ឧកញ៉ា ម៉ុង ឫទ្ធី៖ ស្វាយខ្ញុំ៥ម៉ឺនដើមនៅឆ្នាំនេះ នឹងសល់ទុំជ្រុះចោលប្រហែល ៦០០ តោន

នៅរយៈពេលចុងក្រោយនេះ បញ្ហាតម្លៃស្វាយធ្លាក់ថ្លៃ មិនមានអ្នកទិញ បានក្លាយជារឿងក្ដៅមួយ ដោយមានកសិករម្ចាស់ចម្ការស្វាយមួយចំនួនបានផុសត្អូញត្អែរនៅតាមហ្វេសប៊ុក។ យ៉ាងណាមិញ លោកឧកញ៉ា ម៉ុង ឫទ្ធី ដែលគេចាត់ទុកជាសហគ្រិនកសិកម្មដ៏លេចធ្លោមួយរូបនៅកម្ពុជា ក៏បានលើកឡើងមិនខុសពីម្ចាស់ចម្ការស្វាយមួយចំនួនទៀតដែរ ដោយបានបញ្ជាក់ថា តាំងពីមានបញ្ហាកូវីដ-១៩ កើតឡើងមកការនាំចេញស្វាយរបស់លោកត្រូវបានជាប់គាំង ខណៈដែលទីផ្សារក្នុងស្រុកក៏គ្មានអ្នកទិញទៀត ដែលបានធ្វើឲ្យស្វាយរបស់លោកប្រមាណ៦០០តោន ត្រូវទុំជោរ ជ្រុះចោលនៅក្រោមដើម។

ឧកញ៉ា ម៉ុង ឫទ្ធី៖ ស្វាយខ្ញុំ៥ម៉ឺនដើមឆ្នាំនេះ នឹងសល់ទុំជ្រុះចោលប្រហែល ៦០០ តោន (រូបភាព៖ ពីហ្វេសប៊ុក)

លោកឧកញ៉ា ម៉ុង ឫទ្ធី ប្រធានក្រុមប្រឹក្សាភិបាលក្រុមហ៊ុនម៉ុង ឫទ្ធី គ្រុប បានអះអាងថា ការលើកឡើងរបស់ប្រជាកសិកររឿងស្វាយអត់ទីផ្សារនៅឆ្នាំនេះ គឺមិនខុសទេ ជាក់ស្ដែងស្វាយនៅចម្ការរបស់លោកដែលមានប្រមាណ ៥ម៉ឺនដើមនៅឆ្នាំនេះ គឺគ្មានទីផ្សារដូចគ្នាដែរទាំងនាំចេញ នឹងលក់ក្នុងស្រុក ហើយលោកត្រូវបង្ខំចិត្តទុកស្វាយឲ្យទុំជ្រុះចោលពេញក្រោមដើមទៀតផង។

លោកឧកញ៉ា មានប្រសាសន៍ថា «មិនមានការនាំចេញ (ស្វាយ) ព្រោះអត់មានយន្ដហោះ (ដឹកជញ្ជូន) ហើយដល់អញ្ចឹងតម្លៃក៏អត់ដែរ។ តាំងពីកូវីដហ្នឹងមក អត់បាននាំចេញទេ! បាននាំចេញតែ១ជើង កាលពីដំបូង ដល់ហើយក្រោយមកអត់បាន! …មួយជើងប្រហាក់ប្រហែលក្រោម១០តោនអីតិចតួចទេ មួយជើង»។

លោកឧកញ៉ាម៉ុង ឫទ្ធី បន្តទៀតថា «ស្វាយ ដល់កហើយ សល់ អត់មានទីផ្សារ ! ខ្ញុំមានស្វាយតៃវ៉ាន់ ស្វាយរបស់អូស្ត្រាលីនោះ នៅលក់នៅក្នុងស្រុកបាន ដល់ពេលស្វាយកែវរមៀតចុះ ចុះពី ១.៥០០ មករហូតដល់១៥០ (រៀល) [ក្នុងមួយគីឡូក្រាម] អត់មានអ្នកទិញបណ្ដោយ។» លោកឧកញ៉ា បន្ថែមទៀតថា «ស្វាយកែវរមៀតអត់មានតម្លៃតែម្ដង! អត់មានអ្នកទិញតែម្ដង! ស្វាយខ្ញុំទុំជ្រុះចោលនៅក្រោមហ្នឹង ដូចកសិករគាត់និយាយហ្នឹងអត់ខុសទេ!»។

បើតាមការប៉ាន់ប្រមាណរបស់លោកឧកញ៉ាម៉ុង ឫទ្ធី នៅឆ្នាំនេះស្វាយរបស់លោកអាចនឹងត្រូវទុកទុំជ្រុះចោលប្រមាណ ៦០០តោន ព្រោះតែមិនអាចនាំចេញបាន និងទីផ្សារក្នុងស្រុកគ្មានអ្នកទិញ។

