ក្រុមអ្នកបើកបរឡានដឹកទំនិញនៅកូរ៉េខាងត្បូងបានត្រឡប់ចូលធ្វើការវិញហើយ ក្រោយពីធ្វើកូដកម្មជាង១សប្ដាហ៍

នៅទីបំផុតក្រសួងដឹកជញ្ជូន និងសហជីពអ្នកបើករថយន្តដឹកជញ្ជូនទំនិញបានព្រមព្រៀងគ្នាកាលពីយប់ថ្ងៃទី ១៤មិថុនា ដើម្បីពង្រីកអត្រាដឹកទំនិញអប្បបរមារបស់ក្រុមអ្នកដឹកទំនិញ និងបន្តពិភាក្សាពីការពង្រីកការធានានៃប្រាក់ឈ្នួលអប្បបរមា សម្រាប់ការដឹកជញ្ជូនទំនិញបន្ថែមទៀត ហើយក្រសួងដឹកជញ្ជូនក៏នឹងពិនិត្យមើលការពង្រីកការឧបត្ថម្ភធនលើតម្លៃប្រេងឥន្ធនៈផងដែរ ដើម្បីធ្វើឲ្យតម្លៃប្រេងថយចុះទាបជាងមុន។

ភាគហ៊ុននៅក្នុងឧស្សាហកម្មដែលរងផលប៉ះពាល់មួយចំនួនចាប់ផ្ដើមកើនឡើងជាថ្មីនៅក្នុងការជួញដូរដំបូងនៅថ្ងៃទី ១៥មិថុនា បន្ទាប់ពីកូដកម្មរយៈពេល ៨ ថ្ងៃមកនេះ បានពន្យារពេលការដឹកជញ្ជូនទំនិញ ដោយបានធ្វើឱ្យប្រទេសកូរ៉េខាងត្បូងខាតបង់ថវិកាជាង ១ពាន់២រយលានដុល្លារ ។

លោក ប៉ាក់ ជុងហួន (Park Jung-hoon) មន្ត្រីសហជីពប្រចាំកំពង់ផែ Busan បាននិយាយថា ទីបំផុតកូដកម្មរបស់ពួកគេត្រូវបានលុបចោល និងត្រឡប់ទៅធ្វើការងារវិញនៅពេលការទាមទាររបស់ពួកគេត្រូវបានអនុម័តនៅក្នុងសភា ហើយលោក ជុងហួន បានបញ្ជាក់ថា ប្រសិនបើក្រសួងដឹកជញ្ជូនមិនបានអនុវត្តតាមកិច្ចព្រមព្រៀងនេះទេ ពួកគេនឹងធ្វើកូដកម្មជាថ្មីទៀត។

កូដកម្មនេះ គឺជាការសាកល្បងជាលើកដំបូងសម្រាប់រដ្ឋាភិបាលថ្មីរបស់ប្រធានាធិបតីកូរ៉េខាងត្បូងលោក Yoon Suk-yeol ហើយវាក៏បានប៉ះពាល់កាន់តែខ្លាំងឡើងដល់ខ្សែចង្វាក់ផ្គត់ផ្គង់ពិភពលោកដែលកំពុងជួបការលំបាកស្រាប់ទៅហើយនោះ ដោយសារតែវិធានការទប់ស្កាត់ជំងឺកូវីដ១៩របស់ប្រទេសចិន និងការលុកលុយរបស់រុស្ស៊ីទៅលើអ៊ុយក្រែនផងដែរ។

លោក វូ សាង ហូ (Woo Sang-ho) មេដឹកនាំបណ្ដោះអាសន្ននៃគណបក្សប្រជាធិបតេយ្យសេរីដែលជាបក្សប្រឆាំងមានសំឡេងភាគច្រើននៅក្នុងសភាកូរ៉េខាងត្បូងនោះ បានស្វាគមន៍ចំពោះកិច្ចព្រមព្រៀងនេះ ប៉ុន្តែលោកបាននិយាយថា បញ្ហានៃការធានាអត្រាការដឹកទំនិញតម្រូវឱ្យមានច្បាប់ ហើយបានអំពាវនាវឱ្យមាន "ការកែលម្អជាមូលដ្ឋាន" ដើម្បីដោះស្រាយលក្ខខណ្ឌដែលក្រុមអ្នកដឹកទំនិញកំពុងតែប្រឈមមុខក្នុងពេលបច្ចុប្បន្ននេះ៕

អត្ថបទ៖ សុខ ជា