មន្រ្តីរំពឹងផែនការ“បង្កើនប្រាំ” នឹងដោះរបាំងរាំងស្ទះដល់ការធ្វើដំណើររបស់ភ្ញៀវទេសចរ

ឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានគូសបញ្ជាក់ប្រាប់សារព័ត៌មានខេមបូណូមីសថា រដ្ឋមន្រ្តីក្រសួងទេសចរណ៍ បានរៀបចំគំនិតផ្ដួចផ្ដើមមួយចំនួន ដើម្បីធ្វើការជាមួយក្រសួងពាក់ព័ន្ធ និងវិស័យឯកជនក្នុងបំណងធ្វើឱ្យវិស័យទេសចរណ៍កម្ពុជា មានស្ថានភាពកាន់តែល្អប្រសើរ។ គំនិតផ្ដួចផ្ដើមរបស់រដ្ឋមន្រ្តីក្រសួងទេសចរណ៍ ត្រូវបានហៅថា គំនិតបង្កើនប្រាំ ដែលរួមមាន៖ទី១-បង្កើនប្រសិទ្ធភាពនៃការគ្រប់គ្រងកិត្តិនាមរបស់កម្ពុជា, ទី២-បង្កើនប្រសិទ្ធភាពនៃការផ្សព្វផ្សាយទាក់ទាញទេសចរទៅកាន់ទីផ្សារទេសចរធំៗ, ទី៣-បង្កើនប្រសិទ្ធភាពនៃការគ្រប់គ្រង សម្រួលដល់ការធ្វើដំណើររបស់អ្នកទេសចរដោយរលូន និងកុំឱ្យមានរបាំងរាំងស្ទះ ដែលជាការជំរុញដល់អ្នកទេសចរឱ្យទទួលបានភាពកក់ក្ដៅ, ទី៤-បង្កើនប្រសិទ្ធភាពនៃផលិតផលទេសចរណ៍ តាមរយៈការបង្កើនផលិតផលឱ្យមានគុណភាពប្រសើរ ព្រមទាំងការបង្កើតផលិតផលបន្ថែមទៀត ដើម្បីឆ្លើយតបនឹងនិន្នាការទីផ្សារ និងទី៥ បង្កើនប្រសិទ្ធភាពនៃការអភិវឌ្ឍធនធាន ដើម្បីទាក់ទាញទេសចរឱ្យមានភាពប្រគួតប្រជែងទាំងនៅក្នុងតំបន់ និងលើសកលលោក។

ទាក់ទងនឹងបញ្ហានេះ លោក ហូ វណ្ឌី ទីប្រឹក្សាសមាគមទេសចរណ៍កម្ពុជា បានទទួចដល់ថ្នាក់ដឹកនាំឱ្យគិតគូពីបញ្ហាទិដ្ឋាការ និងសណ្តាប់សាធារណៈ ព្រមទាំងកែលម្អចំណុចមួយចំនួនទៀត ដែលជារបាំងរាំងស្ទះ និងបង្អាក់ដំណើររបស់អ្នកទេសចរ ដែលមានបំណងចូលមកលេងនៅកម្ពុជា ហើយប្រសិនបើការអនុវត្តបានល្អនឹងធ្វើឱ្យស្ថានភាពទេសចរវិលមករកភាពល្អប្រសើរឡើងវិញ។

មន្ត្រីជាន់ខ្ពស់នៃក្រសួងទេសចរណ៍បានចាត់ទុកស្ថានភាពទេសចរនៅកម្ពុជាបច្ចុប្បន្ន កំពុងស្ថិតក្នុងដំណាក់កាលងើបឡើងវិញជាបណ្ដើរៗ ជាមួយក្តីរំពឹងថា ចាប់ពីអំឡុងខែតុលា-វិច្ឆិកា និងខែធ្នូ ឆ្នាំ២០២៣ ដែលជារដូវទេសចរច្រើន នឹងធ្វើឱ្យស្ថានភាពទេសចរកាន់តែប្រសើរឡើងបន្ថែមទៀត៕

អត្ថបទ ៖ បូ ដូឡា​