លោក លី សូដេត សេដ្ឋកិច្ចវិទូជាន់ខ្ពស់ នៃធនាគារពិភពលោកប្រចាំកម្ពុជា បានលើកឡើងថា មកទល់ពេលនេះ ជញ្ជីងតម្រូវការនៅក្នុងវិស័យសំណង់បានធ្លាក់ចុះយ៉ាងខ្លាំង បើធៀបនឹងការផ្គត់ផ្គង់ដ៏ច្រើនលើសលប់នាពេលកន្លងមក ដែលជាហេតុធ្វើឱ្យតម្លៃអចលនទ្រព្យនៅលើទីផ្សារបន្តដាំក្បាលចុះ។
ស្ថិតក្រោមសម្ពាធនេះបានជំរុញឱ្យអ្នកជំនាញរូបនេះវាយតម្លៃថា វិស័យអចលនទ្រព្យកម្ពុជា ទំនងជាមិនអាចងើបឡើងវិញក្នុងរយៈពេលខ្លីខាងមុខនោះឡើយ។ សេដ្ឋកិច្ចវិទូជាន់ខ្ពស់រូបនេះបានផ្តល់ជាគំនិតថា ដើម្បីដោះស្រាយវិបត្តិនេះឱ្យមានប្រសិទ្ធភាព លុះត្រាតែកម្ពុជា បង្កើតយន្តការរំលាយការផ្គត់ផ្គង់ចាស់ ដោយបង្កើនតម្រូវការថ្មីៗ តាមរយៈការបើកទូលាយនូវគោលនយោបាយទាក់ទាញជនបរទេសឱ្យចូលមកស្នាក់នៅ រស់នៅ និងផ្តល់សិទ្ធិកាន់កាប់អចលនទ្រព្យឱ្យកាន់តែមានភាពបត់បែន។
ដោយឡែក លោក ស៊ា ឆៃលីន អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានគូសបញ្ជាក់ថា វិស័យអចលនទ្រព្យកម្ពុជា ទាំងមូល មិនទាន់ធ្លាក់ចូលក្នុងវិបត្តិធ្ងន់ធ្ងររហូតដល់ថ្នាក់គាំងលែងដើរនោះទេ ពោលគឺបច្ចុប្បន្នទីផ្សារកំពុងស្ថិតក្នុងដំណាក់កាលស្វ័យកែសម្រួល។ ជាការកត់សម្គាល់របស់អ្នកជំនាញរូបនេះ គម្រោងណាដែលមានគុណភាពស្តង់ដា និងស្ថិតនៅលើទីតាំងដែលមានសក្តានុពលនៅតែអាចស្រូបទាញតម្រូវការ។ លោកបានបន្ថែមថា ការសម្របសម្រួលផ្នែកគោលនយោបាយ ឬការផ្តល់សិទ្ធិកាប់ដល់ជនបរទេសបន្ថែម ក៏នឹងក្លាយជាឧបករណ៍ដ៏មានឥទ្ធិពលក្នុងការទាក់ទាញលំហូរទុនវិនិយោគពីក្រៅប្រទេសផងដែរ។
គួរបញ្ជាក់ថា វិស័យអចលនទ្រព្យកម្ពុជា នៅឆ្នាំ២០២៦ ត្រូវបានក្រសួងសេដ្ឋកិច្ច និងហិរញ្ញវត្ថុព្យាករថា នឹងមាននិន្នាការថមថយដោយរំពឹងមានកំណើនក្នុងអត្រា០,៦% ទាបជាងឆ្នាំ២០២៥ ដែលមានអត្រាកំណើន១,១%។ ការថមថយនេះ គឺបណ្តាលមកពីផលប៉ះពាល់អវិជ្ជមាននៃភាពមិនច្បាស់លាស់នៃសេដ្ឋកិច្ចសកល រួមទាំងឥទ្ធិពល នៃការបង្ក្រាបការឆបោកតាមប្រព័ន្ធបច្ចេកវិទ្យា ដែលបានជះស្រមោលអវិជ្ជមានមកលើសកម្មភាពទិញ-លក់ជារួមក្នុងទីផ្សារ ជាពិសេសទៅលើផ្នែកអគារការិយាល័យ និងអគារប្រើប្រាស់ចម្រុះតែម្តង៕
អត្ថបទ៖ បូ ដូឡា
