-ថ្ងៃទី២០ ខែកុម្ភៈ ឆ្នាំ២០២១ ជាថ្ងៃផ្ទុះនៃព្រឹត្តិការណ៍សហគមន៍២០កុម្ភៈ
នៅថ្ងៃទី២០ ខែកុម្ភៈ ឆ្នាំ២០២១ សម្តេចតេជោនាយករដ្ឋមន្ត្រី ហ៊ុន សែន បានថ្លែងសារពិសេសមួយចេញពីភូមិគ្រឹះរបស់សម្តេចនៅក្រុងតាខ្មៅ ដើម្បីបញ្ជាក់ពីបច្ចុប្បន្នភាពនៃជំងឺកូវីដ-១៩ នៅកម្ពុជា និងប្រកាសពីការរកឃើញអ្នកឆ្លងជំងឺកូវីដ-១៩ ចំនួន៣២នាក់ក្នុងសហគមន៍ ដែល សម្តេចឲ្យឈ្មោះថា«ព្រឹត្តិការណ៍សហគមន៍២០កុម្ភៈ»។ អ្នកជំងឺថ្មីទាំង៣២រូប ត្រូវបានរកឃើញកើតលើជនជាតិបរទេសទាំងអស់ ដោយ សម្តេច អះអាងថា ក្លឹបកម្សាន្តមួយដែលមានឈ្មោះថា N8 ជាកន្លែងផ្ទុះនៃព្រឹត្តិការណ៍សហគមន៍លើកទីបីនេះ។ ភ្លាមៗនោះ សម្តេច ហ៊ុន សែន បានបញ្ជាឲ្យបិទទីតាំងមួយចំនួននៅរាជធានីភ្នំពេញ ដែលមានហានិភ័យខ្ពស់ក្នុងការឆ្លងជំងឺកូវីដ-១៩។
ព្រឹត្តិការណ៍នេះដែរ បានកើតឡើងក្រោយស្ត្រីជនជាតិចិនពីររូបបានគេចចេញពីកន្លែងធ្វើចត្តាឡីស័កនៅសណ្ឋាគារសុខាត្រើយម្ខាងលួចចេញមកដើរលេងកម្សាន្តនៅក្លឹបពេលរាត្រីដែលបានបញ្ជាក់ខាងលើនេះ។ ពាក់ព័ន្ធបញ្ហានេះ សន្តិសុខម្នាក់ ដែលជួយសម្របសម្រួលឲ្យស្ត្រីជនជាតិចិនចេញពីកន្លែងធ្វើចត្តាឡីស័កត្រូវបានឃាត់ខ្លួនផងដែរ។
អត្ថបទទាក់ទង!
-ថ្ងៃទី២ ខែមីនា ឆ្នាំ២០២១ វ៉ាក់សាំងកូវីដ-១៩ AstraZeneca ជាង៣០ម៉ឺនដូសត្រូវដឹកមកដល់កម្ពុជា
វ៉ាក់សាំងកូវីដ-១៩ AstraZeneca ចំនួន ៣២៤.០០០ដូស ក្រោមគម្រោងនៃមជ្ឈមណ្ឌល COVAX នៃអង្គការសុខភាពពិភពលោកត្រូវបានដឹកមកដល់កម្ពុជានៅយប់ថ្ងៃទី២ ខែមីនា ឆ្នាំ២០២១។ នេះជាវ៉ាក់សាំងកូវីដ-១៩ ជំហានទី១ នៃយន្តការ COVAX ដែលត្រូវបានបង្កើតឡើង ដើម្បីធានាភាពស្មើគ្នារវាងប្រទេសអ្នកមាន និងប្រទេសក្រីក្រក្នុងការទទួលបានវ៉ាក់សាំងកូវីដ-១៩ សម្រាប់ចាក់ឲ្យប្រជាពលរដ្ឋ។ យន្តការកូវ៉ាក់ គឺផ្តល់វ៉ាក់សាំងកូវីដ-១៩ ដល់ប្រទេសក្រីក្រចំនួន២០% នៃចំនួនប្រជាជនសរុប។
