សម្រាប់ប្រទេសវៀតណាម បានប្រកាសថា នឹងផ្អាកការផ្តល់ទិដ្ឋាការថ្មី ដល់ជនបរទេស ដោយរដ្ឋាភិបាលវៀតណាម អះអាងថា មានករណីឆ្លងមេរោគមកពីក្រៅប្រទេស មានការកើនឡើង ដូច្នេះ ការពន្យារពេលផ្តល់ទិដ្ឋាការនេះ ជាវិធានការដ៏មានប្រសិទ្ធភាព និងអាចធ្វើជាបណ្តោះអាសន្ន រយៈពេល ១៥ ទៅ ៣០ថ្ងៃ។លើសពីនេះទៅទៀត អ្នកដំណើរមកពី អឺរ៉ុប អាមេរិក បណ្តាប្រទេសក្នុងតំបន់អាស៊ាន និងបណ្តាប្រទេសដែលមានមេរោគផ្ទុះខ្លាំង តម្រូវឲ្យធ្វើការត្រួតពិនិត្យសុខភាព និងដាក់ដោយឡែក ១៤ថ្ងៃសិន នៅពេលចូលមកកាន់ប្រទេសវៀតណាម។
ដោយឡែក ប្រទេសឡាវ ក៏បានសម្រេចបិទច្រកព្រំដែនជាបណ្តោះសិន ចំនួន ១០កន្លែងនៅក្នុងខេត្តហាំផាន់ ជាប់នឹងប្រទេសវៀតណាម ដោយមិនបានកំណត់ពី ពេលវេលានៃការផ្អាកនោះទេ តែយ៉ាងណា ច្រកព្រំដែនចំនួន ៤ រវាង ឡាវ និងវៀតណាម នៅតែបើកដំណើរការជាធម្មតា។រដ្ឋាភិបាលឡាវ ក៏បានកំណត់ដែរថា បើសិនជា ជនបរទេស ដែលមានបំណងចូលមកប្រទេសឡាវ ទោះបីជា មិនមានរោគសញ្ញាកូវីដ១៩ ក៏ដោយ ត្រូវដាក់ដោយឡែក រយៈពេល ១៤ថ្ងៃ បើសិនជា ជនបរទេសនោះ មកពីប្រទេសណាមួយ ដែលមានករណីឆ្លងលើសពី ១០០ករណី។
អត្ថបទទាក់ទង
រីឯ ប្រទេសថៃ ក៏បានបិទច្រកព្រំដែនអន្តរជាតិ ប៉ាងម៉ុន ជាមួយនឹងប្រទេសឡាវ រង់ចាំដល់ សភាពការណ៍មេរោគកូវីដ ១៩ ធូរស្បើយឡើងវិញ ដោយវិធានការនេះ ភាគីឡាវ ជាអ្នកប្រកាសបិទច្រកនេះមុន ទើបភាគីថៃ សម្រេចបិទច្រក បានគីហុក របស់ខ្លួននៅពេលក្រោយ។ទោះជាយ៉ាងណា វិស័យឯកជន នៅក្នុងប្រទេសថៃ បានស្នើដល់ រាជរដ្ឋាភិបាលថៃ ឲ្យធ្វើការបិទការចេញចូលទាំងអស់ ទាំងផ្លូវគោក ទាំងផ្លូវអាកាស រយៈពេល ១៤ថ្ងៃសិន ដើម្បីទប់ស្កាត់ការរីករាលដាលនៃមេរោគកូវីដ ១៩ ទៅដល់បណ្តាខេត្តផ្សេងៗ ដែលធ្វើឲ្យប៉ះពាល់ដល់ សេដ្ឋកិច្ចជាតិកាន់តែធ្ងន់ធ្ងរ។
សម្រាប់ប្រទេសកម្ពុជាឯណេះវិញ លោក រស់ ផារិទ្ធ អភិបាលរងខេត្តស្វាយរៀង បានបញ្ជាក់អះអាងថា ៖ “ បើនិយាយថាវៀតណាម បិទព្រំដែន ជាមួយកម្ពុជានោះ គឺមិនទាន់អាចថាអញ្ចឹងបានទេ ប៉ុន្ដែ ដូចយើងដឹងស្រាប់ហើយថា ដោយសារតែការរីករាលដាលនៃមេរោគ Covid-19 ជាសកល ប្រទេសមួយចំនួនមានការរឹតបន្ដឹងការធ្វើដំណើរចេញចូលដើម្បីទប់ស្កាត់ការឆ្លងជំងឺ។ យ៉ាងណាមិញ ចំពោះប្រទេសវៀតណាម ក៏ដូចជាកម្ពុជា រួមទាំងប្រទេសផ្សេងៗទៀតផងដែរ គឺមានការរឹតបន្ដឹងតាមច្រកព្រំដែនកាន់តែខ្លាំងឡើង ” ។លោក រស់ ផារិទ្ធ បន្តថា ការរឹតបន្ដឹងតាមច្រកព្រំដែនខ្លាំងជាងមុន ដោយអាជ្ញាធរវៀតណាមនេះ គឺទើបតែកើតឡើងថ្មីៗនេះ ប៉ុណ្ណោះ ក្រោយពីមានការផ្ទុះរាលដាលជាបន្ដបន្ទាប់នៃមេរោគ Covid-19 នៅក្នុងប្រទេសនេះ។
ក៏ប៉ុន្តែបើតាមការអះអាងពី ឯកឧត្តម គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ ដែលបានថ្លែងនៅក្នុងសារព័ត៌មានក្នុងស្រុកនៅថ្ងៃទី ១៨ មីនានេះ បានឲ្យដឹងថា រដ្ឋាភិបាលវៀតណាមពិតជាបានសម្រេចបិទច្រកព្រំដែនមួយចំនួនជាបណ្ដោះអាសន្នជាមួយកម្ពុជាមែន នៅថ្ងៃទី ១៨ ខែមីនានេះ។បើតាម ឯកឧត្ត គៀត ច័ន្ទថារិទ្ធ រហូតមកដល់ពេលនេះ សម្រាប់ជនបរទេសដែលចង់ចូលទៅកាន់ប្រទេសវៀតណាម នឹងមិនអនុញ្ញាតឱ្យចូលទៀតទេ ចំណែកពលរដ្ឋខ្មែរដែលនៅជាប់ព្រំដែនដែលចង់ចូលទៅវៀតណាម នឹងត្រូវដាក់ឱ្យនៅដាច់ដោយឡែក១៤ថ្ងៃសិន មុននឹងអនុញ្ញាតឱ្យចូល។
ដោយឡែកកម្ពុជាក៏បានសម្រេចផ្អាក ជនបរទេស ដែលមកពីប្រទេសអឺរ៉ុង អ៊ីតាលី អាល្លឺម៉ង់ អេស្ប៉ាញ បារាំង និងអាមេរិក មិនឲ្យចូលមក កម្ពុជា ក្នុងរយៈពេល ៣០ថ្ងៃ គិតចាប់ពីថ្ងៃទី ១៨ ខែមីនា ហើយចំពោះ មន្ត្រីរាជការ និងប្រជាពលរដ្ឋកម្ពុជា ដែលបានវិលត្រលប់មកពី បណ្តាប្រទេសនៅអឺរ៉ុប សហរដ្ឋអាមេរិក និងអឺរ៉ុង ត្រូវដាក់ខ្លួនឲ្យនៅដោយឡែក ១៤ថ្ងៃផងដែរ៕
None
