នៅក្នុងពិធីសម្ពោធមជ្ឈមណ្ឌលកម្សាន្តខ្នាតយក្សដំបូងគេនៅកម្ពុជា ព្រីនស៍ ម៉ាណ័រ នៅថ្ងៃទី០៧ ខែតុលាឆ្នាំ២០២០នេះ សម្តេច ហ៊ុន សែន បានថ្លែងថា ម្សិលមិញនេះ លោកបានសម្រេចយល់ព្រមលើគម្រោង៣ ក្នុងការស្តារឡើងវិញចំពោះផ្លូវជាតិសំខាន់ៗ ព្រោះថា បានចរចាត្រូវថ្លៃអស់ហើយ។
សម្តេចតេជោ ហ៊ុន សែន បានថ្លែងថា៖« ខ្ញុំសូមជម្រាបឯកឧត្តម វ៉ាង វិនទៀន (ឯកអគ្គរដ្ឋទូតចិនប្រចាំកម្ពុជា) ម្សិលមិញ ខ្ញុំបានសម្រេចគម្រោង៣ សុំលុយពីចិនទៀតហើយ ព្រោះចរចាត្រូវថ្លៃហើយ ទី១ ផ្លូវលេខ៤១ តភ្ជាប់ផ្លូវជាតិលេខ៤ចុះទៅកំពត ទី២ គឺផ្លូវលេខ៣១ នៅកំពត និងទី៣ ផ្លូវជាតិលេខ៣៣ នៅកំពតទៀត អាហ្នឹងយើងបានឯកភាពគ្នាចរចា ស្ថិតនៅក្នុងគម្រោង ហើយបានប្រថាប់ត្រា ចុះហត្ថលេខាឲ្យ អូន ព័ន្ធមុនីរ័ត្ន និងស៊ុន ចាន់ថុលចុះហត្ថលេខា ហើយតែចុះហត្ថលេខាហើយ គឺធ្វើតែម្តង»។
អត្ថបទទាក់ទង
សម្តេចតេជោ បានបន្ថែមថា ហេដ្ឋារចនាសម្ព័ន្ធ ដែលនឹងត្រូវសាងសង់និងជួសជុល ជាបន្ត នឹងបង្កលក្ខណៈកាន់តែងាយស្រួលបន្ថែមទៀត ដល់ការធ្វើដំណើររបស់ប្រជាពលរដ្ឋ ទៅកាន់រមណីយដ្ឋានទេសចរណ៍នានា ដែលនេះ ក៏នឹងអាចជាផ្នែកមួយក្នុងជំរុញកំណើនទេសចរណ៍ក្នុងស្រុក។
យោងតាមរបាយការណ៍ការងារលទ្ធកម្ម សម្រាប់ការងារស្ថាបនាជួសជុលផ្លូវ-ស្ពាន ក្នុងត្រីមាសទី១ ឆ្នាំ២០២០ បានបង្ហាញ ក្រសួងសាធារណការ បានអនុវត្តកិច្ចលទ្ធកម្មចុះកិច្ចសន្យា ការងារស្ថាបនាជួសជុលផ្លូវ-ស្ពាន ដែលប្រើប្រាស់ឥណទានឆ្នាំ២០១៩ សរុបចំនួន១២គម្រោង ដោយគិតជាទឹកប្រាក់ប្រមាណជាជិត៥០ពាន់លានរៀល ស្មើនឹងប្រមាណជាង ១២លានដុល្លារ៕
None