គិតមកដល់បច្ចុប្បន្នកម្ពុជាទទួលបានជំនួយវ៉ាក់សាំងកូវីដ-១៩សរុបចំនួន ៩២៤.០០០ដូស ក្រោយកម្ពុជាទទួលបានជំនួយវ៉ាក់សាំងកូវីដ-១៩ ស៊ីណូហ្វាមចំនួន ៦០ម៉ឺនដូស ដែលបានដឹកមកដល់កម្ពុជានៅថ្ងៃទី៧ ខែកុម្ភៈ ឆ្នាំ២០២១។
-ថ្ងៃទី៤ ខែមីនា ឆ្នាំ២០២១ សម្តេច ហ៊ុន សែន ចាក់វ៉ាក់សាំងកូវីដ-១៩ AstraZeneca លើកដំបូង
ក្រោយប្រកាសលុបចោលគម្រោងចាក់សាំងកូវីដ-១៩ ស៊ីណូហ្វាម ក្រោមហេតុផលលើសអាយុ សម្តេចនាយករដ្ឋមន្ត្រី ហ៊ុន សែន បានសម្រេចចាក់វ៉ាក់សាំងកូវីដ-១៩ ប្រភេទ AstraZeneca ដែលជាជំនួយរបស់មជ្ឈមណ្ឌលកូវ៉ាក់នៅថ្ងៃទី៤ ខែមីនា ឆ្នាំ២០២១ នៅមន្ទីរពេទ្យកាល់ម៉ែត។ ក្រៅពីសម្តេច ក៏មានវត្តមានថ្នាក់ដឹកនាំក្រសួង ស្ថាប័ន ជាច្រើនរូបទៀតបានចាក់វ៉ាក់សាំងនេះផងដែរ។
ថ្លែងក្នុងសន្និសីទសារព័ត៌មានក្រោយចាក់វ៉ាក់សាំងរួច សម្តេច ហ៊ុន សែន បានក្រើនរឭកដល់ពលរដ្ឋកុំឲ្យខ្វល់ពីប្រភពវ៉ាក់សាំងមកពីប្រទេសណា តែត្រូវខ្វល់ថា តើកម្ពុជាមានវ៉ាក់សាំងគ្រប់គ្រាន់សម្រាប់ចាក់ឲ្យប្រជាពលរដ្ឋ ឬអត់។
-ថ្ងៃទី ៤ ខែមីនា ឆ្នាំ២០២០១ សម្តេច ហ៊ុន សែន បញ្ជាឲ្យបិទការធ្វើដំណើរចេញ-ចូលខេត្តព្រះសីហនុ
សម្តេចនាយករដ្ឋមន្ត្រី ហ៊ុន សែន នៅថ្ងៃទី៤ មីនា បានថ្លែងសារពិសេសមួយ ដោយបញ្ជាឲ្យអាជ្ញាធរបិទការធ្វើដំណើរចេញ-ចូលខេត្តព្រះសីហនុជាបណ្តោះអាសន្ន តែអនុញ្ញាតឲ្យរថយន្តដឹកទំនិញនៅធ្វើចរាចរណ៍ធម្មតា។ ការបញ្ជារបស់សម្តេច ធ្វើឡើងក្រោយខេត្តជាប់មាត់សមុទ្រមួយនេះ កំពុងផ្ទុះការឆ្លងខ្លាំងនៃជំងឺកូវីដ-១៩។ ការធ្វើបែបនេះ គឺដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩ ពីខេត្តមួយទៅខេត្តមួយ ហើយមកទល់នឹងថ្ងៃទី ២០ ខែមីនានេះ ខេត្តព្រះសីហនុនៅបន្ដបិទនៅឡើយ។
-ថ្ងៃទី១១ មីនា ច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ ត្រូវបានបង្កើតឡើង
