លោក ភោក ភា កសិករម្នាក់នៅស្រុកគិរីវង់ ខេត្តតាកែវ បានបញ្ជាក់ប្រាប់ខេមបូណូមីសថា នៅប៉ុន្មានថ្ងៃចុងក្រោយនេះតម្លៃស្រូវនៅខេត្តតាកែវមានការធ្លាក់ចុះជាបន្តបន្ទាប់ពី ៤០ទៅ៥០រៀលក្នុងមួយគីឡូក្រាម។ ជាក់ស្តែង នៅថ្ងៃអាទិត្យចុងសប្ដាហ៍មុន ស្រូវអ៊ីអ៊ា(៨៥)លក់ចេញក្នុងតម្លៃ ៧៣០រៀលក្នុង១គីឡូក្រាម នៅថ្ងៃចន្ទដើមសប្ដាហ៍នេះ លក់ចេញក្នុងតម្លៃ៧១០រៀល ខណៈដែលប្រភេទស្រូវ OM លក់ចេញ៨២០រៀលក្នុង១គីឡូក្រាមធ្លាក់មកនៅត្រឹម៨០០រៀលក្នុង១គីឡូក្រាម។ ការធ្លាក់ចុះនេះត្រូវបាន លោក ភោក ភា កត់សម្គាល់ឃើញថា គឺបន្ទាប់ពីមានការរឹតបន្តឹងនៅចក្រព្រំដែនអន្តរជាតិភ្នំដិន ដែលធ្វើឲ្យមានការកកស្ទះក្នុងការដឹកស្រូវពីកម្ពុជាទៅវៀតណាម។
កសិកររូបនេះត្អូញត្អែរថា បញ្ហាតម្លៃស្រូវធ្លាក់ថ្លៃនេះ វាអាចធ្វើឲ្យលោកប្រឈមនឹងបាត់បង់ប្រាក់ចំណូលរហូតដល់ពាក់កណ្តាលនៅឆ្នាំនេះ។ លោកអះអាងថា ជារៀងរាល់ឆ្នាំ លោក អាចទទួលបានប្រាក់ចន្លោះពី៥លានរៀលទៅ៦លានរៀលពីការធ្វើស្រែលើផ្ទៃដី៥ហិកតា តែឆ្នាំនេះទទួលបានតែ២ទៅ៣លានរៀលតែប៉ុណ្ណោះ។
អត្ថបទទាក់ទង!
កសិករម្នាក់ទៀតសុំមិនបញ្ចេញឈ្មោះ បានអះអាងដូចគ្នាថា តម្លៃស្រូវបានធ្លាក់ចុះពី ១០ទៅ២០រៀលក្នុង១គីឡូក្រាមស្ទើររៀងរាល់ថ្ងៃនៅប៉ុន្មានថ្ងៃចុងក្រោយនេះ ដែលកត្តានេះអាចធ្វើឲ្យលោកប្រឈមនឹងខាតនៅឆ្នាំនេះ ដ្បិតតម្លៃជី និងថ្នាំសម្លាប់សត្វល្អិតនិងតរួមទាំងំងថ្នាំសង្កូវផ្សេងៗនាំសម្លាប់សត្វល្អិតផ្សេងងថ់ចន្លោះពី៥លានរៀលទៅ៦លានរៀលពីការធ្វើស្រែលើផ្ទៃដីចាថិតថ្នាំសង្កូវផ្សេងៗបានឡើងថ្លៃខ្ពស់។ លោកអះអាងថា ជី ស ១បាវលោកធ្លាប់ទិញតែជាង៦ម៉ឺនរៀល តែឆ្នាំនេះឡើងដល់ជាង១០ម៉ឺនរៀលឯណោះ។
កសិករធ្វើស្រែលើផ្ទៃដីជាង១០ហិកតារូបនេះ បញ្ជាក់ថា ការធ្លាក់ចុះនូវតម្លៃស្រូវនៅមួយរយៈចុងក្រោយនេះអាចបណ្តាលមកពីការក្រឡុកទីផ្សាររបស់ឈ្មួញឆ្លៀតឱកាសមួយចំនួន បន្ទាប់ពីឃើញមានការរឹតបន្តឹងនៅតាមច្រកព្រំដែន ដែលបង្កឲ្យរថយន្តដឹកពីកម្ពុជាទៅលក់នៅវៀតណាមមានការកកស្ទះនៅតាមព្រំដែនអន្តរជាតិកម្ពុជាវៀតណាម។ កសិកររូបនេះ សង្កេតឃើញថា ទោះបីមានការរឹតបន្តឹងនៅតាមព្រំដែនក៏ពិតមែន ប៉ុន្តែសកម្មភាពទិញស្រូវនៅប្រព្រឹត្តទៅធម្មតា។
