លិខិតពីការិយាល័យអនុព័ន្ធយោធា នៃស្ថានឯកអគ្គរាជទូតកម្ពុជា ប្រចាំនៅរុស្ស៊ី ចុះថ្ងៃទី១៩ ខែមេសា ឆ្នាំ២០២០ ផ្ញើជូននាយកដ្ឋានទាក់ទងអន្តរជាតិ នៃក្រសួងការពារជាតិកម្ពុជា បានឲ្យដឹងថា សិក្ខាកាមយោធាខ្មែរ ០៣រូបនោះ បានឆ្លងជំងឺកូវីដ១៩ បន្ទាប់ពីបានទៅពិនិត្យសុខភាពនៅមន្ទីរពេទ្យក្រុងមួយ នៅរុស្ស៊ី ហើយក៏បានធ្វើតេស្តរកឃើញវិជ្ជមានវីរុសកូវីដ១៩។
បើយោងតាមលិខិតដដែល មូលហេតុនៃការឆ្លងនេះ គឺដោយសារមានការឆ្លងពីបណ្ដាសិក្ខាកាមយោធាបរទេសដទៃទៀត ដែលសិក្សាឆ្នាំជាមួយគ្នា និងស្នាក់នៅជាមួយគ្នា។
បច្ចុប្បន្ន សិក្ខាកាមយោធាខ្មែរទាំង ៣រូប ត្រូវបញ្ជូនទៅមន្ទីរពេទ្យព្យាបាលជំងឺកូវីដ១៩ និងកំពុងស្ថិតក្រោមការតាមដានសុខភាព។ បើយោងតាមប្រធានក្រុមប្រចាំសាលាផ្ទាល់ ស្ថានភាពជំងឺរបស់សិក្ខាកាមខ្មែរ ទាំង ៣រូបនេះ នៅមិនទាន់មានសភាពធ្ងន់ធ្ងរនៅឡើយទេ ពីព្រោះពួកគាត់បានទៅរាយការណ៍សុខភាព និងពិនិត្យសុខភាព ទាន់ពេល។
អត្ថបទទាក់ទង
សហព័ន្ធរុស្ស៊ី ក៏កំពុងរងការវាយប្រហារយ៉ាងខ្លាំងពីការឆ្លងរាតត្បាតនៃវីរុសកូវីដ១៩ ផងដែរ។ តួលេខផ្លូវការ ដកស្រង់ផ្សាយដោយសារព័ត៌មាន ស៊ិនហួ របស់ចិន បានបង្ហាញថា គិតត្រឹមថ្ងៃទី១៨ ខែមេសា ឆ្នាំ២០២០ រុស្ស៊ីមានករណីឆ្លងវីរុសកូវីដ១៩ សរុបចំនួន ៣៦.៧៩៣ ក្នុងនោះជាសះស្បើយបានជាង ៣០០០នាក់ និងស្លាប់ ៣១៣នាក់។
គួរបញ្ជាក់ថា សិក្ខាកាមយោធាខ្មែរ ទាំង ៣រូបនេះ កំពុងសិក្សាឆ្នាំទី៣ ជំនាញវេជ្ជសាស្ត្រទូទៅ នៅសាកលវិទ្យាល័យ វេជ្ជសាស្ត្រយោធា ទីក្រុងសេនភីតថើស្បឺក (Saint Petersburg) នៅសហព័ន្ធ រុស្ស៊ី៕
