វៀតណាមរំពឹងចំណូលពីការនាំចេញវិស័យកាត់ដេរនៅឆ្នាំ២០២១ស្មើត្រឹមចំណូលឆ្នាំ២០១៩

កាលពីឆ្នាំ ២០២០ ដោយសារតែផលប៉ះពាល់នៃការរីករាលដាលកូវីដ-១៩, ភាពតានតឹងផ្នែកពាណិជ្ជកម្មរវាងអាមេរិក និងចិន, ពាណិជ្ជកម្មការពារនិយម និងការចាកចេញរបស់អង់គ្លេសពីសហភាពអឺរ៉ុប បានធ្វើឲ្យ ការនាំចេញផលិតផលកាត់ដេរ វាយនភណ្ឌវៀតណាម សម្រេចបានទំហំទឹកប្រាក់ត្រឹមតែ ៣៥ ពាន់លានដុល្លារអាមេរិកប៉ុណ្ណោះ។

នៅក្នុងឆ្នាំ២០២០ វៀតណាម គឺជាប្រទេសតែមួយគត់ ក្នុងចំណោមកំពូលប្រទេសអ្នកនាំចេញផលិតផលកាត់ដេរ វាយនភណ្ឌ ទាំង៥ របស់ពិភពលោក ដែលមិនបានកាត់បន្ថយផលិតកម្ម នៅអំឡុងពេលមានវិបត្តិកូវីដ-១៩។

ប្រធានសម្ព័ន្ធវាយនភណ្ឌ និងកាត់ដេរជាតិរបស់វៀតណាម បានស្នើរដ្ឋាភិបាលកាត់បន្ថយអត្រាការប្រាក់រយៈពេលវែង ដោយលោកបានបញ្ជាក់ថា ក្រុមហ៊ុនវាយនភណ្ឌកាត់ដេរ ពិបាកនឹងទទួលបានប្រាក់កម្ចី បន្ទាប់ពីប្រសិទ្ធភាពអាជីវកម្មមានការធ្លាក់ចុះទាបក្នុងរយៈពេល១ឆ្នាំមកនេះ។ អ្នកជំនាញ បានលើកឡើងថា សហគ្រាសសង្ឃឹមនឹងទទួលបានគោលនយោបាយជាក់លាក់ពីរដ្ឋាភិបាល ដើម្បីជួយគាំទ្រដល់ឧស្សាហកម្មក្នុងវិស័យនេះ។

ក្រោមការគ្រប់គ្រងរបស់រដ្ឋាភិបាលវៀតណាម វិស័យវាយនភណ្ឌ និងកាត់ដេរ ត្រូវបានកាត់បន្ថយថ្លៃដើមមិនមែនផលិតកម្ម ជាពិសេសសេវាកម្មដឹកជញ្ជូនតាមរយៈបណ្ដាញភស្ដុភារជាតិ និងថ្លៃមិនមែនពន្ធគយផ្សេងៗទៀត៕