លោកឧកញ៉ា បញ្ជាក់ថា «អាហ្នឹងអត់បេះទុកបានទេ! ប្រហែលជាដើមខែ៥ហ្នឹង វាទុំរលួយខូចអស់ហើយ អត់មានសល់អីទៀតទេ!។ វាដឹងតែថា ស្វាយខ្ញុំទាំងអស់វា ៥ម៉ឺនដើម! ស្វាយខ្ញុំប្រហែលជាចោលអស់ប្រហែល៦០០តោនអីហ្នឹង បើតាមមើល!»។

លោកឧកញ៉ា ម៉ុង ឫទ្ធី បន្ថែមទៀតថា លោកក៏បានទាក់ទងទៅខាងរោងចក្រកែច្នៃស្វាយដែរឲ្យជួយទិញ ប៉ុន្ដែអត់មាននរណាទិញទេ ខណៈដែលលោកអះអាងថា គុណភាពស្វាយរបស់គឺអាចទទួលយកបាន។

យ៉ាងណាក៏ដោយចុះ អ្នកនាំពាក្យក្រសួងពាណិជ្ជកម្ម ឯកឧត្តម ស៊ាង ថៃ បានគូសបញ្ជាក់ថា កន្លងមកក្រសួងក៏បានទទួលព័ត៌មានពីរឿងបញ្ហាស្វាយនេះដែរ ដោយម្ចាស់ចម្ការស្វាយបានលើកឡើងពីរឿងស្វាយគ្មានទីផ្សារនេះហើយក្រសួងក៏បានចាត់ក្រុមការងារចុះទៅត្រួតពិនិត្យជាក់ស្ដែងឃើញថា ក្រុមហ៊ុនបញ្ជាទិញ និងកែច្នៃស្វាយក្នុងស្រុក មួយចំនួនបែរជាលើកឡើងថា ពួកគេកំពុងខ្វះខាតផ្លែស្វាយដែលមានគុណភាពសម្រាប់ការកែច្នៃទៅវិញ។

បើតាមអ្នកនាំពាក្យក្រសួងពាណិជ្ជកម្ម អះអាងទៀតថា ក្រុមហ៊ុនទាំងនោះបានឲ្យដឹងថា បើពួកគេរកទិញស្វាយមិនបានទេ នោះក្រុមហ៊ុននឹងប្រឈមនឹងការផ្អាកផលិតកម្មថែមទៀតផង។

ទោះយ៉ាងណា ឯកឧត្តម ស៊ាង ថៃ បញ្ជាក់ថាស្វាយ ដែលរោងចក្រទិញយកទៅធ្វើដំណាប់នោះ គឺជាស្វាយដែលមានគុណភាពមានសាច់នៅរឹងល្អ ប៉ុន្ដែ តាមការចុះត្រួតពិនិត្យរបស់ក្រសួងនាពេលកន្លងឃើញថាស្វាយដែលកសិករទុកចោលមិនមានអ្នកទិញនោះ គឺភាគច្រើនជាស្វាយដែលមានគុណភាពមិនសូវល្អទុំជោរ សាច់ជ្រាយមិនអាចយកទៅកែច្នៃបាន។

គួរបញ្ជាក់ថា ជាឆ្លើយតបទៅនឹងការផុសលើហ្វេសប៊ុកអំពីរឿងទុកស្វាយរាប់តោនចោលគ្មានអ្នកទិញ កាលពីថ្ងៃទី ២៥ ខែមេសានេះ ក្រសួងពាណិជ្ជកម្មបានអះអាងថា បច្ចុប្បន្ននេះ ទោះជាស្ថិតក្នុងកាលៈទេសៈនៃជម្ងឺកូវីត-១៩ ក៏ដោយ ក៏កសិផលកម្ពុជានៅតែមានទីផ្សារទាំងសម្រាប់ការនាំចេញ និងទីផ្សារក្នុងស្រុក ឲ្យតែទំនិញទាំងនោះ មានគុណភាពស្របតាមតម្រូវការទីផ្សារ ពិសេសផ្លែស្វាយ។

បើតាមក្រសួងពាណិជ្ជកម្មបញ្ជាក់ថា «ផ្លែស្វាយដែលមានគុណភាពល្អ រោងចក្រផលិតដំណាប់ស្វាយទទួលប្រមូលទិញក្នុងតម្លៃពី ៥០០រៀល ទៅ ៥៥០រៀលក្នុងមួយគីឡូក្រាម ចំណែកផ្លែស្វាយដែលខ្ចប់ក្នុងកញ្ចប់សម្រាប់នាំចេញ គឺ បានថ្លៃដល់ ៩០០រៀលក្នុងមួយគីឡូក្រាម។ ដូច្នេះ ឲ្យតែស្វាយមានគុណភាពល្អ ពុំខ្វះទីផ្សារឡើយ»។

