ក្រៅពីសម្តែង និន្ចា ដែលជាចារបុរសជប៉ុនសម័យដើម មានយុទ្ធសិល្បិ៍ពិសេសផ្ទាល់ខ្លួន ស្ថានទូតជប៉ុនប្រចាំនៅកម្ពុជា បានជ្រើសរើសយកសិល្បៈសម្តែងវាយស្គរប្រពៃណីជប៉ុន និងការស្លៀកសម្លៀកបំពាក់ប្រពៃណីជប៉ុន ព្រមទាំងសិល្បៈជាច្រើនទៀត មកបង្ហាញក្នុងពិធីនេះផងដែរ។
ក្រៅពីសម្តែងសិល្បៈជាច្រើន ក៏មានការតាំងពិព័រណ៍ស្តង់ភ្នាក់ងារទេសចរណ៍ទាំងក្នុងស្រុក និងក្រុមហ៊ុនទេសចរណ៍ជប៉ុន ដើម្បីឲ្យអ្នកចូលរួមអាចសាកសួរព័ត៌មាននានាជុំវិញដំណើរកម្សាន្តទៅប្រទេសជប៉ុនទៀតផង។
ពិធីតាំងពិព័រណ៍នេះ មានគោលដៅលើកស្ទួយវប្បធម៌របស់ជប៉ុននៅក្នុងចំណោមពលរដ្ឋកម្ពុជា និងពង្រឹងទំនាក់ទំនងលើវិស័យទេសចរណ៍នៃប្រទេសទាំងពីរ។ ភ្ញៀវទេសចរកម្ពុជា បានសម្រុកទៅកម្សាន្តនៅប្រទេសជប៉ុនកាន់តែកើនឡើងច្រើននៅក្នុងប៉ុន្មានឆ្នាំចុងក្រោយនេះ។
តើអ្នកបានអានអត្ថបទនេះ ឬនៅ?
កាលពីឆ្នាំ២០១០ ប្រជាជនកម្ពុជាបានធ្វើដំណើរកម្សាន្តទៅប្រទេសជប៉ុន មានចំនួនត្រឹមតែ ៣ពាន់នាក់ប៉ុណ្ណោះ ខណៈនៅឆ្នាំ២០១៦កន្លងទៅ ភ្ញៀវទេសចរកម្ពុជាបានសម្រុកទៅលេងនៅប្រទេសជប៉ុនមានចំនួនរហូតដល់ ១ម៉ឺន២ពាន់នាក់ឯណោះ។
នេះបើតាមការបញ្ជាក់របស់ទីប្រឹក្សាស្ថានទូតជប៉ុនប្រចាំនៅកម្ពុជា លោក ហ៊ីរ៉ូណូរី ស៊ូហ្សឹគី។
មិនមែនតែពលរដ្ឋកម្ពុជាទេ ដែលទៅកម្សាន្តនៅប្រទេសជប៉ុននោះ ប៉ុន្តែ អ្នកទេសចរជប៉ុនបានមកកម្សាន្តនៅកម្ពុជាច្រើនជាងជនជាតិកម្ពុជាទៅលេងនៅជប៉ុនទៀតផង។ កាលពីឆ្នាំ២០១៦ ភ្ញៀវទេសចរជប៉ុនមកកម្សាន្តនៅកម្ពុជា មានចំនួនជាង ១៩ម៉ឺននាក់។
កំណើនអ្នកទេសចរជនជាតិជប៉ុន គឺបណ្តាលមកពីរដ្ឋាភិបាលទាំងពីរសម្រេចភ្ជាប់ជើងហោះហើរត្រង់ពីជប៉ុនមកកម្ពុជា។ ក្នុងនោះ កម្ពុជារំពឹងថា ភ្ញៀវជប៉ុននឹងមកកម្សាន្តនៅកម្ពុជាកើនឡើងរហូតដល់ ៣០ម៉ឺននាក់នៅឆ្នាំ២០២០។ នេះបើតាមការលើកឡើងរបស់ឯកឧត្តម ថោង ខុន រដ្ឋមន្រ្តីទេសចរណ៍នាពេលកន្លងមក។
សូមបញ្ជាក់ថា ៨ខែដើមឆ្នាំ២០១៧ កម្ពុជាទទួលបានភ្ញៀវទេសចរអន្តរជាតិ ចំនួនជាង ៣លាន៥សែននាក់ ហើយរំពឹងថា នឹងមានភ្ញៀវទេសចរអន្តរជាតិចំនួន៥លាន៤សែននាក់ ចូលមកកម្ពុជាក្នុងឆ្នាំ២០១៧ ដែលអាចបង្កើនប្រាក់ចំណូលប្រមាណ ៥ពាន់លានដុល្លារ និងបង្កើតការងារបានប្រមាណ ១លាននាក់៕
