ទាក់ទិននឹងការសាងសង់កំពង់ផែទឹកជ្រៅទាំង៣ដំណាក់នេះដែរ ត្រូវបានលោក សុខគល់ ចិន្តា ប្រធានរដ្ឋបាលនៃអង្គភាពគ្រប់គ្រងគម្រោង នៃកំពង់ផែស្វយ័តក្រុងព្រះសីហនុបានប្រាប់សារព័ត៌មានខេមបូណូមីសថា បច្ចុប្បន្នការសាងសង់កំពង់ផែទឹកជ្រៅជម្រៅ ១៤,៥ ម៉ែត្រដំណាក់កាលទី១នេះ គឺភាគីជប៉ុន និងខាងកំពង់ផែ កំពុងសិក្សាលម្អិតដើម្បីរៀបចំឯកសារដេញថ្លៃនៅឡើយទេ។
លោក សុខគល់ ចិន្តា បញ្ជាក់ថា «ការរៀបចំឯកសារដេញថ្លៃ និងការផ្សព្វផ្សាយរកក្រុមហ៊ុនសាងសង់កំពង់ផែនេះ នឹងត្រូវចំណាយពេលជិត១ឆ្នាំអីទៀត ហើយគ្រោងនឹងចាប់ផ្តើមសាងសង់កំពង់ផែទឹកជ្រៅដំណាក់កាលទី១នៅពាក់កណ្តាលឆ្នាំ២០២១ ហើយនឹងបញ្ចប់នៅឆ្នាំ២០២៤»។
មន្ត្រីជាន់ខ្ពស់របស់កំពង់ផែស្វយ័តក្រុងព្រះសីហនុរូបនេះបន្ថែមថា សម្រាប់ការសាងសង់កំពង់ផែទឹកជ្រៅជម្រៅ ១៤,៥ម៉ែត្រដំណាក់កាលទី១ នឹងត្រូវចំណាយថវិកាប្រមាណជាង ២០០លានដុល្លារ និងការកសាងក្នុងដំណាក់កាលទី២ និងទី៣ ចំណាយប្រមាណ ៥០០លានដុល្លារអាមេរិក។
ដោយឡែកចំពោះកំពង់ផែក្រុងព្រះសីហនុបច្ចុប្បន្ន មានជម្រៅតែ ៨,៥ម៉ែត្រប៉ុណ្ណោះ សម្រាប់នាវាដឹកកុងទីន័រដែលចូលចតបាន និងផែដែលចូលចតទំនិញទូទៅជម្រៅ ១២ម៉ែត្រ ដែលប្រមុខរាជរដ្ឋាភិបាលបានសម្ពោធដាក់ឲ្យប្រើប្រាស់កាលពីឆ្នាំ២០១៨កន្លងទៅ ។
អត្ថបទទាក់ទង!
នៅក្នុងសន្និសីទសារព័ត៌មានស្តីពីវឌ្ឍនភាពការងាររបស់ខេត្តព្រះសីហនុនាព្រឹកមិញនេះ ឯកឧត្តម គួច ចំរើនបានបញ្ជាក់ថា គម្រោងកំពង់ផែទឹកជ្រៅដំណាក់កាលទី១ ដែលមានជម្រៅ ១៤,៥ម៉ែត្រ ដែលជប៉ុនគ្រោងផ្ដល់ហិរញ្ញប្បទានសម្រាប់ការសាងសង់នោះ គឺនឹងជួយសម្រួលដល់ការចូលចតនាវាដឹកជញ្ជូនប្រមាណជា៧០% ដែលកំពុងតែបើកបរនៅលើសមុទ្រអន្តរជាតិ។
ឯកឧត្តមបន្តថា «ដំណាក់កាលទី១នេះ បានចាប់ផ្តើមដំណើរការហើយ ហើយនឹងត្រូវបញ្ចប់នៅក្នុងឆ្នាំ២០២៤ ខាងមុខនេះ យើងនឹងមានដំណាក់កាលទី២ និងទី៣បន្តទៀត ដែលតាមការឯកភាព និងការគាំទ្រពីរដ្ឋាភិបាលជប៉ុនដំណាក់កាលទី២ និងទី៣ នឹងត្រូវកសាងក្នុងពេលព្រមគ្នាតែមួយ ដែលនឹងត្រូវជំរុញឲ្យកំពុងផែរបស់យើងមានជម្រៅទឹករហូតដល់ ១៨ម៉ែត្រ»។
ឯកឧត្តមអភិបាលខេត្តបានបន្ថែមថា បន្ទាប់ពីការកសាងកំពង់ផែទឹកជ្រៅជម្រៅ ១៨ម៉ែត្ររួច ក្រោយឆ្នាំ២០២៨ នាវានៅលើពិភពលោកបច្ចុប្បន្នប្រមាណជា៩៧% នឹងអាចចូលចតបាននៅក្នុងកំពង់ផែខេត្តព្រះសីហនុ ដែលនេះគឺជាសក្តានុពលកាន់តែធំធេងបន្ថែមទៀត សម្រាប់ផ្លូវទឹកនៅក្នុងខេត្តព្រះសីហនុ បើទោះបីជានៅមានរយៈវែងបន្តិចក៏ពិតមែន។
សូមជម្រាបថា កំពង់ផែទឹកជ្រៅ ជម្រៅ ១៤,៥ម៉ែត្រ ដែលនឹងត្រូវសាងសង់ក្នុងដំណាក់កាលទី១ ក្នុងឆ្នាំ២០២១ខាងមុខនេះ អាចអនុញ្ញាតឲ្យនាវាធុនធំដែលមានចំណុះអាចដឹកកុងទីន័របាន ៥ពាន់ ETUs ឬប្រហាក់ប្រហែលនឹង ៦ម៉ឺនតោនអាចចូលចតបាន។ មួយវិញទៀត នៅពេលសាងសង់រួច កំពង់ផែនេះ ក៏នឹងអាចស្រូបទាញនាវាដែលដឹកកុងទីន័រចំនួន ៩៣% ដែលមានផ្លូវរត់ក្នុងតំបន់អាស៊ីប៉ាស៊ីភិច ខណៈដែលកំពង់ផែបច្ចុប្បន្នអាចស្រូបទាញបានត្រឹមតែ ១៨% ទៅ២០%ប៉ុណ្ណោះ៕
None
