តម្លៃវ៉ាក់សាំង Pfizer សម្រាប់កុងត្រាថ្មីជាមួយអឺរ៉ុបបានកើនឡើងពីប្រហែល ១៨ដុល្លារក្នុងមួយដូស មកដល់ប្រមាណ ២៣ដុល្លារអាមេរិកក្នងមួយដូស។ ដោយឡែក សម្រាប់វ៉ាក់សាំង Moderna បានកើនតម្លៃពីជាង ២២ដុល្លារមកដល់ ២៥.៥០ដុល្លារក្នុងមួយដូស។ នេះតាមការចុះផ្សាយដោយសារព័ត៌មានអាមេរិក Financial Times។
បើតាមការចុះផ្សាយដោយសារព័ត៌មាន Al Jazeera បានឲ្យដឹងដែរថា ការដំឡើងថ្លៃវ៉ាក់សាំងរបស់ក្រុមហ៊ុនអាមេរិកទាំងពីរនេះ គឺមិនមានរឿងអ្វី ដែលមិនប្រក្រតីនោះទេ ពោលបើតាមនិតិវិធីដែលបានព្រមព្រៀងគ្នាក្នុងកិច្ចសន្យាតម្លៃ នៃ ការផ្គត់ផ្គង់វ៉ាក់សាំងតែងមានការប្រែប្រួលនៅពេលដែលគេធ្វើកុងត្រាថ្មីម្តងៗ។
លើសពីនេះទៅទៀត ការដំឡើងថ្លៃវ៉ាក់សាំងរបស់ក្រុមហ៊ុនវ៉ាក់សាំងអាមេរិក Pfizer និង Moderna បានឆ្លុះបញ្ចាំងពីគុណភាពរបស់វាផងដែរ ក្រោយវ៉ាក់សាំងទាំងពីរប្រភេទនេះ ត្រូវបានគេទទួលស្គាល់ថា ជាវ៉ាក់សាំងដែលមានកម្រិតប្រសិទ្ធភាពខ្ពស់ជាងគេ។ ជាមួយគ្នានេះ តម្រូវការនៃវ៉ាក់សាំងទាំងពីរប្រភេទនេះ ក៏កំពុងតែមានតម្រូវការកាន់តែច្រើនឡើងៗផងដែរ ជាពិសេសគឺ វ៉ាក់សាំងប្រភេទ Pfizer តែម្តង។
អត្ថបទទាក់ទង
យ៉ាងណាក៏ដោយចុះ ចំពោះការឆ្លើយតបទៅនឹងការពារមេរោគបំប្លែងថ្មី ឌែលតា ថ្មីៗនេះក្រុមហ៊ុន Pfizer បានស្នើដល់អាជ្ញាធរសុខាភិបាលអាមេរិក ឲ្យមានការអនុញ្ញាតការចាក់វ៉ាក់សាំងដូសទី៣ បន្ថែម ជាដូសជំរុញ ដើម្បីបង្កើនប្រសិទ្ធភាពការពារប្រឆាំងមេរោគបំប្លែងថ្មីនេះ។
វ៉ាក់សាំង Pfizer នេះ ក៏មានការប្រើប្រាស់ជាច្រើននៅប្រទេសលោកខាងលិចផងដែរ ដោយក្នុងនោះ សហភាពអឺរ៉ុបដែលជាអ្នកប្រើប្រាស់វ៉ាក់សាំងរបស់ Pfizer ទើបតែបានប្រកាសពីមហិច្ឆតាចង់សម្រេចឲ្យបាននូវផែនការចាក់វ៉ាក់សាំងទាំងពីរដូស ដល់ពលរដ្ឋរបស់ខ្លួនឲ្យបានគ្រប់ ៧០% មុនរដូវក្តៅឆ្នាំនេះ។
គួរជម្រាបថា កាលពីសប្តាហ៍មុន ក្រុមហ៊ុនអាមេរិក Pfizer ទើបបានប្រកាសពីការបង្កើនគោលដៅប្រាក់ចំណូលប្រចាំឆ្នាំរបស់ខ្លួន ពីចំនួន ២៦ពាន់លានដុល្លារ ឲ្យបានដល់ទៅជាង ៣៣ពាន់លានដុល្លារអាមេរិក ក្នុងពេញមួយឆ្នាំ២០២១នេះ ក្រោយមើលឃើញសន្ទុះប្រាក់ចំណូលដែលបានពីការលក់វ៉ាក់សាំងក្នុងត្រីមានទី២ បានកើនឡើងទ្វេដងបើធៀបទៅនឹងត្រីមាសទី១ឆ្នាំនេះ ៕
None
