ការវាយតម្លៃរបស់មន្ទីរបញ្ចកោណអាមេរិកនេះ គឺជាការកត់សម្គាល់ពីភាពបន្ទាន់មួយដែលបានបង្ហាញនៅក្នុងឯកសាររៀបចំផែនការ សម្រាប់កម្មវិធីរយៈពេលវែង គឺកម្មវិធីផ្ដួចផ្ដើមកំញើញនៅតំបន់ប៉ាស៊ីហ្វិកសហរដ្ឋអាមេរិក (US Pacific Deterrence Initiative_PDI) ដែលគេបានដាក់ឲ្យសភាធ្វើការអនុម័តកាលពីពាក់កណ្តាលខែមេសាកន្លងទៅនេះ។
ឯកសារនេះបានបង្ហាញថា គោលជំហរនិងសមត្ថភាពដឹកជញ្ជូនគ្រឿងភស្តុភារបច្ចុប្បន្ន ដើម្បីទ្រទ្រង់កងកម្លាំងអាមេរិកនៅក្នុងតំបន់អាស៊ី គឺមិនគ្រប់គ្រាន់ដល់ការគាំទ្រប្រតិបត្តិការ ជាពិសេសនៅក្នុងបរិយាកាសប្រកួតប្រជែងនោះទេ។
បន្ទាប់ពីគ្រឿងភស្តុភារត្រូវបានដឹកជញ្ជូនយកទៅទប់ទល់នឹងរុស្ស៊ីក្នុងពេលឈ្លានពានទៅលើអ៊ុយក្រែននោះ មន្ទីរបញ្ចកោណក៏បានព្យាយាមដាក់មេរៀននេះ ដើម្បីធ្វើការថ្លឹងថ្លែងសមត្ថភាពភស្ដុភារកម្មយោធារបស់ខ្លួននៅក្នុងតំបន់ឥណ្ឌូប៉ាស៊ីហ្វិកតែម្ដង។
អត្ថបទគួរអាន
កម្មវិធីផ្ដួចផ្ដើមកំញើញនៅតំបន់ប៉ាស៊ីហ្វិកសហរដ្ឋអាមេរិក PDI ត្រូវបានបង្កើតឡើងកាលពីឆ្នាំមុនដើម្បីធ្វើឱ្យប្រសើរឡើងនូវជំហរឥរិយាបថ និងការត្រៀមខ្លួនជាស្រេចរបស់យោធាអាមេរិកនៅក្នុងតំបន់ឥណ្ឌូប៉ាស៊ីហ្វិក។ កម្មវិធីនេះបានលៃទុកថវិកាដោយឡែក ដើម្បីឆ្លើយតបទៅនឹងការកើនឡើងនូវឥទ្ធិពលរបស់ចិននៅក្នុងតំបន់ឥណ្ឌូប៉ាស៊ីហ្វិក។
មន្ទីរបញ្ចកោណបានប៉ាន់ប្រមាណថា កម្មវិធី PDI នឹងត្រូវការថវិកាជាង ២៧ ពាន់លានដុល្លារក្នុងរយៈពេល ៥ ឆ្នាំដោយចាប់ផ្តើមពីឆ្នាំសារពើពន្ធ ២០២៣ ដែលចាប់ផ្តើមនៅក្នុងខែតុលាខាងមុខនេះ។ ចំនួនទឹកប្រាក់នេះ គឺប្រហែលច្រើនជាង ២០% ចំពោះអ្វីដែលបញ្ជាការដ្ឋានឥណ្ឌូប៉ាស៊ីហ្វិកបានស្នើសុំក្នុងខែកុម្ភៈ ឆ្នាំ២០២១សម្រាប់រយៈពេលដូចគ្នា។
មន្ទីរបញ្ចកោណបានស្នើសុំឱ្យចំណាយថវិកា ជាង១ពាន់លានដុល្លារលើវិស័យភស្ដុភារកម្មយោធាក្នុងរយៈពេល៥ឆ្នាំគិតចាប់ពីឆ្នាំសារពើពន្ធ២០២៣។ ភាពខុសគ្នានៃធាតុចំណាយនេះបានធ្វើឱ្យលំបាកដល់ការប្រៀបធៀបដោយផ្ទាល់ ប៉ុន្តែបញ្ជាការដ្ឋានឥណ្ឌូប៉ាស៊ីហ្វិកបានប៉ាន់ប្រមាណកាលពីមួយឆ្នាំមុនថា ថវិកា៤៩០លានដុល្លារ គឺត្រូវការជាចាំបាច់ ដើម្បីពង្រឹងសមត្ថភាពដឹកជញ្ជូនផ្នែកយោធាទៅក្នុងតំបន់នេះ។
ចំនួនគ្រាប់រំសេវ ប្រេងឥន្ធនៈ អាហារ និងការផ្គត់ផ្គង់ផ្នែកវេជ្ជសាស្ត្រដែលអាចស្តុកទុកនៅទីតាំងត្រៀមប្រយុទ្ធនៅមុនពេលមានជម្លោះផ្ទុះឡើងនោះនឹងមានសារៈសំខាន់សម្រាប់សមត្ថភាពរបស់អាមេរិកក្នុងការផ្គត់ផ្គង់កងកម្លាំងអាមេរិកឡើងវិញ។
ប្រសិនបើមានជម្លោះប្រដាប់អាវុធជាមួយប្រទេសចិនមែននោះ កងកម្លាំងចិនទំនងជានឹងមិនចង់ព្យាយាមចូលទៅដល់មូលដ្ឋានយោធាអាមេរិកឱ្យហួសពីអ្វីដែលគេហៅថាកោះខ្សែក្រវាត់ទីពីរនោះទេដែលវាលាតសន្ធឹងចាប់ពីកោះអូហ្កាសាវ៉ារ៉ា (Ogasawara) នៅប្រទេសជប៉ុនទៅដល់ដែនកោះហ្កាម (Guam) របស់សហរដ្ឋអាមេរិកព័ទ្ធទៅដល់ប្រទេសប៉ាពូញូវហ្គីនី (Papua New Guinea)។
មេបញ្ជាការកងម៉ារីនរបស់អាមេរិក លោក David Berger បាននិយាយក្នុងដំណើរទស្សនកិច្ចនៅប្រទេសអូស្ត្រាលីកាលពីខែមុនអំពីមេរៀនពីការឈ្លានពានរបស់រុស្ស៊ីលើអ៊ុយក្រែនថា ការដឹកជញ្ជូនគ្រឿងភស្តុភារគឺជាកត្តាកំណត់ និងជាកត្តាជំរុញឱ្យគេអាចបន្ដសមត្ថភាពធ្វើសង្គ្រាម និងវាយប្រហារឆ្លើយតបបានលឿនបំផុត៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