ស្របពេលប្រទេសកម្ពុជាកំពុងទទួលរងនូវការឆ្លងជំងឺកូវីដ-១៩ ខ្លាំង ក្នុងសហគមន៍ គណៈរដ្ឋមន្ត្រីបានបើកកិច្ចប្រជុំគណៈអចិន្ត្រៃយ៍បន្ទាន់មួយនៅថ្ងៃទី២៨ ខែកុម្ភៈ ឆ្នាំ២០២១ដើម្បីពិភាក្សាលើសេចក្តីព្រាងច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ផ្សេងទៀត។
ក្រោយពិនិត្យ និងដំណើរការនីតិវិធីបានប្រមាណ១០ថ្ងៃ ច្បាប់ថ្មីនេះ ត្រូវបានសម្តេច សាយ ឈុំ ប្រមុខរដ្ឋស្តីទីចុះហត្ថលេខានៅថ្ងៃទី១១ ខែមីនា ឆ្នាំ២០២១។ មួយថ្ងៃបន្ទាប់នោះ សម្តេច ហ៊ុន សែន នាយករដ្ឋមន្ត្រីនៃកម្ពុជា បានដាក់ចេញអនុក្រឹត្យស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ផ្សេងទៀត ឲ្យប្រើប្រាស់ជាផ្លូវការផងដែរ។
-ថ្ងៃទី១៦ ខែមីនា កម្ពុជារកឃើញអ្នកឆ្លងជំងឺកូវីដ-១៩ថ្មី ចំនួន១០៥នាក់ ដែលជាចំនួនច្រើនបំផុតមិនធ្លាប់មាន
ក្រសួងសុខាភិបាលនៅថ្ងៃទី១៦ ខែមីនា ឆ្នាំ២០២១ បានប្រកាសពីការរកឃើញអ្នកឆ្លងជំងឺកូវីដ-១៩ថ្មី ចំនួន១០៥នាក់ ដែលសុទ្ធសឹងជាអ្នកពាក់ព័ន្ធ នឹងព្រឹត្តិការណ៍សហគមន៍ ២០កុម្ភៈ។ នេះជាចំនួនដ៏ច្រើនបំផុតមិនធ្លាប់មាន តាំងពីប្រទេសកម្ពុជាផ្ទុះឆ្លងកូវីដជាលើកដំបូងតាំងពីខែមករា ឆ្នាំ២០២០មក។
គិតត្រឹមថ្ងៃទី២០ កុម្ភៈ ឆ្នាំ២០២១ ដែលជាខួប១ខែនៃព្រឹត្តិការណ៍សហគមន៍២០កុម្ភៈ កម្ពុជារកឃើញអ្នកឆ្លងជំងឺកូវីដ-១៩ពាក់ព័ន្ធព្រឹត្តិការណ៍នេះសរុបចំនួន ១.១១៥នាក់ ខណៈដែលអ្នកស្លាប់មាន ចំនួន ៣នាក់។ រីឯចំនួនអ្នកជាសះស្បើយវិញមាន ៤៣១នាក់។ ប៉ុន្តែបើគិតអ្នកឆ្លងជំងឺកូវីដ-១៩ នៅកម្ពុជាសរុបមានចំនួន ១.៦៣២នាក់ និងមានអ្នកជាសះស្បើយ៩៣៥នាក់។
-ថ្ងៃទី១១ និង ១៩ ខែមីនា កម្ពុជាមានអ្នកស្លាប់ដោយសារជំងឺកូវីដ-១៩ ចំនួន៣នាក់
