សារព័ត៌មាន BBC បានសរសេរថា លោក Joe Biden បានឈ្នះការបោះឆ្នោតដើម្បីក្លាយជាប្រធានាធិបតីសហរដ្ឋអាមេរិកហើយ ដោយបានយកឈ្នះលើលោក ដូណាល់ ត្រាំ បន្ទាប់ពីគេបានគណនាឃើញថា លោក Biden បានឈ្នះឆ្នោតនៅក្នុងរដ្ឋ Pennsylvania (ផិនស៊ីលវេនៀ) ដែលនាំឲ្យលោកមានសំឡេងគាំទ្រពីអង្គបោះឆ្នោតលើស ២៧០សំឡេង ដើម្បីដឹកនាំសេតវិមាន ។
ទូរទស្សន៍ CNN របស់អាមេរិក បានចុះផ្សាយមុននេះបន្តិចថា សហរដ្ឋអាមេរិកបានជ្រើសរើសបេក្ខជនមកពីគណបក្សប្រជាធិបតេយ្យ លោក Joe Biden ជាប្រធានាធិបតីទី៤៦របស់ខ្លួន ដោយយោងតាមការព្យាករលទ្ធផលឆ្នោតរបស់ទូរទស្សន៍នេះ ។
លោក Joe Biden ដែលនឹងឈានចូលវ័យ ៧៨ឆ្នាំ នៅដំណាច់ខែនេះ នឹងក្លាយជាប្រធានាធិបតីអាមេរិកដែលមានវ័យចាស់ជាងគេបំផុត នៅពេលដែលលោកស្បថចូលកាន់តំណែងប្រធានាធិបតី នៅខែមករា ឆ្នាំ២០២១ ខាងមុខនេះ ។
ដូចគ្នានេះដែរ ទូរទស្សន៍ធំមួយទៀតរបស់សហរដ្ឋអាមេរិក CNBC បានផ្សាយថា លោក Joe Biden គឺជាប្រធានាធិបតីជាប់ឆ្នោតរបស់សហរដ្ឋអាមេរិកហើយ ។
ទោះយ៉ាងណា ទន្ទឹមនឹងការប្រកាសជ័យជម្នះរបស់លោក Joe Biden ក៏មានសេចក្ដីរាយការណ៍ព័ត៌មានអំពីក្រុមអ្នករៀបចំយុទ្ធនាការបោះឆ្នោតរបស់លោក ដូណាល់ ត្រាំ បានដាក់ពាក្យបណ្ដឹងជាច្រើនប្រឆាំងនឹងលទ្ធផលនៃការរាប់សន្លឹកឆ្នោត ផងដែរ ៕