ជាមួយគ្នានេះ លោក ញាន ឈួន ឈ្មួញកណ្តាលម្នាក់ដែលទិញស្រូវពីកសិករយកទៅលក់នៅប្រទេសវៀតណាមបានអះអាងថា មូលហេតុដែលធ្វើឲ្យតម្លៃស្រូវនៅខេត្តតាកែវក្បែរព្រំដែនវៀតណាមធ្លាក់ចុះ មិនមែនដោយសារឈ្មួញនៅកម្ពុជាទម្លាក់តម្លៃនោះទេ។ ពោលគឺដោយសារមានការទម្លាក់តម្លៃពីឈ្មួញនៅវៀតណាម ដ្បិតពួកគេបានកាត់បន្ថយការទិញស្រូវពីកម្ពុជា បន្ទាប់ពីនៅតំបន់មួយចំនួននៅវៀតណាមត្រូវបានបិទខ្ទប់ ដោយសារការឆ្លងជំងឺកូវីដ-១៩។
ពាក់ព័ន្ធតម្លៃស្រូវធ្លាក់ចុះនេះដែរ លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាបានបញ្ជាក់ប្រាប់ខេមបូណូមីសថា សហព័ន្ធកំពុងធ្វើការយ៉ាងយកចិត្តទុកដាក់លើបញ្ហានេះ។ តែយ៉ាងណា លោក បានអះអាងថា ការធ្លាក់ចុះតម្លៃស្រូវនេះមិនអាចធ្វើឲ្យកសិករប្រឈមនឹងការខាតដើមនោះទេ ពោលគឺគ្រាន់តែធ្វើឲ្យពួកគេខាតបង់ប្រាក់ចំណេញតែប៉ុណ្ណោះ។ លោកជឿជាក់ថា អ្វីៗនឹងវិលមកភាពល្អប្រសើរឡើងវិញក្នុងពេលឆាប់ខាងមុខនេះ។ លោកបានបន្ថែមថា ស្រូវដែលមានការធ្លាក់ថ្លៃនេះ ភាគច្រើនជាប្រភេទស្រូវស្រាល ដែលមានការពេញនិយមនៅទីផ្សារវៀតណាមតែប៉ុណ្ណោះ។
គួររំលឹកថា រាជរដ្ឋាភិបាលកម្ពុជាបានសម្រេចផ្អាកឲ្យធ្វើដំណើរចូលចូលកម្ពុជា-វៀតណាមរយៈពេល១ខែ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។ ការផ្អាកនេះ ធ្វើឡើងចំពោះចរន្តមនុស្សតែប៉ុណ្ណោះ តែសម្រាប់ការដោះដូរ និងដឹកជញ្ជូនទំនិញអាចប្រព្រឹត្តទៅធម្មតាតាមបែបគន្លងថ្មី។
របាយការណ៍ពីក្រសួងកសិកម្មបានឲ្យដឹងថា នៅ៦ខែពាក់កណ្ដាលឆ្នាំនេះ កម្ពុជាសម្រេចបានការនាំចេញស្រូវទៅវៀតណាមក្នុងទំហំទឹកប្រាក់ជិត២៨០លានដុល្លារ ជាមួយបរិមាណ១លាន៧សែនតោន កើនដល់ទៅជាង ៧២% ធៀបនឹងរយៈពេលដូចគ្នាកាលពីឆ្នាំមុន ខណៈដែលការនាំចេញអង្ករវិញ សម្រេចបានត្រឹមតែប្រមាណ២៨ម៉ឺនតោនប៉ុណ្ណោះ ធ្លាក់ចុះជិត៣០% និងមានក្នុងទំហំទឹកប្រាក់នាំចេញសរុបប្រមាណជាង២៣៧លានដុល្លារ៕
None
