ប្រទេសជប៉ុន បន្ទាប់ពីបានឆ្លងកាត់រលកឆ្លងលើកទី៥អំឡុងរដូវក្តៅឆ្នាំនេះរួចមក ឃើញថាករណីឆ្លង និងស្លាប់ប្រចាំថ្ងៃ បានថយចុះគួរឲ្យកត់សម្គាល់ ស្របពេលដែលអត្រាចាក់វ៉ាក់សាំងបានគ្របដណ្តប់លើពលរដ្ឋជាង ៧០%ផងនោះ។
វិធានការណ៍ដាក់ប្រទេសក្នុងគ្រាអាសន្នក៏ត្រូវបានរដ្ឋាភិបាលជប៉ុនលុបចោលហើយដែរកាលពីខែមុន ប៉ុន្តែអ្នកជំនាញផ្នែកសុខាភិបាលបានព្រមានថា ករណីឆ្លងទំនងជាហក់ឡើងវិញ ដូចកាលពីអំឡុងរដូវរងាឆ្នាំមុនដែរ។
នៅចំពោះមុខភាពមិនប្រាកដប្រជានៃកូវីដ១៩ដូចនេះ រដ្ឋាភិបាលក្រុងតូក្យូ មានគម្រោងបង្កើនចំនួនគ្រែពេទ្យ៣០%បន្ថែមទៀត ហើយទន្ទឹមនឹងនេះ ជប៉ុននឹងធ្វើការប៉ាន់ស្មានមើលឡើងវិញ ពីសមត្ថភាពរបស់មន្ទីរពេទ្យណា ដែលពិបាកទប់ទល់នឹងចំនួនអ្នកជំងឺច្រើន។
អត្ថបទទាក់ទង!
ជាមួយគ្នានេះ ជប៉ុនថែមទាំងបានកម្មង់ទិញថ្នាំគ្រាប់ព្យាបាលជំងឺកូវីដ១៩ប្រភេទ Merck របស់អាមេរិក រួចរាល់ហើយដែរ ក្នុងទឹកប្រាក់ប្រមាណ ១.២ពាន់លានដុល្លារអាមេរិក។
ដោយឡែក ការចាក់ថ្នាំវ៉ាក់សាំងបង្ការកូវីដ១៩ដូសជំរុញ នឹងចាប់ផ្តើមពីខែក្រោយ ហើយរដ្ឋាភិបាលជប៉ុន កំពុងពិចារណាពង្រីកការចាក់វ៉ាក់សាំងដល់កុមារដែលមានអាយុចាប់ពី៥ឆ្នាំឡើងទៅ។
សូមជម្រាបថា ប្រទេសជប៉ុនទោះធ្លាប់បានដាក់ប្រទេសក្នុងគ្រាអាសន្នក៏ពិតមែន ប៉ុន្តែជប៉ុនអាចទប់ទល់នឹងរោគរាតត្បាតសកលមួយនេះ បានល្អជាងប្រទេសជាច្រើនផ្សេងទៀត។ គិតមកទល់ពេលនេះ ជប៉ុនមានអ្នកស្លាប់ត្រឹមតែជាង ១ម៉ឺន៨ពាន់នាក់ប៉ុណ្ណោះ ហើយជប៉ុនក៏មិនដែលបានដាក់វិធានការណ៍បិទខ្ទប់ប្រទេសសូម្បីតែម្តង៕
None
