លោកឧកញ៉ា ចេង ខេង ប្រធានក្រុមប្រឹក្សាភិបាលសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងជា អគ្គនាយកក្រុមហ៊ុនអចលនទ្រព្យ ស៊ីភីអិល បានលើកឡើងថា បើទោះបីកម្ពុជា ពេលនេះ កំពុងស្ថិតនៅក្នុងវិបត្តិកូវីដ-១៩ ក៏ដោយ តែសកម្មភាពទិញដូរអចលនទ្រព្យនៅកម្ពុជា នៅតែមានការទិញដូរជាធម្មតា ពិសេស គឺអចលនទ្រព្យល្អៗតែម្តង។
លោកឧកញ៉ាបញ្ជាក់ថា វិបត្តិកូវីដ១៩ ជាបញ្ហា ប៉ុន្តែ វាក៏ជាឱកាសសម្រាប់អ្នកវិនិយោគដែលកំពុងត្រូវការអចលនទ្រព្យល្អ អាចស្វែងរកទិញបានងាយស្រួល និងមានតម្លៃស្ថិតនៅក្រោមតម្លៃទីផ្សារផង ដែលនិន្នាការនៃតម្រូវការអចលនទ្រព្យប្រភេទនេះកំពុងមានសកម្មភាពល្អ បន្ទាប់ពីស្ងប់ស្ងាត់មួយរយៈពេលខ្លីដោយសារឥទ្ធិពលនៃជំងឺកូវីដ១៩។
លោកឧកញ៉ាបន្តថា អចលនទ្រព្យដែលស្ថិតនៅក្រោមតម្លៃ៧ម៉ឺនដុល្លារទៅ ១០ម៉ឺនដុល្លារ ការទិញដូរនៅតែមានសកម្មភាពច្រើនដូចមុន។
អត្ថបទទាក់ទង
លោកឧកញ៉ា ចេង ខេង បានឲ្យដឹងទៀតថា ថ្មីៗនេះ ភ្នាក់ងាររបស់ពួកលោកចាប់ផ្តើមរវល់ជាមួយនឹងការងារផ្តល់សេវាកម្មឡើងវិញ ប៉ុន្តែ ចំពោះវិនិយោគធំៗមកពីបរទេសនៅមិនទាន់មានច្រើននោះឡើយ អ្វីដែលជាសកម្មភាពទិញលក់ច្រើនក្នុងអំឡុងខែឧសភានេះ គឺភាគច្រើនបំផុត ជាវិនិយោគទុនក្នុងស្រុក។
យ៉ាងណាក៏ដោយចុះ បើទោះបីជាវិស័យអចលនទ្រព្យមានសកម្មភាពដោះដូរមានភាពមមាញឹកឡើងវិញបន្តិចនៅពេលនេះក៏ពិតមែន តែលោកឧកញ៉ានៅតែអះអាងថា សកម្មភាពទិញដូរនេះក៏នៅតែតិចជាងឆ្នាំទៅមិញដដែលចន្លោះពី២០ ទៅ ៣០ភាគរយ។
លោកឧកញ៉ាបន្ថែមថា សកម្មភាពទិញលក់អចលនទ្រព្យស្ថិតនៅក្នុងកម្រិតប៉ុណ្ណឹងនៅតែអាចចាត់ទុកធម្មតាសម្រាប់ទីផ្សារអចលនទ្រព្យកម្ពុជា ខណៈនៅប្រទេសផ្សេងៗទៀតក្នុងតំបន់អាស៊ាន និងអាមេរិកវិញ ពេលនេះកំពុងស្ងប់ស្ងាត់ និងបើធៀបមកកម្ពុជាវិញ កម្ពុជាជាប្រទេសស្ថិតក្នុងចំណាត់ថ្នាក់ល្អជាងគេ៕
