ការធ្វើសមយុទ្ធរបស់ចិននៅតំបន់សមុទ្រចិនខាងត្បូង បាននិងកំពុងកើតឡើងនៅទីតាំងចន្លោះទឹកដីនៃខេត្តហៃណានប្រទេសចិន និងវៀតណាម ចាប់ពីថ្ងៃទី ០៤ ដល់ថ្ងៃទី ១៥ ខែមីនា។ នេះបើតាមការបញ្ជាក់ដោយរដ្ឋបាលដែនសមុទ្ររបស់ចិន។
អ្នកនាំពាក្យក្រសួងការបរទេសចិន លោក ចៅ លីចៀន បាននិយាយថា ការធ្វើសមយុទ្ធយោធារបស់ចិនគឺស្របច្បាប់។ លោកបន្ថែមថា សមយុទ្ធរបស់យោធាចិន គឺធ្វើឡើងនៅច្រកទ្វារដែនសមុទ្ររបស់ខ្លួន គឺសមហេតុផល និងស្របតាមច្បាប់ ហើយវាគ្មានអ្វីត្រូវតិះដៀលនោះឡើយ។
យ៉ាងណាក៏ដោយចុះ អ្នកនាំពាក្យក្រសួងការបរទេសវៀតណាមនិយាយថា តំបន់សម្រាប់សមយុទ្ធរបស់យោធាចិននោះ គឺស្ថិតនៅក្រោមតំបន់សេដ្ឋកិច្ចផ្តាច់មុខ និងតំបន់ខ្ពស់រាបបាតសមុទ្ររបស់វៀតណាម ដូចដែលបានកំណត់នៅក្រោមអនុសញ្ញាអង្គការសហប្រជាជាតិស្តីពីច្បាប់នៃដែនសមុទ្រឆ្នាំ ១៩៨២។
អត្ថបទគួរអាន
ភាពតានតឹងជុំវិញបញ្ហាដែនដីរវាងវៀតណាម
និងចិន បានកើនឡើងចាប់តាំងពីប្រទេសចិន
បានដាក់កន្លែងខួងយកប្រេងនៅក្នុងដែនទឹក ដែលមានជម្លោះ
កាលពីពាក់កណ្ដាលឆ្នាំ២០១៤ ដែលនាំឲ្យមានការតវ៉ាប្រឆាំងចិនយ៉ាងខ្លាំង
នៅក្នុងប្រទេសវៀតណាម និងមានការប៉ះទង្គិចគ្នារវាងទូកឆ្មាំសមុទ្ររវាងប្រទេសទាំងពីរផងដែរ។
ប្រទេសចិន បាននិយាយថា មានជាង៨០% នៃតំបន់សមុទ្រចិនខាងត្បូង គឺជាទឹកដីរបស់ខ្លួន ដោយមានសំអាងទៅលើផែនទីកាលពីឆ្នាំ១៩៤៧ និងផ្អែកលើឯកសារប្រវត្តិសាស្ត្រជាដើម។ វៀតណាម ហ្វីលីពីន ប្រ៊ុយណេ ម៉ាស៊ីឡេស៊ី និងកោះតៃវ៉ាន់ ក៏បានទាមទារផ្នែកខ្លះនៃដែនសមុទ្រនោះដូចគ្នាដែរ ដែលធ្វើឲ្យមានការរកាំរកូសនឹងគ្នាជារឿយផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