ក្រសួងសុខាភិបាលកាលពីថ្ងៃទី១១ ខែមីនា បានប្រកាសពីករណីស្លាប់ដោយសារជំងឺកូវីដ-១៩ ជាលើកដំបូង ដោយកើតឡើងបុរសវ័យ៥០ឆ្នាំជនជាតិខ្មែរម្នាក់ ដែលជាតៃកុងឡានរបស់ជនជាតិចិន ដែលមានផ្ទុកជំងឺកូវីដ-១៩។
បន្ទាប់មកនៅថ្ងៃទី១៩ មីនា ក្រសួងសុខាភិបាលបានប្រកាសករណីស្លាប់ដោយសារជំងឺកូវីដ-១៩ចំនួនពីរករណីផ្សេងគ្នាជាបន្តបន្ទាប់។ ករណីទាំងពីរនេះបានកើតឡើងលើស្ត្រីខ្មែរវ័យ ៦២ឆ្នាំ ដែលជាភរិយារបស់តារាចម្រៀងជើងចាស់ ហួរ ឡាវី និងមួយទៀត កើតលើបុរសជនជាតិខ្មែរវ័យ៤៦ឆ្នាំ នៅសង្កាត់បឹងសាឡាង ខណ្ឌទួលគោក រាជធានីភ្នំពេញ។
សូមបញ្ជាក់ថា ព្រឹត្តិការណ៍សហគមន៍២០កុម្ភៈ ត្រូវបានក្រសួងសុខាភិបាល ក៏ដូចជាអង្គការសុខភាពពិភពលោកបានអះអាងថា គឺការឆ្លងចូលសហគមន៍ធ្ងន់ធ្ងរជាង២លើកមុនៗដែលកម្ពុជាធ្លាប់ជួបប្រទះ។លោស្រីវេជ្ជបណ្ឌិត លី អៃឡាន តំណាងអង្គការសុខភាពពិភពលោកប្រចាំកម្ពុជា បានមានប្រសាសន៍ថា «សោកនាដកម្មនៃការបាត់បង់ជីវិតជាលើកដំបូងដោយសារជំងឺកូវីដ-១៩ ជាសារក្រើនរំឭកយើងទាំងអស់គ្នាអំពីភាពធ្ងន់ធ្ងរនៃជំងឺនេះ។ ជំងឺនេះ អាចវាយប្រហារយើងគ្រប់គ្នានៅគ្រប់ពេលវេលា»។
លោកជំទាវ ឱ វណ្ណឌីន អ្នកនាំពាក្យក្រសួងសុខាភិបាល បានមានប្រសាសន៍ដែរថា «ពេលនេះជាស្ថានភាពអាសន្នមួយ។ យើងគ្រប់គ្នាត្រូវតែអនុវត្តវិធានការការពារជាចាំបាច់ ដើម្បីកាត់បន្ថយហានិភ័យនៃការឆ្លងជំងឺកូវីដ-១៩ និងដើម្បីកាត់ផ្ដាច់ខ្សែចម្លងជំងឺនេះ ឲ្យបានកាន់តែឆាប់រហ័ស តាមដែលអាចធ្វើទៅបាន»។
លោកជំទាវ ក៏បានអំពាវនាវឲ្យប្រជាពលរដ្ឋទាំងអស់ត្រូវអនុវត្តវិធានការ ៣ការពារ និង៣កុំ ដូចជាត្រូវពាក់ម៉ាស់ឲ្យបានត្រឹមត្រូវ លាងសម្អាតដៃជាប្រចាំជាមួយនឹងសាប៊ូ ឬអាល់កុល ជែល និងរក្សាគម្លាតពីគ្នាឲ្យបានយ៉ាងតិច១ម៉ែត្រកន្លះ និងមិនត្រូវទៅកន្លែងដែលបិទជិត មិនមានខ្យល់ចេញចូលគ្រប់គ្រាន់ កន្លែងមានមនុស្សច្រើនអ៊ូអរ មិនត្រូវប៉ះពាល់គ្នា ចាប់ដៃគ្នា ឬក៏ឱបគ្នាឡើយ៕
None
