ប្រទេសលីទុយអានីដែលរដ្ឋមួយស្ថិតក្នុងសមាជិកសហភាពអឹរ៉ុប និងជាសមាជិកអង្គការណាតូផងនោះ បានបិទផ្លូវសម្រាប់ការដឹកជញ្ជូនទំនិញតាមផ្លូវដែក ដូចជាដែកថែប និងលោហធាតុផ្សេងទៀតទៅកាន់តំបន់ កាលីនីងរ៉ាដ របស់រុស្ស៊ី ដោយប្រទេសលីទុយអានីអះអាងថា ខ្លួនធ្វើនេះ គឺទៅតាមច្បាប់ដាក់ទណ្ឌកម្មរបស់សហភាពអឺរ៉ុប ដែលបានចូលជាធរមានកាលពីចុងសប្ដាហ៍មុននេះ។ ចំណាត់របស់ប្រទេសលីទុយអានីបែបនេះ បានបង្កឲ្យមានការខឹងសម្បារយ៉ាងខ្លាំងពីរុស្ស៊ី ដោយមន្ត្រីជាន់ខ្ពស់រុស្ស៊ីបានចេញមុខមកគំរាមកំហែងតបវិញដែរថា ប្រទេសនេះនឹងរងផលប៉ះពាល់អវិជ្ជមានធ្ងន់ធ្ងរ នាពេលខាងមុខ ចំពោះទង្វើដែលបានធ្វើដាក់រុស្ស៊ីបែបនេះ។
ស្របពេលដែលមានការគំរាមកំហែង ពីទីក្រុងម៉ូស្គូខ្លាំងៗយ៉ាងដូច្នេះ ប្រជាពលរដ្ឋលីទុយអានី បានសម្ដែងការព្រួយបារម្ភយ៉ាងខ្លាំង ប៉ុន្ដែ ពួកគេនៅតែមានជំនឿទៅលើជំនួយពីអង្គការណាតូ ប្រសិនបើរុស្ស៊ីហ៊ានតែបង្កជម្លោះជាមួយនឹងខ្លួនមែននោះ។ មួយវិញទៀត ប្រទេសលីទុយអានី ក៏ជាសមាជិកសហភាពអឺរ៉ុបដែរ ដូច្នេះ គេមិនជឿថា រុស្ស៊ីហ៊ានបង្កជម្លោះ ឬឈានដល់ការប្រើកម្លាំងយោធាមកលើលីទុយអានីនោះទេ។ នេះបើតាមការបញ្ជាក់ពីក្រុមប្រជាពលរដ្ឋលីទុយអានី ដែលបានប្រាប់សារព័ត៌មានរ៉យទ័រ។
តំបន់ កាលីនីងរ៉ាដ ដែលពីមុនជាកំពង់ផែនៅទីក្រុងកូនីកស្ប៊ើក (Koenigsberg) ជារដ្ឋធានីរបស់រដ្ឋព្រូស៊ីខាងកើតនោះ ត្រូវបានកងទ័ពក្រហមរបស់រុស្ស៊ីដណ្ដើមគ្រប់គ្រងបានពីក្រុមណាស៊ីអាល្លឺម៉ង់នៅខែមេសា ឆ្នាំ១៩៤៥ ហើយបានប្រគល់ទៅឱ្យសហភាពសូវៀតបន្ទាប់ពីសង្គ្រាមលោកលើកទី២។ តំបន់នេះ ត្រូវបានហ៊ុមព័ទ្ធដោយសមាជិកណាតូ ប៉ូឡូញ និងលីទុយអានីផងដែរ។
អត្ថបទគួរអាន
បន្ទាប់ពីរុស្ស៊ីបានឈ្លានពានអ៊ុយក្រែន សហរដ្ឋអាមេរិកនិងសម្ព័ន្ធមិត្តរបស់ខ្លួនបានដាក់ទណ្ឌកម្មដ៏តឹងរ៉ឹងបំផុតមួយចំនួននៅក្នុងប្រវត្តិសាស្ត្រដ៏ទំនើបនេះ ជាជំហានមួយដែលវិមានក្រឹមឡាំងរបស់រុស្ស៊ីបានចាត់ទុកថា ជាការប្រកាសសង្គ្រាមសេដ្ឋកិច្ច។
ប្រជាពលរដ្ឋផ្សេងទៀតនៅក្នុងទីក្រុងព្រំដែនដែលមានប្រជាជនរស់នៅជិត ៦ ពាន់នាក់បាននិយាយថា ការគំរាមកំហែងពីប្រទេសរុស្ស៊ីបានគ្របដណ្ដប់លើបញ្ហាផ្សេងទៀតដូចជាអតិផរណាខ្ពស់ ដែលប្រជាជនលីទុយអានីជាច្រើនត្រូវចំណាយកាន់តែច្រើនផងដែរ។
សូមបញ្ជាក់ថា ប្រទេសលីទុយអានីនេះ ជាប្រទេសតូចមួយនៅក្នុងតំបន់អឺរ៉ុប ដែលមានជាជនប្រហែលតែ៣លាននាក់ប៉ុណ្ណោះ ប៉ុន្ដែ ប្រទេសនេះ កន្លងមក គឺហាក់ដើរពើងទ្រូងខ្លាំងមែនទែន ជាមួយរុស្ស៊ី និងចិន។ តួយ៉ាង ប្រទេសនេះ ក៏ជាប្រទេសអឺរ៉ុបដំបូងគេ ដែលបានប្រកាសឈប់ទិញប្រេងពីរុស្ស៊ី ក្រោយពេលរុស្ស៊ីធ្វើសង្គ្រាមឈ្លានពានចូលអ៊ុយក្រែន ខណៈដែលកន្លងមក ប្រទេសលីទុយអានី ក៏ជម្លោះផ្នែកពាណិជ្ជកម្មជាមួយចិនផងដែរ ក្រោយប្រទេសនេះ បានអនុញ្ញាតឲ្យតៃវ៉ាន់បើកការិយាល័យតំណាងនៅលើទឹកដីរបស់ខ្លួន៕
None
