រដ្ឋមន្ត្រីការបរទេសជប៉ុនលោក តូស៊ីមីស៊ុ ម៉ូតេជី (Toshimitsu Motegi) បានព្រមានថា៖ ប្រសិនបើស្ថានការណ៍នៅភូមាមិនមានភាពធូរស្រាល ឆ្លើយតបតាមការអំពាវនាវរបស់មជ្ឈដ្ឋានអន្តរជាតិនោះទេ រដ្ឋាភិបាលក្រុងតូក្យូអាចនឹងផ្តាច់ជំនួយអភិវឌ្ឍទាំងអស់ដល់ភូមាតែម្តង។ លោកបានសង្កត់ធ្ងន់ថា សូម្បីតែការវិនិយោគជប៉ុននៅភូមាក៏នឹងមិនអនុញ្ញាតឲ្យមានដែរ។
ត្រូវបានស្រង់សំដីដើមដោយកាសែតជប៉ុន និងត្រូវចុះផ្សាយបន្តដោយ Reuters លោកម៉ូតេជីបាននិយាយថា៖ «ប្រទេសជប៉ុនមិនចង់ធ្វើបែបនោះឡើយ ប៉ុន្តែបញ្ហានេះត្រូវតែបញ្ជាក់ឱ្យច្បាស់ថា វានឹងមានផលវិបាក ប្រសិនបើភូមានៅបន្តស្ថិតក្នុងស្ថានភាពបែបនោះ»។
គួរកត់សម្គាល់ថា ជប៉ុនជាប្រទេសម្ចាស់ជំនួយដ៏សំខាន់មួយរបស់ប្រទេសភូមា រីឯក្រុមហ៊ុនវិនិយោគជប៉ុនធំៗ បានពង្រីកអាជីវកម្មយ៉ាងគំហុកនៅភូមាក្នុងប៉ុន្មានឆ្នាំចុងក្រោយនេះ ដោយបានមើលឃើញថាភូមាជាទីផ្សារដ៏មានសក្តានុពលមួយនៅអាស៊ីអាគ្នេយ៍។
អត្ថបទទាក់ទង!
យ៉ាងណាក៏ដោយចុះ ការប្រកាសចង់ផ្តាច់ជំនួយដល់ភូមារបស់ជប៉ុនក្នុងពេលនេះ កំពុងក្លាយជាក្តីព្រួយបារម្ភ ថាភូមារិតតែបង្កើនចំណងទាក់ទងល្អនឹងប្រទេសចិនថែមទៀត គ្រាដែលចិនជារឿយៗត្រូវបានគេចោទប្រកាន់ថាបាននៅពីក្រោយរបបសឹកភូមា។
គួរបញ្ជាក់ដែរថា គិតចាប់តាំងពីមានបាតុកម្មប្រឆាំង យោធាដែលបានធ្វើរដ្ឋប្រហារនៅកាលពីខែកុម្ភៈរួចមកមាន មនុស្សជាង៨០០នាក់ហើយបានស្លាប់ដោយការបង្រ្កាបពីប៉ូលីស ខណៈដែរមនុស្ស៤ពាន់នាក់ទៀតកំពុងជាប់ឃុំ។ ចំណែកឯមេដឹកនាំស៊ីវិល មកពីគណបក្សលោកស្រីស៊ូជី ជាច្រើនបានភៀសខ្លួនទៅក្រៅប្រទេស និងអ្នកឯទៀត ដូចជាលោកស្រីស៊ូជីជាដើមត្រូវបានគេចាប់ និងឃុំខ្លួននៅក្នុងផ្ទះ។
អ្វីដែលគួរឲ្យចាប់អារម្មណ៍គឺនៅត្រង់ថា ប្រមុខយោធាភូមាបានចេញមកអះអាង កាលពីពេលថ្មីនេះថា លោកស្រី អ៊ុងសាន ស៊ូជី មានសុខភាពល្អធម្មតា ហើយនឹងត្រូវបង្ហាញខ្លួននៅតុលាការក្នុងរយៈពេលប៉ុន្មានថ្ងៃខាងមុខនេះ។
មកទល់ពេលនេះ មានរយៈពេលជិត ៤ខែហើយដែលលោកស្រី ស៊ូជី ត្រូវបានគេឃុំឃាំងនៅក្នុងផ្ទះ ឯក្រុងណៃពិដោ។ លោកស្រីមិនត្រូវបានគេអនុញ្ញាតឲ្យជួបនរណាម្នាក់បានឡើយ។ ចំណែកឯមេធាវីរបស់លោកស្រីវិញ អាចបានត្រឹមឃើញលោកស្រី តាមវីដេអូខុនហ្វេរិនស៍ នៅក្នុងអង្គសវនាការតុលាការតែប៉ុណ្ណោះ៕
None
