សេចក្តីថ្លែងការណ៍ពីមជ្ឈមណ្ឌលគ្រប់គ្រង និងបង្ការជំងឺឆ្លងរបស់ចិនចេញផ្សាយកាលពីថ្ងៃសៅរ៍ទី២១បានឱ្យដឹងថា នៅចន្លោះថ្ងៃទី១៣ដល់ថ្ងៃទី១៩ខែមករា អ្នកស្លាប់ដោយសារជំងឺកូវីដ១៩ក្នុងប្រទេសចិន មានប្រមាណជាង១ម៉ឺន២ពាន់នាក់បន្ថែមទៀត។ នេះជាការប្រកាសតួលេខអ្នក ស្លាប់ដ៏ច្រើនលើកទីពីរហើយ បន្ទាប់ពីការទម្លាក់ចោលវិធានការសូន្យកូវីដ និងនៅបន្ទាប់ពីទិន្នន័យដំបូងរបស់ក្រុងប៉េកាំងបង្ហាញថា ចន្លោះពីថ្ងៃទី៨ខែធ្នូដល់ថ្ងៃទី១២ខែមករាមានអ្នក ស្លាប់ប្រមាណជិត៦ម៉ឺននាក់មានជាប់ទាក់ទងនឹងកូវីដ១៩ នៅតាមមន្ទីរពេទ្យក្នុងប្រទេសចិន។
ការបង្ហាញទិន្នន័យជាថ្មីនេះ ធ្វើឡើងដើម្បីឆ្លើយតបនឹង អង្គការសុខភាពពិភពលោក ដែលជំរុញឱ្យទីក្រុងប៉េកាំងបញ្ចេញព័ត៌មានលម្អិតបន្ថែម អំពីស្ថានភាពជំងឺកូវីដ១៩ក្នុងប្រទេសរបស់ខ្លួន ខណៈដែលវីរុសនេះរីករាលដាលយ៉ាងឆាប់រហ័សពាសពេញប្រទេសចិន បន្ទាប់ពីការលុបចោលការរឹតបន្តឹងវិធានការសូន្យកូវីដ។
ទោះយ៉ាងណា មកទល់នឹងពេលនេះ ចិនផ្តល់ឱ្យតែតួលេខអ្នកស្លាប់ប៉ុណ្ណោះ ខណៈទិន្នន័យផ្សេងទៀតនៅមានភាពខ្វះខាតដដែល ហើយតួលេខស្លាប់នេះទៀតសោត មិនបានរាប់ករណីស្លាប់នៅតាមផ្ទះ និងកន្លែងថែទាំមនុស្សចាស់ឡើយ។ ដូច្នេះ មានការសង្ស័យថា ចំនួនអ្នកស្លាប់ពិតប្រាកដអាចខ្ពស់ជាងនេះ។
ដោយឡែកលោក អ៊ូ ជុនយូវ (Wu Zunyou) ប្រធានផ្នែករោគរាតត្បាតនៃមជ្ឈមណ្ឌលគ្រប់គ្រង និងបង្ការជំងឺរបស់ចិន បានបង្ហោះនៅក្នុងគណនី Weibo កាលពីចុងសប្តាហ៍មុនថា ៨០% នៃចំនួនប្រជាជនសរុបទូទាំងប្រទេស បានឆ្លងកូវីដ១៩ នៅអំឡុងការផ្ទុះឡើងវិញនូវជំងឺកូវីដនាពេលបច្ចុប្បន្ននេះ។ គួរបញ្ចាក់ថា ប្រទេសចិនមានប្រជាជនសរុបចំនួន ១,៤១ ពាន់លាននាក់នៅចុងឆ្នាំ២០២២ ដូចនេះ មនុស្សជាង ១ពាន់១រយលាននាក់បានឆ្លងវីរុសនេះរហូតមកដល់ពេលនេះ។ ទោះយ៉ាងណា លោក Wu មិនបានរៀបរាប់លម្អិតអំពីរបៀបដែលតួលេខនេះត្រូវបានគេគណនាចេញមកនោះទេ។
អត្ថបទគួរអាន
ទោះប្រឈមមុខនឹងករណីឆ្លងនិងស្លាប់កើនឡើង អាជ្ញាធរចិនកំពុងជំរុញការងារ ដើម្បីឱ្យមានការស្ទុះងើបឡើងវិញនៃសេដ្ឋកិច្ច បន្ទាប់ពីមានការរឹតបន្តឹងអស់រយៈពេលបីឆ្នាំមកនេះ។ សេដ្ឋកិច្ចចិនមានកំណើនត្រឹមតែ៣%កាលពីឆ្នាំ២០២២ ដែលជាល្បឿនយឺតបំផុតចាប់តាំងពីទសវត្សរ៍ឆ្នាំ១៩៧០មក។
កាលពីសប្តាហ៍មុន ឧបនាយករដ្ឋមន្ត្រី លោក លៀវ ហឺ (Liu He) បានថ្លែងនៅក្នុងកិច្ចប្រជុំប្រចាំឆ្នាំរបស់វេទិកាសេដ្ឋកិច្ចពិភពលោកនៅទីក្រុង Davos ប្រទេសស្វីសថា កំណើនសេដ្ឋកិច្ចចិននឹងស្ទុះងើបឡើងដល់កម្រិតមុនការរាតត្បាត បន្ទាប់ពីមេរោគឆ្លង ធ្លាក់ចុះពីកម្រិតដែលខ្ពស់បំផុត។
ដោយឡែកប្រធានាធិបតីចិនលោក ស៊ី ជីនពីង បានលើកឡើងពីការព្រួយយបារម្ភពីការរីករាលដាលនៃជំងឺនេះនៅតាមទីជនបទ ដោយសារនៅតាមភូមិឃុំដាច់ស្រយាលភាគច្រើនមិនសូវមានវេជ្ជបណ្ឌិតដែលមានបទពិសោធន៍ និងឧបករណ៍ដូចជា បំពង់ខ្យល់អុកស៊ីសែន ដើម្បីជួយអ្នកជំងឺធ្ងន់ធ្ងរនោះទេ ដូចនេះ ត្រូវការធ្វើដំណើររាប់សិបគីឡូទើបដល់កន្លែងដែលមានពេទ្យជំនាញ។
យោងតាមការព្យាករណ៍ថ្មីរបស់ក្រុមហ៊ុន Airfinity អ្នកស្លាប់ដោយសារជំងឺកូវីដ១៩ នឹងកើនឡើងដល់ ៣៦,០០០ នាក់ក្នុងមួយថ្ងៃ ដោយការព្យាករនេះកើនឡើងពីការព្យាករលើកមុន ១១,០០០ នាក់ក្នុងមួយថ្ងៃ៕
អត្ថបទ ៖ សារៀម លក្ខិណា
