ហ្វីលីពីនបន្ថយពន្ធនាំចូលអង្ករ ដើម្បីធានាសន្តិសុខ​ស្បៀងអាហារក្នុងស្រុក

ការិយាល័យប្រធានាធិបតីហ្វីលីពីនឲ្យដឹងថា ការប្រកាសកាត់បន្ថយពន្ធនាំចូលដូចេ្នះ ធ្វើឡើងនៅក្នុងពេលដែលហ្វីលីពីនព្យាយាមរក្សាអតិផរណាឲ្យមានសេ្ថរភាព ជាពិសេសអំឡុងពេលដែលតម្លៃស្រូវ-អង្ករក្នុងពិភពលោកកំពុងហក់ឡើងខ្លាំង រួមផ្សំនឹងទីផ្សារអង្ករក្នុងស្រុកមិនមានភាពច្បាស់លាស់ផងនោះ។ ហ្វីលីពីនជាប្រទេសអ្នកនាំចូលអង្ករធំៗមួយដែរនៅក្នុងតំបន់ ខណៈដែលអង្ករ គឺជាស្បៀងអាហារសំខាន់មួយរបស់ពលរដ្ឋហ្វីលីពីន ក្នុងការទទួលទានប្រចាំថ្ងៃ។ ប្រសិនបើតម្លៃអង្ករលើទីផ្សារអន្តរជាតិកើនឡើង នោះរដ្ឋាភិបាលលោក ដុតទ័តេ នឹងអាចប្រឈមមុខនឹងអសន្តិសុខស្បៀងអាហារ ជាពិសេសអំឡុងពេលវិបត្តិកូវីដ-១៩តែម្តង។

សេចក្តីសម្រេចដោយរដ្ឋាភិបាលហ្វីលីពីន ចុះហត្ថលេខាដោយលោកប្រធានាធិបតី ដុតទ័រតេ បានសម្រេចបញ្ចុះអត្រាពន្ធនាំចូលអង្ករពី ៤០% មកទៅ ៣៥% សម្រាប់ការបញ្ជាទិញមានកូតា ហើយការបញ្ជាទិញក្រៅកូតាតក៏មានការបញ្ចុះអត្រាពន្ធនាំចូលដែរ ដើម្បីធានាបានពីទីផ្សារផ្គត់ផ្គង់អង្ករ រក្សាស្ថិរភាពតម្លៃ និងកាត់បន្ថយសម្ពាធលើអតិផរណា។ 

គួររំឭកថា កាលពីខែមករាដើមឆ្នាំនេះ ក្រសួងកសិកម្មហ្វីលីពីនបានព្យាករថា ខ្លួននឹងត្រូវនាំចូលអង្ករប្រមាណជិត ២លានតោន ដើម្បីបំពេញគ្រប់គ្រាន់ សម្រាប់តម្រូវការក្នុងស្រុកសម្រាប់ឆ្នាំ២០២១នេះ ក្នុងនោះ ៩០%នៃអង្ករសរុបដែលហ្វីលីពីននាំចូល គឺត្រូវបាននាំចូលពីប្រទេសវៀតណាម។

បើគេនិយាយពីទិន្នផលស្រូវក្នុងស្រុករបស់ប្រទេសហ្វីលីពីនវិញ គឺមានការកើនឡើង ២,៦% ពោលគឺកើនដល់ជិត២០លានតោនឯណោះ កាលពីឆ្នាំ២០២០។ ដោយឡែក ណោឆ្នាំ២០២១នេះ ក្រសួងកសិកម្មហ្វីលីពីនក៏បានដាក់គោលដៅផលិតស្រូវឲ្យបានជាង ២០ លាន៥សែនតោន ។

ទោះយ៉ាងណា ការបង្កើនការផលិតទំហំប៉ុណ្ណេះ វានៅមិនទាន់ឆ្លើយតបគ្រប់គ្រាន់តាមតម្រូវការសម្រាប់ពលរដ្ឋទាំងជាង ១១០លាននាក់របស់ហ្វីលីពីនបានទេ ជាហេតុតម្រូវឲ្យហ្វីលីពីននាំចូលអង្ករពីក្រៅប្រទេសបន្ថែម។ ម៉្យាងវិញទៀត ហ្វីលីពីនជាប្រទេសមួយ ដែលច្រើនតែរកគ្រោះដោយគ្រោះធម្មជាតិ ភាគច្រើនមានទឹកជំនន់ និងខ្យល់ព្យុះត្រូពិកជាដើម។ ជាក់ស្តែង មានព្យុះត្រូពិកជាង ២០ តែងវាយប្រហារប្រហារប្រទេសហ្វីលីពីនជារៀងរាល់ឆ្នាំ ភាគច្រើនក្នុងរដូវប្រមូលផល ដែលវាបានបំផ្លាញដំណាំជាច្រើនប្រភេទជាពិសេសស្រូវ និងពោត៕