ការសិក្សាដែលត្រូវបានចេញផ្សាយកាលពីថ្ងៃព្រហស្បតិ៍សប្ដាហ៍នេះ ដោយទីភ្នាក់ងារកិច្ចសហប្រតិបត្តិការអន្តរជាតិជប៉ុន (JICA) បានបង្ហាញថា ប្រទេសនេះនឹងមានឧបសគ្គក្នុងការទាក់ទាញពលករបរទេសជាច្រើន ខណៈដែលកម្មករនៅតាមបណ្ដាប្រទេសអាស៊ីអាគ្នេយ៍ជាច្រើនត្រូវបានគេរំពឹងថា នឹងប្រឈមជាមួយការប្រជាជនវ័យចំណាស់កើនឡើង ហើយនឹងមានការថយចុះនៃចំនួនប្រជាជនផងដែរ។
ដូចនេះ ការសិក្សានេះសន្មត់ថា ជប៉ុននឹងធ្វើការវិនិយោគលើបច្ចេកវិទ្យាកាន់តែច្រើនថែមទៀត ដើម្បីកាត់បន្ថយការប្រើប្រាស់កម្លាំងមនុស្ស។ បើគ្មានការវិនិយោគបែបនេះទេ តម្រូវការសម្រាប់កម្លាំងពលកម្មបរទេសនឹងកាន់តែរីកធំ ពោលគឺអាចនឹងហក់ឡើងរហូតដល់ ២១ លាននាក់ក្នុងឆ្នាំ ២០៤០។
យ៉ាងណាមិញ ការព្យាករណ៍ទាំងនេះ គឺផ្អែកលើការប៉ាន់ប្រមាណទាក់ទងនឹងអត្រាកំណើនសេដ្ឋកិច្ចនៅក្នុងប្រទេសជប៉ុន និងប្រទេសដទៃទៀត ហើយរបាយការណ៍នេះ ក៏នឹងត្រូវបានគេរំពឹងថានឹងប្រើជាឯកសារយោងសម្រាប់ការពិភាក្សានាពេលអនាគតអំពីគោលនយោបាយពលករបរទេសផងដែរ ខណៈការសិក្សារបស់ JICA បង្ហាញថា គោលនយោបាយហាមប្រាមអន្តោប្រវេសន៍របស់ប្រទេសជប៉ុនអាចបង្កការលំបាកក្នុងការទាក់ទាញពលករបរទេស និងចាប់ផ្តើមធ្វើឱ្យខូចដល់កំណើនសេដ្ឋកិច្ចរបស់ប្រទេស។
អត្ថបទគួរអាន
សូមជម្រាបថា កន្លងមកជប៉ុនបានជួបប្រទះនឹងការខ្វះខាតកម្លាំងពលកម្មយ៉ាងធ្ងន់ធ្ងរ ជាពិសេសក្នុងវិស័យ កសិកម្ម សំណង់ និងផលិតកម្ម ដូចនេះហើយទើបជប៉ុនបង្កើនកិច្ចខិតខំប្រឹងប្រែងទាក់ទាញកម្មករបរទេសបន្ថែមទៀត។ តាមគម្រោងសិក្សានេះ ប្រទេសវៀតណាមនឹងនៅតែជាប្រភពកម្លាំងពលកម្មដ៏ធំបំផុតសម្រាប់ប្រទេសជប៉ុន ដែលមានចំណែកដល់ទៅ ២៨% នៃពលករបរទេសទាំងអស់នៅឆ្នាំ ២០៤០ ខណៈប្រទេសផ្សេងទៀតដែលត្រូវបានគេរំពឹងថា នឹងបញ្ជូនពលករទៅប្រទេសជប៉ុនបន្ថែមទៀតរួមមាន មីយ៉ាន់ម៉ា កម្ពុជា បង់ក្លាដែស នេប៉ាល់ និងឥណ្ឌា។ ដោយឡែក ពលករដែលមកពីប្រទេសចិន និងថៃ អាចនឹងមានចំនួនតិចជាងមុន។
សូមបញ្ជាក់ថា គិតត្រឹមចុងខែតុលាឆ្នាំ២០២១ ជប៉ុនមានពលករបរទេសកំពុងបម្រើការនៅក្នុងប្រទេសខ្លួនជាង១លាន៧សែននាក់ ក្នុងនោះរួម ៣៥ម៉ឺននាក់ គឺជាពលករស្ថិតក្រោមកម្មវិធីបណ្ដុះបណ្ដាលដែលអនុម័តដោយរាជរដ្ឋាភិបាលជប៉ុន និងមាន២២ម៉ឺននាក់ទៀត គឺជាអ្នកធ្វើការក្រៅម៉ោង ដែលភាគច្រើនជានិស្សិតបរទេស៕
អត្ថបទ ស៊ើង និមល់
None
