នៅក្នុងបាឋកថារបស់លោក លោក ហ៊ុន ម៉ានី បានដកស្រង់ប្រសាសន៍របស់លោកនាយករដ្ឋមន្ត្រីសិង្ហបុរី លី សៀនឡុង ថ្លែងក្នុងពេលថ្មីៗ នៅក្នុងកិច្ចប្រជុំកំពូលអាស៊ានលើកទី៣៣ ថា "អាស៊ានប្រហែលជាត្រូវដល់ចំណុចមួយដែលត្រូវជ្រើសរើសមហាអំណាចណាមួយ រវាងមហាអំណាចទាំងពីរ គឺ ចិន និង អាមេរិក"។ អត្ថាធិប្បាយរបស់លោក ហ៊ុន ម៉ានី ត្រូវបានសារព័ត៌មានធំៗនៅប្រទេសថៃ រួមមាន បាងកកប៉ុស្តិ៍ និង The Nation ចុះផ្សាយផងដែរ។
ទាក់ទងនឹងការលើកឡើងដូច្នេះនៅក្នុងបាឋកថារបស់លោក លោក ហ៊ុន ម៉ានី ត្រូវបានអ្នកចូលរួមក្នុងសន្និសីទអន្តរជាតិ ដែលរៀបចំឡើងនៅក្នុងទីក្រុងបាងកក ដោយកាសែត បាងកក ប៉ុស្តិ៍ សួរបញ្ជាក់ពីជំហររបស់លោកជុំវិញបញ្ហានេះ។ លោក ហ៊ុន ម៉ានី បានឆ្លើយថា "ចុងបញ្ចប់ វាមិនមែនជាការដែលត្រូវជ្រើសរើសមិត្តនេះ ឬមិត្តនោះ នោះទេ ពោលគឺជាការជ្រើសរើសប្រយោជន៍ជាតិទៅវិញទេ ទើបជាការត្រឹមត្រូវ... ជាគោលការណ៍ កម្ពុជាស្វាគមន៍គ្រប់មិត្តទាំងអស់"។
ប្រទេសកម្ពុជា ប៉ុន្មានឆ្នាំចុងក្រោយនេះ ត្រូវបានគេមើលឃើញថា មានទំនោរងាកទៅរកមហាអំណាចអាស៊ី គឺប្រទេសចិន ខណៈដែលកម្ពុជាហាក់មានភាពរកាំរកូសខ្លាំងនៅក្នុងទំនាក់ទំនងជាមួយសហរដ្ឋអាមេរិក ដោយនៅមុនការបោះឆ្នោតជាតិឆ្នាំ២០១៨ អង្គការអន្តរជាតិដែលធ្វើការលើវិស័យសិទ្ធិមនុស្ស លទ្ធិប្រជាធិបតេយ្យ និងការបោះឆ្នោតចំនួន ២ ត្រូវបានរដ្ឋាភិបាលកម្ពុជាបញ្ជាឲ្យបិទការិយាល័យនៅក្នុងប្រទេសកម្ពុជា និងបានបណ្ដេញបុគ្គលិកជនជាតិអាមេរិកចេញពីកម្ពុជា។
លោក ហ៊ុន ម៉ានី (រូបខាងឆ្វេងបំផុត) តំណាងរាស្ត្រនៃប្រទេសកម្ពុជា ចូលរួមព្រឹត្តិការណ៍មួយនៅទីក្រុងបាងកក នាថ្ងៃទី២១ វិច្ឆិកា ២០១៨។
តើអ្នកបានអានអត្ថបទនេះ ឬនៅ?
ថ្មីៗនេះ សារព័ត៌មានបរទេសមួយបានផ្សាយព័ត៌មានថា ប្រភពការទូតមួយចំនួនថា ចិនកំពុងសាងសង់កំពង់ផែសម្រាប់ជាមូលដ្ឋានកងទ័ពជើងទឹករបស់ខ្លួន នៅសមុទ្រទឹកជ្រៅនៃខេត្តកោះកុងភាគខាងត្បូងកម្ពុជា ប៉ុន្តែ ដំណឹងនេះ ត្រូវបានរដ្ឋាភិបាលកម្ពុជាច្រានចោលថា ជាដំណឹងមិនពិត និងអះអាងថា កម្ពុជាមិនផ្ដល់មូលដ្ឋានដល់កងទ័ពបរទេសជាដាច់ខាត។
សង្គ្រាមពាណិជ្ជកម្មរវាងមហាអំណាចចិន និងសហរដ្ឋអាមេរិក បានបង្កការព្រួយបារម្ភចំពោះអនាគតតំបន់អាស៊ីអាគ្នេយ៍ ពោលគឺ អាស៊ាន តែម្ដង ដោយមជ្ឈដ្ឋានខ្លះលើកឡើងថា ការដណ្ដើមឥទ្ធិពលគ្នារវាងយក្សទាំងពីរនេះ នៅក្នុងតំបន់នេះ អាចនឹងនាំឲ្យស្ថិរភាពតំបន់នេះមានភាពរង្គោះរង្គើ។
នៅក្នុងកិច្ចប្រជុំកំពូលអាស៊ានលើកទី៣៣ លោក លី សៀនឡុង នាយករដ្ឋមន្ត្រីសិង្ហបុរី ដែលជាប្រធានប្ដូរវេនអាស៊ាន បានព្រមានថា ប្រជាជាតិអាស៊ីអាគ្នេយ៍ (ដែលមាន សិង្ហបុរី, ប្រ៊ុយណេ, ឥណ្ឌូនេស៊ី, ម៉ាឡេស៊ី, ថៃ, មីយ៉ាន់ម៉ា, កម្ពុជា, វៀតណាម, ឡាវ និង ហ្វ៊ីលីពិន) អាចនឹងត្រូវបង្ខំចិត្តជ្រើសរើសយកមួយ រវាង សហរដ្ឋអាមេរិក និង ចិន ខណៈដែលការព្រួយបារម្ភកាន់តែជ្រៅឡើងៗ អំពីជម្លោះដែលមានលក្ខណៈដូចសម័យសង្គ្រាមត្រជាក់ រវាងមហាអំណាចពិភពលោកទាំងពីរនេះ។
លោក លី សៀនឡុង ថ្លែងដូច្នេះថា "កាលៈទេសៈអាចនឹងកើតឡើង នៅពេលដែលអាស៊ាននឹងត្រូវតែជ្រើសរើសខាងនេះ ឬខាងនោះ។ ប៉ុន្តែ ខ្ញុំសង្ឃឹមថា វាមិនកើតឡើងឆាប់ពេកនោះទេ"៕
