែរ។
ភាគហ៊ុនរបស់ក្រុមហ៊ុនអាលីបាបា Group ដែលបានចុះបញ្ជីនៅសហរដ្ឋអាមេរិក ក៏មានការធ្លាក់ចុះ ៨,១% ផងដែរនៅផ្សារហ៊ុន New York ដែលវាគឺជាការធ្លាក់ចុះខ្លាំងបំផុតក្នុងរយៈពេលជិត៦ឆ្នាំមកនេះ បន្ទាប់ពីអាជ្ញាធរចិនបានសម្រេចឲ្យព្យួរការចុះបញ្ជីបោះផ្សាយលក់ភាគហ៊ុនរបស់ក្រុមហ៊ុន Ant នៅក្នុងផ្សារភាគហ៊ុនសៀងហៃ និងហុងកុង។ ផ្សារភាគហ៊ុននៅហុងកុង ក៏បានរអិលធ្លាក់ចុះ ៩,៣% ផងដែរ នៅក្នុងម៉ោងបើកជួញដូរដំបូងនៅក្នុងស្រុក។
ការបង្កើនការត្រួតពិនិត្យតាមដានពីសំណាក់រដ្ឋាភិបាលចិននេះ ក៏បានធ្វើឲ្យមានការកាត់បន្ថយនូវចំណាប់អារម្មណ៍របស់វិនិយោគិនក្នុងផ្សារភាគហ៊ុន និងបានទាញទម្លាក់តម្លៃភាគហ៊ុន របស់ក្រុមហ៊ុនបច្ចេកវិទ្យាយក្សៗដែលស្រដៀងគ្នានឹងក្រុមហ៊ុនរបស់លោក Jack Ma ផងដែរ បើទោះបីជាមានការកើនឡើងនូវតម្រូវការសេវាកម្មតាមអ៊ីនធើណែត នៅអំឡុងពេលកូវីដ-១៩ ក្ដី។
តួយ៉ាង ភាគហ៊ុនរបស់ក្រុមហ៊ុន Tencent បានធ្លាក់ចុះដល់ទៅ ១៥% តាំងពីដើមខែវិច្ឆិកាមក ខណៈដែលក្រុមហ៊ុនដឹកជញ្ជូនម្ហូបអាហារ ដ៏ធំមួយនៅចិន គឺ Meituan ក៏ធ្លាក់ចុះជិត១ភាគ៥ នៃតម្លៃដែលធ្លាប់មានខ្ពស់បំផុតកាលពីខែមុនផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
