ប្រភពព័ត៌មានReuters បានធ្វើការដកស្រង់ការចុះផ្សាយពីសារព័ត៌មានក្នុងស្រុកជប៉ុនជាច្រើនថា រដ្ឋាភិបាលជប៉ុន កំពុងត្រៀមព្យួរជាបណ្តោះអាសន្ននូវជំនួយអភិវឌ្ឍន៍នានាដល់ភូមា ទុកជាការដាក់ទណ្ឌកម្ម ហើយនឹងព្យាយាមបញ្ចុះបញ្ចូលរបបយោធាឱ្យឈានដល់ដំណោះស្រាយបែបប្រជាធិបតេយ្យតាមរយៈការចរចារគ្នា។
យ៉ាងណាមិញ ប្រភពពីមន្ត្រីជាន់ខ្ពស់ក្នុងជួររដ្ឋាភិបាលជប៉ុនបានឲ្យដឹងថា ជប៉ុននឹងតាមដានស្ថានការណ៍ នៅភូមាដោយប្រុងប្រយ័ត្នបំផុត និងមិនមានការលំអៀងទៅរកខាងមួយនោះទេ រួចទើបពិចារណាពីជំរើសថាគួរផ្អាកជំនួយនៅពេលណា និងផ្អាកយ៉ាងដូចម្តេច។
អត្ថបទទាក់ទង
សូមបញ្ជាក់ថា រដ្ឋាភិបាលទីក្រុងតូក្យូ គឺជាម្ចាស់ជំនួយដ៏សំខាន់សម្រាប់ភូមា ហើយជាមួយគ្នានេះវត្តមានក្រុមហ៊ុនធំៗរបស់ជប៉ុន ដែលបានពង្រីកអាជីវកម្មនៅភូមាក្នុងរយៈពេលប៉ុន្មានឆ្នាំចុងក្រោយ បានក្លាយជាទីផ្សារមួយឈានមុខគេ។
ប៉ុន្តែគេសង្កេតឃើញថា ជប៉ុនទំនងជារារែក និងភ័យខ្លាចក្នុងដាក់សម្ពាធលើភូមា ព្រោះប្រការនេះអាចរុញច្រានភូមាឲ្យឃ្លាតចេញពីជប៉ុន និងខិតទៅជិតប្រទេសចិនកាន់តែខ្លាំង៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
