ថ្នាក់ដឹកនាំក្រុមហ៊ុនដឹកជញ្ជូនម្ហូបអាហារដូចជា ក្រុមហ៊ុន Food Panda និង Nham24 អះអាងថា ពួកគេស្វាគមន៍ចំពោះសំណើពីខាងក្រសួងសារធាណការនេះ។ ប៉ុន្ដែ ការអនុវត្តប្រើប្រាស់ម៉ូតូអគ្គិសនីអាចនឹងត្រូវការពេលវេលាបន្ថែមទៀត ដ្បិតថា មធ្យោបាយធ្វើដំណើរនេះ អាចមានកត្តាប្រឈមច្រើនជាងម៉ូតូប្រើសាំង។
ថ្លែងនៅក្នុងកិច្ចពិភាក្សាការងារជាមួយ ប្រតិភូកម្មវិធីអភិវឌ្ឍន៍សហប្រជាជាតិ (UNDP) ប្រចាំនៅកម្ពុជា ឯកឧត្តមទេសរដ្ឋមន្ត្រី ស៊ុន ចាន់ថុល បានណែនាំឱ្យអគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូន រៀបចំផែនទីបង្ហាញផ្លូវគ្រប់ជ្រុងជ្រោយទាក់ទងនឹងការអភិវឌ្ឍហេដ្ឋារចនាសម្ព័ន្ធគាំទ្រការប្រើប្រាស់យានយន្តដើរដោយថាមពលអគ្គិសនី និងពិភាក្សាជាមួយសេវាដឹកជញ្ជូនម្ហូបអាហារ ដូចជា Food Panda និង NHAM24 ដើម្បីពិនិត្យលទ្ធភាពលើការប្រើប្រាស់ម៉ូតូដើរដោយ ថាមពលអគ្គិសនី ជំនួសម៉ូតូដែលប្រើសាំងក្នុងការបម្រើសេវារបស់ខ្លួន សំដៅឆ្លើយតបទៅនឹងគម្រោង ផែនការ និងគោលនយោបាយដឹកជញ្ជូនផ្លូវគោកប្រកបដោយចីរភាព។
ជុំវិញគម្រោងកាត់បន្ថយការប្រើប្រាស់មធ្យោបាយដឹកជញ្ជូនដោយប្រើសាំង ត្រូវបានក្រុមហ៊ុនដឹកញ្ជូនម្ហូបអាហារនៅកម្ពុជា បង្ហាញការគាំទ្រនូវគំនិតផ្ដួចផ្ដើមរបស់ក្រសួងសាធារណៈការ និងដឹកជញ្ជូន និងបានគូសបញ្ជាក់ថា ពួកគេបានត្រៀមខ្លួនជានិច្ចក្នុងការអនុវត្តគម្រោងនេះ។
អត្ថបទគួរអាន
លោក ជួន គីមហាក់ ប្រធានគ្រប់គ្រងដៃគូដឹកជញ្ជូន របស់ក្រុមហ៊ុន Food Panda បានបង្ហាញការសាទរ និងគាំទ្រយ៉ាងខ្លាំងចំពោះការប្រើប្រាស់ម៉ូតូអគ្គិសនីសម្រាប់ដឹកម្ហូបអាហារ ជំនួសការប្រើម៉ូតូដោយប្រើសាំង។ បើតាមលោក ជួន គីមហាប់ ក្រុមហ៊ុន Food Panda កន្លងមកក៏បាននិងកំពុងគិតគូពីលទ្ធភាពក្នុងការប្រើប្រាស់ម៉ូតូអគ្គិសនីនេះ ជំនួសម៉ូតូដែលប្រើប្រេងឥន្ធនៈនេះដែរ ដើម្បីចូលរួមថែរក្សាបរិស្ថាន។
ដោយឡែក លោក ចាន់ បូនិម៉ា អ្នកគ្រប់គ្រងទូទៅនៃក្រុមហ៊ុនដឹកជញ្ជូនម្ហូបអាហារ NHAM24 ឯណោះវិញ ក៏បានបង្ហាញការគាំទ្រនូវគំនិតផ្គួចផ្ដើមរបស់ក្រសួងសាធារណៈការនិងដឹកជញ្ជូនដែរ ក៏ប៉ុន្តែ លោកយល់ថា កិច្ចការនេះទាមទារពេលវេលាបន្ថែម ដោយលោកបានអះអាងថា ការងាកមកប្រើប្រាស់ម៉ូតូដោយប្រើអគ្គិសនី អាចនឹងមានបញ្ហាមួយចំនួន ដល់ភ្នាក់ងារដឹកជញ្ជូនម្ហូបអាហារ ដូចជា ការខ្វះលទ្ធភាពសម្រាប់ទិញម៉ូតូដែលប្រើអគ្គិសនីជាដើម។
សូមបញ្ជាក់ថា នាជំនួបជាមួយប្រតិភូកម្មវិធីអភិវឌ្ឍន៍សហប្រជាជាតិ (UNDP) ប្រចាំនៅកម្ពុជា ឯកឧត្តមទេសរដ្ឋមន្ត្រី ស៊ុន ចាន់ថុល បានគូសបញ្ជាក់អំពីការរៀបចំសេចក្តីព្រាងគោលនយោបាយដឹកជញ្ជូនផ្លូវគោក ដែលមានការគិតគូអំពីការអភិវឌ្ឍហេដ្ឋារចនាសម្ព័ន្ធសម្រាប់គាំទ្រដល់ការប្រើប្រាស់រថយន្តដើរដោយថាមពលអគ្គិសនី ដើម្បីកាត់បន្ថយផលប៉ះពាល់អវិជ្ជមានពីការបញ្ចេញឧស្ម័នកាបូនទៅក្នុងបរិយាកាស ក៏ដូចជា គម្រោងមួយចំនួនទៀត ពាក់ព័ន្ធនឹងការចូលរួមថែរក្សាបរិស្ថាន ផងដែរ។ ក្នុងនោះ មានគម្រោងដំឡើងស្ថានីយសាកថ្មរថយន្តដើរដោយថាមពលអគ្គិសនី,ផែនការសម្រាប់ការនាំចូលរថយន្តចាស់ៗ ដែលមានអាយុ១០ឆ្នាំ និងគម្រោងដំឡើងស្ថានីយ៍សាកថ្មរថយន្តថាមពលអគ្គិសនី នៅតាមបណ្ដាស្ថានីយមួយចំនួន ជាដើម៕
None
