តម្លៃផ្ទះថ្មីជាមធ្យមនៅក្នុងទីក្រុងធំៗចំនួន ៧០ របស់ប្រទេសចិនបានកើនឡើង ០,១% ក្នុងខែមករាកន្លងទៅ ធៀបនឹងការធ្លាក់ចុះ ០,២% នៅក្នុងខែធ្នូ នេះបើយោងតាមការគណនារបស់ទីភ្នាក់ងារព័ត៌មាន Reuters ដោយផ្អែកលើទិន្នន័យពីការិយាល័យស្ថិតិជាតិ NBSចិន។
ទីផ្សារអចលនទ្រព្យរបស់ប្រទេសចិនដែលស្មើនឹងមួយភាគបួននៃផលិតផលក្នុងស្រុកសរុប ផ្អែកតាមសូចនាករមួយចំនួន បានបង្ហាញឲ្យឃើញពីការធ្លាក់ចុះ ដោយសារតែការជំរុញរបស់ទីក្រុងប៉េកាំងក្នុងការកាត់បន្ថយការពង្រីកខ្លួននៃវិស័យនេះ នៅចំពេលដែលក្រុមហ៊ុនអចលនទ្រព្យមួយចំនួនកំពុងមានការ ខាតបង់ និង មានជំពាក់បំណុលជាច្រើនសន្ធឹកសន្ធាប់ដូចជា China Evergrande Group ជាដើម។
គួរជម្រាបថា ចំនួនទីក្រុងដែលមានការកើនឡើងតម្លៃផ្ទះថ្មីៗខ្ពស់បំផុតមានការកើនឡើងពី ១៥ ទៅ ២៨ ទីក្រុង ដែលភាគច្រើន គឺជាទីក្រុងធំជាងគេលំដាប់ទី ១ និង ទី ២ ក្នុងប្រទេសចិន។ ក្នុងនោះផងដែរ តម្លៃជាមធ្យមនៃលំនៅដ្ឋានថ្មីនៅក្នុងទីក្រុងធំៗចំនួនបួនរបស់ប្រទេសចិនគឺ ប៉េកាំង សៀងហៃ ក្វាងចូវ និង ស៊ិនជិន ដែលធ្លាប់បានធ្លាក់ចុះ ០,១% ក្នុងខែធ្នូ បានកើនឡើង០,៦%វិញនៅខែមករាឆ្នាំនេះ។ នេះបើតាមការិយាល័យស្ថិតិជាតិ របស់ចិន។
អត្ថបទគួរអាន
ការប្រែប្រួលខ្លាំងនៃកំណើនតម្លៃផ្ទះថ្មីនៅទីក្រុងធំៗ ត្រូវបានគេមើលឃើញថា គឺមាននៅក្នុងទីក្រុងក្វាងចូវដែលតម្លៃបានកើនឡើងមកវិញ ០,៥% នៅខែមករា បន្ទាប់ពីបានធ្លាក់ចុះ ០,៦% កាលពីខែធ្នូ។
ដោយឡែក ទីក្រុងប៉េកាំង បានកើនឡើង ១% សៀងហៃកើន ០,៦% និង ស៊ិនជិន បានកើនឡើងប្រហែល ០,៥%។
អ្នកជំនាញអះអាងថា ការកើនឡើងនៃតម្រូវការទិញផ្ទះថ្មីៗ គឺនៅក្រោយពេលដែល រដ្ឋាភិបាលចិនមានការធ្វើឲ្យប្រសើរឡើងនូវបរិយាកាសហិរញ្ញវត្ថុ និងឥណទាននៅក្នុងវិស័យនេះ តាំងពីត្រីមាសទី៤ឆ្នាំមុនមក។
ទិន្នន័យពីធនាគារកណ្ដាលចិន បានបង្ហាញថា ប្រាក់កម្ចីគ្រួសារ ភាគច្រើនជាកម្ចីទិញផ្ទះនៅក្នុងប្រទេសចិនបានកើនឡើងដល់ ១៣៣ពាន់លានដុល្លារ នៅក្នុងខែមករាកន្លងទៅនេះ ពោលគឺកើនឡើងទ្វេដងធៀបនឹងខែធ្នូឆ្នាំមុន។
អ្នកជំនាញក្នុងវិស័យអចលនទ្រព្យចិន បាននិយាយថា "ការកើនឡើងនៅក្នុងទីក្រុងលំដាប់ទី១ មិនសូវទាក់ទងនឹងកត្តាតាមរដូវកាលឡើយ ក៏ប៉ុន្តែដោយសារតែអំណាចទិញកើនឡើង ចំពេលមានបន្ធូរបន្ថយ គោលនយោបាយឥណទាន ពីរដ្ឋាភិបាលក្រុងប៉េកាំង។ អ្នកជំនាញជឿជាក់ថា តម្លៃក្នុងទីក្រុងលំដាប់ទីមួយនឹងបន្តកើនឡើងបន្ថែមទៀត នាពេលខាងមុខនេះ៕ឮ
អត្ថបទ វ៉ាន់ ស្រីរ័ត្ន
None
