តើតម្លៃប្រេងមានការប្រែប្រួលយ៉ាងណា ក្រោយអ៊ីស្រាអែលបើកការវាយប្រ.ហារសងសឹកអ៊ីរ៉ង់?

ការវាយប្រហារសងសឹករបស់អ៊ីស្រាអែល មកលើអ៊ីរ៉ង់ ចំនួន២០គោលដៅ នៅទូទាំងប្រទេស ត្រូវបានលោក ម៉ាស៊ូត ភេហ្សេខេន ( Masoud Pezeshkian) ប្រធានាធីបតីអ៊ីរ៉ង់ អះអាងថា បានធ្វើឱ្យមនុស្ស៤នាក់ស្លាប់ តែបានបង្កជាប៉ះពាល់តិចតួចប៉ុណ្ណោះ ស្របពេលដែលទីផ្សារប្រេងពិភពលោកមានការប្រែប្រួលតិចតួចនៅឡើយ។ តាមសេចក្តីរាយការណ៍របស់សារព័ត័មាន the National បានឲ្យដឹងថា ការវាយប្រហារនេះ គឺពិតជារំខានដល់ការផ្គត់ផ្គង់ពិភពលោក ប៉ុន្តែទោះបីជាយ៉ាងណាក៏ដោយតម្លៃប្រេងមិនទាន់ឡើងខ្លាំងនៅឡើយទេ ។ ក្រោយការវាយប្រហារតម្លៃប្រេងឆៅនៅទីផ្សារអង់គ្លេស ដែលជាទីផ្សារប្រេងពីរភាគបីរបស់ពិភពលោកបានកើនឡើងត្រឹមតែ២,២៥%ប៉ុណ្ណោះ ដោយតម្លៃប្រេងឆៅមានតម្លៃជាង៧៦ដុល្លារក្នុងមួយបារ៉ែល ខណៈដែលតម្លៃប្រេងឆៅនៅទីផ្សារសហរដ្ឋអាម៉េរិក បានឡើងថ្លៃ២,២៧% ដែលជំរុញឱ្យតម្លៃប្រេងឡើងដល់ជិត៧២ដុល្លារក្នុងមួយបារ៉ែល។

លោក វាន់ដាណា ហារី ( Vandana Hari) នាយកប្រតិបត្តិក្រុមហ៊ុន Vanda Insights មានមូលដ្ឋាននៅប្រទេសសិង្ហបុរី បានថ្លែងថា ប្រសិនបើមិនមានការវាយប្រហារសងសឹកទេនោះ តម្លៃប្រេងឆៅអាចធ្លាក់ចុះដល់រង្វង់៧០ដុល្លារនៅក្នុងមួយបារ៉ែល ប៉ុន្តែផ្ទុយទៅវិញក្រោយអ៊ីស្រាអែលបើកការវាយប្រហារលើអ៊ីរ៉ង់ ដែលបានវាយប្រហារខ្លួនកាលពីដើមខែតុលា ដោយមីស៊ីលប្រមាណជា២០០គ្រាប់ បានធ្វើឲ្យការប៉ាន់ប្រមាណពីតម្លៃប្រេងមានការប្រែប្រួល។

ដោយឡែក លោក ចូសេព ដារ៉េ (Joseph Dahrieh) អ្នកគ្រប់គ្រងនៅក្រុមហ៊ុនឈ្មួញជើងសាមួយបាននិយាយថា ប្រសិនប្រទេសទំាងពីរបើកការវាយប្រហារសងសឹកដាក់គ្នាបន្តទៀតនោះ អាចជំរុញឲ្យតម្លៃប្រេងនៅលើទីផ្សារនឹងកើនឡើង ហើយរិតតែធ្ងន់ធ្ងរ ជាពិសេសប្រសិនបើភាគីផ្សេងទៀតត្រូវបានទាញចូលទៅក្នុងជម្លោះនេះ។ លោកបានបន្តថា ក្នុងពេលជាមួយគ្នានេះ កត្តាផ្សេងទៀតអាចបន្តជះឥទ្ធិពលលើទីផ្សារ ដូចជាការប្រែប្រួលតម្រូវការប្រេងនៅប្រទេសមហាអំណាចសេដ្ឋកិច្ចកំពូលទាំងពីរ គឺចិន និងសហរដ្ឋអាម៉េរិក។ បើតាមការអះអាងរបស់អ្នកជំនាញរូបនេះការប្រើប្រាស់ប្រេងឆៅរបស់ប្រទេសចិនបានបង្ហាញពីសញ្ញាធ្លាក់ចុះនៅប៉ុន្មានខែថ្មីៗនេះ ដែលអ្នកវិភាគសន្មតថា ជាការធ្លាក់ចុះនៃសេដ្ឋកិច្ច និងការផ្លាស់ប្តូររយៈពេលវែងឆ្ពោះទៅរកការប្រើប្រាស់យានយន្តអគ្គិសនី។

គួររំលឹកថា ការវាយប្រហារសងសឹករបស់អ៊ីស្រាអែល មកលើអ៊ីរ៉ង់ នៅព្រឹកថ្ងៃសៅរ៍សប្តាហ៍មុន គឺសំដៅប្រឆាំងនឹងមូលដ្ឋានយោធានៅក្នុងខេត្តអ៊ីឡាម (Ilam) ខេត្តខូសេស្តាន ( Khuzestan) និងទីក្រុងតេអេរ៉ង់៕

ដោយៈ សរ សុជាតិ