សហរដ្ឋអាមេរិកបានដាក់ចេញនូវការធានាសន្តិសុខស្បៀងចំនួន ៤ពាន់៥រយលានដុល្លារនៅក្នុងកិច្ចប្រជុំកំពូល G7ដែលក្នុងនោះ ខ្លួនបានផ្តល់វិភាគទានចំនួនជិត ២ពាន់៨ រយលានដុល្លារ។ លោកស្រី Thomas Greenfield បាននិយាយថា សហរដ្ឋអាមេរិកក៏មានផែនការក្នុងការរួមចំណែកចំនួន ១៥០ លានដុល្លារក្នុងជំនួយមនុស្សធម៌ថ្មីដល់ទ្វីបអាហ្រ្វិកដែលរង់ចាំការអនុម័តពីសភាផងដែរ។
មែនទែនទៅ រដ្ឋាភិបាលអាហ្រ្វិកភាគច្រើនបានជៀសវាង និង បដិសេធមិនចូលរួមការថ្កោលទោសដាក់ទណ្ឌកម្មលើរុស្ស៊ីជុំវិញបញ្ហាសង្គ្រាមនៅអ៊ុយក្រែនដូចលោកខាងលិចនោះទេ។
លោកស្រី Thomas Greenfield បាននិយាយថា ខណៈពេលដែល វិស័យថាមពល ការប្រែប្រួលអាកាសធាតុ ជំងឺរាតត្បាត និង ជម្លោះរវាងមហាអំណាច គឺជាមូលហេតុនៃបញ្ហាការផ្គត់ផ្គង់ស្បៀងអាហារសកលនោះ បញ្ហាដ៏អាក្រក់បំផុត គឺភាពអត់ឃ្លានកើនឡើងនៅប្រទេសក្រីក្រ។
អត្ថបទគួរអាន
លោកស្រី Thomas Greenfield បាននិយាយថា រុស្ស៊ីបានបាញ់វាយប្រហារតំបន់ដីស្រែចំការដែលមានសក្តានុពលបំផុតរបស់អ៊ុយក្រែន ធ្វើឱ្យខូចខាតជាដំណំ ហើយដីស្រែ ពោរពេញដោយគ្រាប់មីន និង គ្រាប់បែក។
លោកស្រីបានបន្ថែមថា បញ្ហាសង្គ្រាមរុស្ស៊ីដែលបានលុកលុយអ៊ុយក្រែន វាចាំបាច់ណាស់ត្រូវមានការចូលរួមពីបណ្តាប្រទេសជាសកលក្នុងការកាត់បន្ថយផលប៉ះពាល់នៃសង្គ្រាមនៅអ៊ុយក្រែនលើសន្តិសុខស្បៀងអាហារ។
គួរជម្រាប់ថា ប្រធានាធិបតីបារាំងលោក Emmanuel Macron ក៏បានលើកឡើងពីការព្រួយបារម្ភស្រដៀងគ្នានេះដែរកាលពីសប្តាហ៍មុន អំពីវិបត្តិស្បៀងអាហារពិភពលោកថា កំពុងកើតឡើងដោយសារអាវុធនៃសង្គ្រាមរបស់រុស្ស៊ី។
ទីក្រុងម៉ូស្គូបានបដិសេធទទួលខុសត្រូចំពោះ វិបត្តិស្បៀងអាហារ ហើយបានបន្ទោសទៅលើទណ្ឌកម្មរបស់លោកខាងលិចថា បានធ្វើឲ្យមានការនាំចេញស្បៀងអាហារ និងជីកសិកម្មរបស់ខ្លួនមានសភាពយឺតយ៉ាវ។
ទោះយ៉ាងណា ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិលោកស្រី Linda Thomas Greenfield បានច្រានចោលការលើកឡើងនេះ ដោយបានគូសបញ្ជាក់បន្ថែមថា រុស្ស៊ីទៅវិញទេ ដែលមានចេតនាធ្វើឲ្យមានការបង្អាក់ដល់ខ្សែចង្វាក់ផ្គត់ផ្គង់ស្បៀងអាហារពិភពលោក។ លោកស្រីបន្ថែមទៀតថា មកទល់ពេលនេះ គេមិនទាន់មានឃើញសញ្ញាណាមួយបង្ហាញថា រុស្ស៊ីនឹងទទួលយកដំណោះស្រាយការទូតណាមួយ សម្រាប់វិបត្តិសង្គ្រាមនៅអ៊ុយក្រែននោះដែរ៕