ក្រសួងពាណិជ្ជកម្មបានបន្ថែមទៀតថា បច្ចុប្បន្ន នៅខេត្តកំពង់ស្ពឺ ពុំមានសល់ស្វាយក្នុងចម្ការច្រើនទេ ឈ្មួញកណ្ដាលដឹកស្វាយតាំងពីខេត្តកំពង់ឆ្នាំង កំពង់ធំ កំពង់ចាម ព្រះវិហារ ដើម្បីយកមកលក់ឱ្យឃ្លាំងធំៗនៅកំពង់ស្ពឺ សម្រាប់នាំចេញ និងបំរើតម្រូវការរោងចក្រកែច្នៃក្នុងស្រុក។

ជុំវិញនឹងបញ្ហានេះ រដ្ឋមន្ត្រីក្រសួងកសិកម្ម ឯកឧត្តម វេង សាខុន បានអះអាងដែរថា ការនាំចេញស្វាយស្រស់ផ្លូវការក្នុង រយៈពេល ៣ខែ ២៧ថ្ងៃ ដំបូងនៃឆ្នាំ២០២០នេះ មានចំនួនជាង ៤ម៉ឺនតោនតែប៉ុណ្ណោះ។ ក្នុងនោះ ការនាំចេញស្វាយទៅកាន់កូរ៉េខាងត្បូង នៅដើមឆ្នាំ២០២០នេះ មានបរិមាណតិចតួចប៉ុណ្ណោះ ដោយការដឹកតាមយន្ដហោះមួយថ្ងៃ បានតែចន្លោះពីជាង ១តោន ទៅ៤តោនប៉ុណ្ណោះ ជួនកាលពុំបានដឹកជញ្ជូនទៀតផង អាស្រ័យជើងយន្ដហោះ ដែលបានហោះមកកម្ពុជា។

ឯកឧត្តម វេង សាខុនគូសបញ្ជាក់ថា បញ្ហាដឹកជញ្ជូន, ទីផ្សារ និងបញ្ហាកូវីដ-១៩ គឺពិតជាបានធ្វើឲ្យប៉ះពាល់ការនាំចេញស្វាយរបស់កម្ពុជា ដោយគិតជាសរុបមក ការនាំចេញទាំងស្វាយស្រស់, ដំណាប់ និងសេរូស្វាយ ក្នុងរយៈពេល ៣ខែ ២៨ថ្ងៃ នៃដើមឆ្នាំ២០២០នេះ បើគិតជាផ្លែស្វាយស្រស់ គឺមានមិនលើសពី ១០ម៉ឺនតោននោះទេ។

បើតាមអគ្គនាយកដ្ឋានកសិកម្ម បច្ចុប្បន្នកម្ពុជាមានរោងចក្រកែច្នៃស្វាយចំនួន១៣ រោងចក្រ ភាគច្រើនគឺនៅខេត្តកំពង់ស្ពឺ ហើយក្នុងមួយថ្ងៃ រោងចក្រទាំងអស់នេះ បានស្រូបយកផ្លែស្វាយស្រស់ដើម្បីកែច្នៃក្នុងមួយថ្ងៃ មិនលើសពី១០០តោននោះទេ នេះមិនទាន់គិតពីរោងចក្រមួយចំនួនមិនដំណើរការផង។

ដោយឡែក ចំពោះកិច្ចព្រមព្រៀងនាំចេញស្វាយទៅកាន់ប្រទេសចិនវិញ ត្រូវបានរដ្ឋមន្ត្រីក្រសួងកសិកម្មអះអាងថា គឺកំពុងស្ថិតនៅក្នុងដំណាក់កាលចរចានៅឡើយ ដោយភាគីកម្ពុជាបានទទួលយកលក្ខខណ្ឌទាំងអស់ដែលភាគីចិនបានស្នើមកកម្ពុជា ដើម្បីឈានទៅដល់ការចុះហត្ថលេខាលើពិធីសារក្នុងការនាំចេញស្វាយទៅកាន់ប្រទេសចិនក្នុងរយៈពេល ដ៏ខ្លីខាងមុខនេះ។

សារព័ត៌មានខេមបូណូមីស មិនអាចសុំការបញ្ជាក់បន្ថែម ពីលោក អ៊ិន ឆៃវ៉ាន់ ប្រធានសមាគមសហព័ន្ធស្វាយកម្ពុជាបានទេនៅថ្ងៃទី២៩ ខែមេសានេះ ដោយសារតែ ទូរស័ព្ទរបស់លោកមិនអាចទាក់ទងបាន៕