ឯកឧត្តមឧកញ៉ា ម៉ុង ឬទ្ធី ប្រធានក្រុមប្រឹក្សាភិបាលក្រុមហ៊ុន ម៉ុង ឫទ្ធី គ្រុបបានអះអាងថា ដូងប្រេងឆ្នាំនេះបានផ្តល់ទិន្នផលខ្ពស់ជាងឆ្នាំមុន បន្ទាប់ពីមានភ្លៀងធ្លាក់នៅដើមដៃ។ ម្ចាស់ក្រុមហ៊ុនដាំដុះ និងនាំចេញដូងប្រេងធំជាងគេនៅកម្ពុជារូបនេះ បានកត់សម្គាល់ឃើញថា ឆ្នាំនេះដូងប្រេងមិនត្រឹមតែផ្តល់ទិន្នផលខ្ពស់ប៉ុណ្ណោះទេ សូម្បីទីផ្សារក៏លក់បានតម្លៃថ្លៃគួរសមផងដែរ។
បើតាមឧកញ៉ា ម៉ុង ឫទ្ធី ក្នុងរយៈពេលជិតពីរឆ្នាំនៃវិបត្តិកូវីដ-១៩ តម្លៃដូងប្រេងបានហក់ឡើងមកដល់ជិត ១ពាន់ដុល្លារក្នុង១តោន បន្ទាប់ពីបានធ្លាក់ចុះអស់រយៈពេលជិត២០ឆ្នាំកន្លងមកនេះ។
ដូងប្រេងរបស់លោកឧកញ៉ា ម៉ុង ឫទ្ធី ភាគច្រើននាំចេញទៅកាន់ទីផ្សារសហគមន៍អឺរ៉ុប ដ្បិតដូងប្រេងនេះ ទទួលបានការលើកលែងពន្ធក្នុងការនាំចូលទៅទីផ្សារអឺរ៉ុប។
អត្ថបទទាក់ទង!
បើតាមទិន្នន័យរបស់ក្រសួងកសិកម្ម ដែលផ្តល់ដោយឯកឧត្តម វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទនៅក្នុងរយៈពេលជិត៥ខែកន្លងមកនេះ កម្ពុជានាំចេញដូងប្រេងឆៅសម្រេចបានជិត២ម៉ឺនតោនកើនជាង ៥តោនបើធៀបនឹងរយៈពេលដូចគ្នាកាលពីឆ្នាំមុខ។
បើតាមការស្រាវជ្រាវរបស់ក្រុមហ៊ុនស្រាវជ្រាវធំមួយរបស់ឥណ្ឌា ឈ្មោះ អ៊ីម៉ាក គ្រុប (imarc Group) បានឲ្យដឹងថា ទីផ្សារដូងប្រេងពិភពលោកនៅឆ្នាំ២០២០មានទំហំជាទឹកប្រាក់ប្រមាណជិត៥០ពាន់លានដុល្លារអាមេរិក។ ជាមួយគ្នានេះ ការស្រាវជ្រាវនេះបានរំពឹងទុកថា សម្រាប់ឆ្នាំ២០២១-២០២៦ ទីផ្សារដូងប្រេងនឹងមានកំណើនក្នុងកម្រិតមធ្យម។ ប៉ុន្ដែ ដោយសារតែមានភាពមិនច្បាស់លាស់នៃការរីករាលដាលកូវីដ-១៩ ក្រុមហ៊ុនស្រាវជ្រាវមួយនេះក៏កំពុងតែធ្វើការតាមដាន និងវាយតម្លៃពីឥទ្ធិពលផ្ទាល់ និងប្រយោល ដែលអាចកើតមានឡើងពីការរាតត្បាតនៃមេរោគនេះ ទៅលើឧស្សាហកម្មផ្សេងៗគ្នាផងដែរ៕
None
