មន្ត្រីជាន់ខ្ពស់ដដែលរូបនេះអះអាងថា ប្រសិនបើពុំមានការដោះស្រាយ ឬការដោះស្រាយមានការពន្យារពេលយូរ វាអាចជះឥទ្ធិពលអវិជ្ជមានដល់ការទាក់ទាញការវិនិយោគ និងសេដ្ឋកិច្ចរបស់ខេត្តជាប់មាត់សមុទ្រមួយនេះ។ ជាពិសេស វាអាចធ្វើឲ្យប៉ះពាល់ដល់ផែនការរបស់រាជរដ្ឋាភិបាល ដែលចង់អភិវឌ្ឍព្រះសីហនុ ក្លាយជាតំបន់សេដ្ឋកិច្ចពិសេសពហុបំណងផងដែរ។ កន្លងមករដ្ឋបាលខេត្តនេះបានជួយជាមួយប្រជាពលរដ្ឋដែលជាម្ចាស់ដី និងក្រុមអ្នកអភិវឌ្ឍន៍អគារទាំងនោះមួយចំនួនរួចមកហើយដែរ ដើម្បីស្វែងរកធាតុចូលក្នុងការដោះស្រាយបញ្ហានេះ។
ឯកឧត្តម ឡុង ឌីម៉ង់ អភិបាលរងខេត្តព្រះសីហនុបានបញ្ជាក់ប្រាប់ខេមបូណូមីសថា បច្ចុប្បន្នខេត្តព្រះសីហនុមានសំណង់អគារចំនួន ១,១៥០អគារ ដែលកំពុងជាប់គាំងការសាងសង់ ហើយវាបាននិងកំពុងក្លាយជារូបភាពអវិជ្ជមានក្នុងការជំរុញកំណើនសេដ្ឋកិច្ចរបស់ខេត្តដែលជាច្រកសេដ្ឋកិច្ចពាណិជ្ជកម្ម ដ៏សំខាន់មួយនេះ។ ទោះយ៉ាងណា ឯកឧត្តម អះអាងថា រដ្ឋបាលខេត្តកំពុងខិតខំធ្វើការយ៉ាងសស្រាក់សស្រាំជាមួយក្រសួងសេដ្ឋកិច្ច និងហិរញ្ញវត្ថុ និងភាគីពាក់ព័ន្ធនានា ដើម្បីដោះស្រាយបញ្ហាអគារជាប់គាំងទាំងនេះ ខណៈការដោះស្រាយកំពុងស្ថិតក្នុងដំណើរការ។
មន្ត្រីជាន់ខ្ពស់រូបនេះសង្កត់ធ្ងន់ថា ប្រសិនបើបញ្ហានេះបន្តជាប់គាំង ឬការដោះស្រាយមានការអូសបន្លាយពេលយូរ វាអាចធ្វើឲ្យប៉ះពាល់ដល់ការទាក់ទាញការវិនិយោគ ការអភិវឌ្ឍសេដ្ឋកិច្ច និងផែនការមេរបស់រាជរដ្ឋាភិបាល ដែលចង់អភិវឌ្ឍន៍ខេត្តជាប់មាត់សមុទ្រនេះឲ្យក្លាយជាតំបន់សេដ្ឋកិច្ចពិសេសពហុបំណង។ បន្ថែមលើនេះ វាក៏អាចធ្វើឲ្យប៉ះពាល់ដល់ទ្រព្យសម្បត្តិសាធារណៈ និងឯកជនផងដែរ ក្នុងករណីមានឧបទ្ទវហេតុណាមួយកើតឡើងដោយសារអគារជាប់គាំងទាំងនេះ។
អត្ថបទគួរអាន
ពាក់ព័ន្ធបញ្ហាអគារជាប់គាំងនៅខេត្តព្រះសីហនុនេះដែរ ឯកឧត្តម មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថបានគូសបញ្ជាក់ថា ក្រសួងសេដ្ឋកិច្ច និងហិរញ្ញវត្ថុកំពុងធ្វើការងារលើបញ្ហានេះ តាមរយៈការចាត់ឲ្យក្រុមជំនាញចម្រុះរវាងក្រសួងសេដ្ឋកិច្ច និងរដ្ឋបាលខេត្តព្រះសីហនុ ចុះត្រួតពិនិត្យ និងវាយតម្លៃពីស្ថានភាពនៃអគារជាប់គាំងទាំងនោះ។ ឯកឧត្តម ជឿជាក់ថា បញ្ហាអគារជាប់គាំងនៅខេត្តព្រះសីនុ នឹងត្រូវដោះស្រាយរួចរាល់ មុនការដាក់ចេញនូវផែនការមេអភិវឌ្ឍន៍ខេត្តព្រះសីហនុឲ្យក្លាយជាតំបន់សេដ្ឋកិច្ចពិសេសពហុបំណង។ កត្តានេះ ធ្វើឲ្យឯកឧត្តមមានជំនឿចិត្តថា បញ្ហាអគារជាប់គាំងនេះនឹងមិនអាចជះឥទ្ធិពលធ្ងន់ធ្ងរដល់ការប្រែក្លាយខេត្តជាប់មាត់សមុទ្រនេះឲ្យក្លាយជាតំបន់សេដ្ឋកិច្ចពិសេសពហុបំណងនោះទេ។
បើតាមការគូសបញ្ជាក់របស់ឯកឧត្តម ឡុង ឌីម៉ង់ កន្លងមកក្រុមការងារជំនាញរបស់រដ្ឋបាលខេត្តព្រះសីហនុបានជួបពិភាក្សាជាមួយប្រជាពលរដ្ឋដែលជាម្ចាស់ដីនិងក្រុមហ៊ុនអភិវឌ្ឍន៍អគារមួយចំនួនរួមទាំងអ្នកជំនាញក្នុងវិស័យអចលនទ្រព្យ ដើម្បីស្វែងរកធាតុចូលក្នុងការដោះស្រាយបញ្ហាអគារជាប់គាំងនៅខេត្តព្រះសីហនុនេះ។ ទន្ទឹមនឹងនេះ រដ្ឋបាលខេត្តព្រះសីហនុ ក៏បានដាក់សំណើរមកក្រសួងសេដ្ឋកិច្ច ដើម្បីគោលការណ៍លើកទឹកចិត្ត និងយន្តការជាក់លាក់ណាមួយក្នុងការដោះស្រាយបញ្ហានេះផងដែរ។
គួរបញ្ជាក់ផងដែរថា អគារជាង១ពាន់កន្លែងនៅខេត្តព្រះសីហនុ ត្រូវបានជាប់គាំងការសាងសង់មកទល់បច្ចុប្បន្ន នេះ គឺដោយសារអ្នកជួលដែលភាគច្រើនជាជនជាតិចិន បោះបង់ការអភិវឌ្ឍ ក្រោយរាជរដ្ឋាភិបាលរឹតបន្តឹងនិងបិទមិនឲ្យមានហ្គេមអនឡាញ គួបផ្សំវិបត្តិកូវីដ-១៩ ជិត៣ឆ្នាំកន្លងមក។ អគារជាប់គាំងទាំងនោះ ភាគច្រើនមានម្ចាស់ទីតាំងដីជាជនជាតិខ្មែរ ខណៈអ្នកជួល និងអភិវឌ្ឍន៍ភាគច្រើនជាជនជាតិចិន៕
