យ៉ាងណាក៏ដោយ ការដំឡើងប្រាក់ឈ្នួលជូនកម្មកររហូតដល់៣៥%នេះ ទោះបីបានជួយគាំទ្រដល់ពលរដ្ឋ ប៉ុន្តែមានមួយផ្នែកកំពុងបង្កក្តីបារម្ភដល់សេដ្ឋកិច្ចផងដែរ ដ្បិត អ្នកជំនាញសេដ្ឋកិច្ចមើលឃើញថា ការដំឡើងប្រាក់ឈ្នួលកាន់តែច្រើនភ្លាមៗ អាចប៉ះពាល់ដល់ប្រាក់ចំណេញក្នុងវិស័យឯកជន និងប៉ះពាល់ដល់ការវិនិយោគ ដែលនៅចុងក្រោយសេដ្ឋកិច្ចរបស់ម៉ាឡេស៊ីនឹងងើបយឺតចេញពីវិបត្តិជំងឺរាតត្បាត ។ នេះបើតាមការចុះផ្សាយរបស់សារព័ត៌មានជប៉ុន Nikkei។
បើមើលទៅលើឧស្សាហកម្មម៉ាឡេស៊ី ដែលភាគច្រើននៅតែកំពុងដើរអូសជើងនៅឡើយ ការកែសម្រួលប្រាក់ឈ្នួលចុងក្រោយបង្អស់របស់រដ្ឋាភិបាលក្រុងកូឡាឡាំពួរ ជាផលប៉ះពាល់ និងជាការរំខានមួយភ្លាមៗ។
ប្រធានសហព័ន្ធនិយោជកម៉ាឡេស៊ី លោក ហ៊ូសេន ហ៊ូស្មាន់ (Hussain Husman) បានប្រាប់ Nikkei ក្នុងបទសម្ភាសន៍កាលពីពេលថ្មីៗនេះថា៖ សហព័ន្ធនិយោជក យល់ឃើញថា ការដំឡើងអត្រាប្រាក់ឈ្នួលអប្បបរមាលើកនេះ មានទំហំច្រើន និងភ្លាមៗពេក។ វានឹងបន្ថែមបញ្ហាប្រឈម ដែលនិយោជកក្នុងវិស័យឯកជនកំពុងជួបប្រទះ។ លើសពីនេះទៀត ប្រាក់ឈ្នួលអប្បបរមាខ្ពស់ពេក អាចនឹងរំខានដល់សេដ្ឋកិច្ច ដែលបច្ចុប្បន្នកំពុងព្យាយាមងើបឡើងវិញ។
ក្រៅពីតែពីផលប៉ះពាល់នៃវិធានកូវីដ១៩ក្នុងសង្គម ប្រធានសហព័ន្ធរូបនេះ បានកត់សម្គាល់ថា អាជីវកម្មម៉ាឡេស៊ីមួយចំនួនក៏កំពុងព្យាយាម ងើបចេញពីការខូចខាតនៃគ្រោះធម្មជាតិដែរ។ ព្យុះទីហ្វុង រ៉ៃ ដែលបានបោកបក់លើប្រទេសហ្វីលីពីន និងម៉ាឡេស៊ី កាលពីខែធ្នូឆ្នាំទៅមិញ បានបង្កជាទឹកជំនន់ដ៏ធ្ងន់ធ្ងរនៅក្នុងប្រទេសម៉ាឡេស៊ី ប៉ះពាល់ដល់រដ្ឋចំនួនប្រាំបី រួមទាំងទីក្រុងគូឡាឡាំពួ និងសេឡង់ហ្គ័រ (Selangor) ដោយបានឆក់យកជីវិតមនុស្ស ៥៥នាក់ និងមនុស្សជិត ១០ម៉ឺននាក់ត្រូវជម្លៀសចេញពីផ្ទះសម្បែង។
អ្នកជំនាញផ្សេងទៀតនិយាយថា ពួកគេមើលឃើញថា មានហេតុផលនយោបាយនៅពីក្រោយការសម្រេចចិត្តដំឡើងប្រាក់ឈ្នួលអប្បបរមានេះ។ ជាក់ស្តែង រដ្ឋាភិបាលដែលដឹកនាំដោយនាយករដ្ឋមន្ត្រី អ៊ីស្មេល សាប្រ៊ីយ៉ាកុប (Ismail Sabri Yaakob) សម្លឹងមើលលទ្ធភាពរៀបចំការបោះឆ្នោតសកលនៅចុងឆ្នាំនេះហើយ ដូច្នេះ រដ្ឋាភិបាលកំពុងខិតខំទាញយកប្រជាប្រិយភាព។
