វិនិយោគគិននៅម៉ាឡេស៊ីកំពុងបង្កើនការយកចិត្តទុកដាក់ ក្រោយតម្លៃលុយរីងហ្គីតធ្លាក់ចុះដល់កម្រិតទាបបំផុតនៅក្នុងរយៈពេល២៦ឆ្នាំ

សារព័ត៌មានបរទេសបានរាយការណ៍ថា ធុរកិច្ចម៉ាឡេស៊ី កំពុងប្រឈមមុខនឹងការបង់ខាត ដោយសារតែការធ្លាក់ចុះតម្លៃរូបិយប័ណ្ណរីងហ្គីត ហើយបញ្ហានេះកំពុងធ្វើឱ្យការនាំចូលទំនិញ និងសេវាកម្មនានាជួបបញ្ហា។ ក្រោយពេលដែលលុយ រីងហ្គីត ហើមឡើងដល់កម្រិតអាក្រក់បំផុតក្នុងរយៈពេល២៦ឆ្នាំ ចង់ ឬមិនចង់វានឹងធ្វើឱ្យឧស្សាហកម្មនានាជាពិសេសគឺសេវាកម្មក្រុមហ៊ុនអាកាសចរណ៍ ដែលពឹងផ្អែកខ្លាំងលើការនាំចូលវត្ថុធាតុដើមគិតជារូបិយប័ណ្ណបរទេស ជួបហានិភ័យខ្ពស់។

ស្ថិតនៅក្នុងស្ថានភាពនេះ លោក អានវ៉ា អ៊ីប្រាហ៊ីម (Anwar Ibrahim) នាយករដ្ឋមន្ត្រីម៉ាឡេស៊ី បាននិយាយថា ប្រាក់រីងហ្គីត បានធ្លាក់ចុះដល់កម្រិតទាបបំផុតចាប់តាំងពីមានវិបត្តិហិរញ្ញវត្ថុអាស៊ី នៅចុងទសវត្សរ៍ឆ្នាំ១៩៩០ ហើយរដ្ឋាភិបាលបានចាត់ឱ្យធនាគារកណ្តាលត្រួតពិនិត្យបញ្ហារូបិយប័ណ្ណនេះយ៉ាងដិតដល់។ រូបិយប័ណ្ណក្នុងស្រុកកាលពីសប្តាហ៍មុនបានហើមដល់ទៅ៤,៨រីងហ្គីត ក្នុង១ដុល្លារ ដែលជាកម្រិតថោកបំផុតចាប់តាំងពីខែមករា ឆ្នាំ១៩៩៨ ក្នុងអំឡុងពេលមានវិបត្តិហិរញ្ញវត្ថុអាស៊ីកើនឡើង។

លោក ហ្សាវីយេ ជេន ( Xavier Jean ) នាយកជាន់ខ្ពស់របស់ក្រុមហ៊ុន S&P បាននិយាយថា "វិស័យអាកាសចរណ៍អាចប្រឈមមុខនឹងហានិភ័យច្រើនបំផុត ដោយសារតែភាពមិនស៊ីគ្នានៃរូបិយប័ណ្ណនៅក្នុងប្រតិបត្តិការ។ ក្រុមហ៊ុនមានប្រតិបត្តិការចំណាយផ្សេងៗរួមទាំងប្រេងឥន្ធនៈ និងជួលយន្តហោះជាប្រាក់ដុល្លារ តែប្រាក់ចំណូលវិញ គឺគិតជា រីងហ្គីត។ លោកបានបន្តថា សូម្បីតែបំណុល ក៏ត្រូវបានគេកំណត់ជាដុល្លារដែរ ដូច្នេះក្រុមហ៊ុនទាំងនេះនឹងរងនូវការប៉ះទង្គិចទ្វេដង៕

ដោយៈ សរ សុជាតិ