រដ្ឋមន្ត្រីការពារជាតិជប៉ុនលោកណូប៊ូ គីហ្សី បានចេញមកសម្តែងការខឹងសម្បារថា យន្តហោះទម្លាក់គ្រាប់បែកសរុបចំនួន៤គ្រឿង ក្នុងនោះពីរគ្រឿងជារបស់ប្រទេសចិន និងពីរគ្រឿងទៀតជារបស់រុស្ស៊ី បានហោះហើរមកកៀកកិតនឹងដែនសមុទ្រជប៉ុន។ បន្ថែមពីលើនេះ យន្តហោះរុស្ស៊ីមួយគ្រឿង ក៏បានហោះឆ្លបយកការណ៍ពីលើអាកាស ដោយបានហោះពីលើកោះហុកកៃដូ ឆ្ពោះទៅតំបន់ជ្រោយនូតុរបស់ជប៉ុនថែមទៀត។
ដោយឡែកបើតាមអគ្គសេនាធិការចម្រុះរបស់កូរ៉េខាងត្បូង យន្តហោះរុស្ស៊ី និងចិនក៏បានហោះចេញចូលជាច្រើនដងកាលពីថ្ងៃអង្គារ ក្នុងតំបន់ការពារដែនអាកាសរបស់កូរ៉េខាងត្បូង ពោលគឺនៅឆ្នេរសមុទ្រភាគខាងកើតនៃប្រទេស។
សកម្មភាពនៃយន្តហោះចម្បាំង និងទម្លាក់គ្រាប់បែករបស់ចិន និងរុស្ស៊ី នៅក្បែរដែនទឹកជប៉ុននិងកូរ៉េនេះ គឺបានធ្វើឡើងនៅក្នុងថ្ងៃតែមួយ ដែលសម្ព័ន្ធមិត្តចតុភាគី Quad បានជួបប្រជុំគ្នានៅក្រុងតូក្យូ។ កិច្ចប្រជុំដែលបានលើកយករបៀបវារៈជាច្រើនមកពិភាក្សាក្នុងនោះរួមមាន ដើម្បីរកមធ្យោបាយទប់ទល់នឹងឥទ្ធិពលកាន់តែខ្លាំងរបស់ចិន ទាំងផ្នែកសេដ្ឋកិច្ចនិងទាំងយោធា ខណៈសំណុំរឿងសង្គ្រាមនៅអ៊ុយក្រែន ក៏បានជាប្រធានបទសំខាន់ផងដែរ។
អត្ថបទគួរអាន
រដ្ឋាភិបាលក្រុងតូក្យូបានចាត់ទុកសកម្មភាពខាងលើថា ជាចេតនាដែលរុស្ស៊ី និងចិនធ្វើឡើងដើម្បី ជាការញ៉ុះញ៉ុង់ ចង់បង្ករឿង និងក្នុងន័យគំរាមគំហែងផងដែរ។ ជាការឆ្លើយតបភ្លាមៗទៅនឹងទង្វើបង្កហេតុខាងលើ កូរ៉េខាងត្បូងបានបញ្ជូនយន្តហោះចម្បាំងឲ្យហោះទៅល្បាតក្នុងដែនអាកាសរបស់ខ្លួន។
ចំណែកឯជប៉ុនវិញ បានជ្រើសយកវិធីការទូតមកឆ្លើយតបនឹងបញ្ហានេះ។ រដ្ឋមន្ត្រីការពារជាតិជប៉ុន ប្រាប់អ្នកយកព័ត៌មានក្នុងសន្និសីទសារព័ត៌មានថា តាមផ្លូវការទូត ជប៉ុនសម្តែងក្តីព្រួយបារម្ភខ្លាំងណាស់។ សម្តែងក្តីព្រួយបារម្ភ ក៏ដោយសារតែពិភពលោកកំពុងជាប់ដៃឆ្លើយតបនឹងការឈ្លានពានរបស់រុស្ស៊ីទៅលើអ៊ុយក្រែន ស្រាប់តែចិនបែរជាមកសហការជាមួយរុស្ស៊ី ធ្វើសកម្មភាពបែបនេះទៀត នៅក្បែរដែនដីជប៉ុនទៅវិញ។ មន្ត្រីជាន់ខ្ពស់ក្រុងតូក្យូរូបនេះ បញ្ជាក់ថា គេមិនត្រូវមាក់ងាយស្ថានការណ៍នេះដាច់ខាត។
សូមជម្រាបថា ទីក្រុងម៉ូស្គូ និងប៉េកាំង បានប្រតិកម្មតបវិញស្រដៀងគ្នាថា តំបន់ដែលយន្តហោះខ្លួនធ្វើសកម្មភាព នេះមិនមែនជាដែនអាកាសផ្តាច់មុខ ឬមិនមែនជាដែនអាកាសរបស់ជប៉ុនឡើយ ដោយពួកគេគ្រាន់តែហោះហើរក្បែរៗនោះប៉ុណ្ណោះ។ ក្រុងប៉េកាំងថា ប្រទេសទាំងអស់គួរតែមានសេរីភាពក្នុងការហោះហើរ នៅទីនោះនិយាយដោយឡែក និងហោះហើរក្នុងដែនអាកាសអន្តរជាតិ និយាយជារួម៕
None