ទោះជាយ៉ាងណាក៏ដោយ រដ្ឋាភិបាលម៉ាឡេស៊ី មិនចាត់ទុក ការដំឡើងប្រាក់ឈ្នួលនេះ វាជាការស្រូបទាញសន្លឹកឆ្នោតនោះទេ ដោយបានអះអាងថា ខ្លួនចង់ដំឡើងប្រាក់ឈ្នួលអប្បបរមាដើម្បីឱ្យប្រជាជនម៉ាឡេស៊ីមានជំហរងើបឡើងវិញពីវិបត្តិជំងឺរាតត្បាត។
អត្ថបទគួរអាន
រដ្ឋមន្ត្រីក្រសួងធនធានមនុស្សម៉ាឡេស៊ី លោក សារាវ៉ាណាន ម៉ូរូហ្កាន(Saravanan Murugan) បានប្រាប់ Nikkei ថា ការដំឡើងប្រាក់ឈ្នួលអប្បបរមាដល់ចំនួន ១ ៥០០ រីងហ្គីតឬស្មើនឹងប្រមាណ ៣៤៤ដុល្លារនេះ គឺត្រូវធ្វើឲ្យទាន់ពេលវេលា ហើយក្រុមហ៊ុនឯកជនគួរតែដឹងស្រាប់ហើយថា ដូចមានចែងក្នុងច្បាប់ នឹងមានការដំឡើង ត្រួតពិនិត្យកម្រិតប្រាក់ខែឡើងវិញ យ៉ាងហោចណាស់ពីរឆ្នាំម្តង។
រដ្ឋមន្ត្រីរូបនេះបន្ថែមថា ការដំឡើងប្រាក់ឈ្នួល៣៥% ធ្វើឡើងបន្ទាប់ពីកត្តាមួយចំនួនត្រូវបានគេពិចារណា ក្នុងនោះរួមមាន កំណើនបន្ទាត់ភាពក្រីក្រ និងអត្រាអតិផរណាបច្ចុប្បន្ន។ គួរជម្រាបថា មុននឹងសម្រេចដំឡើងប្រាក់ឈ្នួលដូចបច្ចុប្បន្ន ប្រាក់ឈ្នួលអប្បបរមានៅម៉ាឡេស៊ី បានធ្លាក់ចុះជាបន្តបន្ទាប់អំឡុងពេលជំងឺរាតត្បាតកូវីដ១៩ខ្លាំង។
មែនទែនទៅ ប្រទេសម៉ាស៊ីឡេស៊ី គឺមានកំណើនប្រាក់ឈ្នួលយឺតជាងគេ នៅក្នុងចំណោមប្រទេសតំបន់អាស៊ីផ្សេងទៀត នៅក្នុងរយៈពេល១០ចុងក្រោយនេះ។ ក្នុងរយៈពេល១ទសវត្សរ៍មកនេះ ប្រាក់ឈ្នួលជាមធ្យមនៅតាមរោងចក្រផលិតទំនិញបន្តទៅឲ្យក្រុមហ៊ុនជប៉ុន គឺមានកំណើនយឺតមែនទែននៅក្នុងប្រទេសម៉ាឡេស៊ី ធៀបនឹងប្រទសដដៃទៀតនៅក្នុងតំបន់អាស៊ីអាគ្នេយ៍។ នេះ គឺជាផ្នែកមួយ ដោយសារតែប្រាក់ឈ្នួលនៅក្នុងប្រទេសម៉ាឡេស៊ី គឺមានកម្រិតខ្ពស់រួចហើយទៅ ធៀបនឹងប្រទេសដែលកំពុងមានសេដ្ឋកិច្ចរីកចម្រើនដូចជាប្រទេសវៀតណាមជាដើម។
បើមើលទៅលើទិន្នន័យដែលរៀបចំដោយសារព័ត៌មាន Nikkei បង្ហាញឲ្យឃើញថា នៅក្នុងរយៈពេលចាប់ពីឆ្នាំ២០១១ ដល់ឆ្នាំ២០២១ ក្នុងចំណោមប្រទេសមានប្រាក់ចំណូលមធ្យមកម្រិតទាប គឺប្រទេសកម្ពុជា មានកំណើននៃការដំឡើងប្រាក់ឈ្នួលអតិប្បបរមាសម្រាប់កម្មករខ្ពស់ជាងគេបង្អស់ ពោលគឺមានកំណើនប្រមាណ១៧០%។ បន្ទាប់ពីនេះ គឺប្រទេសមីយ៉ាន់ម៉ា វៀតណាម ឥណ្ឌូនេស៊ី និងឡាវជាដើម៕
None
