លោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា កត់សម្គាល់ឃើញថា តម្លៃអចលនទ្រព្យតែងតែមានការប្រែប្រួលទៅតាមកំណើនសេដ្ឋកិច្ច និងភាពរីកចម្រើននៃវិស័យហេដ្ឋារចនាសម្ព័ន្ធនៅតាមតំបន់នីមួយៗ។
ជាក់ស្ដែង តំបន់ស្ថិតក្នុងផែនការអភិវឌ្ឍន៍របស់រដ្ឋាភិបាល នៅប៉ែកខាងត្បូងរាជធានីភ្នំពេញ ដែលកំពុងអភិវឌ្ឍន៍ហេដ្ឋារចនាសម្ព័ន្ធសំខាន់ៗជាច្រើន ជាពិសេសអាកាសយានដ្ឋានអន្តរជាតិ តេជោ បាននិងកំពុងទាក់ទាញការវិនិយោគយ៉ាងច្រើនរាប់ចាប់តាំងពីវិស័យឧស្សាហកម្ម ពាណិជ្ជកម្ម និងលំនៅឋាន។
បើតាមអ្នកជំនាញរូបនេះ នៅមុនឆ្នាំ២០១៧ តម្លៃដីនៅប៉ែកខាងត្បូងរាជធានីភ្នំពេញ ស្ថិតក្នុងរង្វង់ប្រមាណ១០ដុល្លារក្នុង១ម៉ែត្រការ៉េ តែបច្ចុប្បន្នដីនៅក្នុងតំបន់ខ្លះ មានតម្លៃចន្លោះពី១០០ដុល្លារ ទៅ២០០ដុល្លារ ក្នុង១ម៉ែត្រការ៉េ។
អ្នកជំនាញរូបនេះវាយតម្លៃថា តម្លៃអចលនទ្រព្យនៅប៉ែកខាងត្បូងរាជធានីភ្នំពេញ នឹងមានការកើនឡើងបន្ថែមទៀត នៅពេលមានមនុស្សរស់នៅ និងទទួលបានគម្រោងវិនិយោគកាន់តែច្រើននាពេលខាងមុខ។
អត្ថបទគួរអាន
លោកស្រី អាន សុធីតា នាយិកាគ្រប់គ្រងក្រុមហ៊ុនអចលនទ្រព្យ PropNex សង្កេតឃើញថា គម្រោងដែលរីកដុះដាលនៅប៉ែកខាងត្បូងរាជធានីភ្នំពេញ ភាគច្រើនជាប្រភេទលំនៅឋាន ខណៈអគារពាណិជ្ជកម្មភាគច្រើនស្ថិតនៅលើផ្លូវ៦០ម៉ែត្រ ឬមហាវិថីសម្ដេចតេជោ ហ៊ុន សែន។ បើតាមអ្នកជំនាញរូបនេះ នៅមួយរយៈចុងក្រោយនេះ ស្ថានភាពតម្លៃអចលនទ្រព្យមានការប្រែប្រួលតាមទីកន្លែង។ ជាក់ស្ដែងដីប្រភេទលំនៅឋានមានតម្លៃចន្លោះពី១០០ទៅ២០០ដុល្លារក្នុង១ម៉ែត្រការ៉េ និងដីប្រភេទឧស្សាហកម្មមានតម្លៃចន្លោះពី៥០ដល់១៥០ដុល្លារក្នុង១ម៉ែត្រការ៉េ។
ជុំវិញស្ថានភាពអចលនទ្រព្យនេះដែរ ឧកញ៉ា ចេង ខេង អគ្គនាយកក្រុមហ៊ុន CPL បានលើកទឹកចិត្តឱ្យអ្នកចង់វិនិយោគក្នុងវិស័យអចលនទ្រព្យតែគ្មានជំនាញ គួរពឹងពាក់អ្នកជំនាញ ឬក្រុមហ៊ុន ដែលផ្តល់សេវាកម្មក្នុងវិស័យនេះ ហើយការជ្រើសរើសក្រុមហ៊ុនទៀតសោត ត្រូវស្វែងរកក្រុមហ៊ុនណា ដែលមានអាជ្ញាប័ណ្ណ និងទទួលស្គាល់ពីអាជ្ញាធរត្រឹមត្រូវ ដើម្បីជៀសវាងខាតបង់ថវិកា។
គួរបញ្ជាក់ថា អាកាសយាន្តដ្ឋានអន្តរជាតិ តេជោ ដែលកំពុងមមាញឹកជាមួយការសាងសង់ ត្រូវបានអភិវឌ្ឍន៍លើផ្ទៃដីទំហំ២,៦០០ហិចតា ដោយមានចម្ងាយប្រមាណ១៩គីឡូម៉ែត្រពីរាជធានីភ្នំពេញ។ អាកាសយានដ្ឋានអន្តរជាតិលំដាប់ 4F មួយនេះ ត្រូវបានគេរំពឹងថា នឹងក្លាយជាផ្នែកមួយដ៏សំខាន់សម្រាប់បម្រើឱ្យការអភិវឌ្ឍន៍សេដ្ឋកិច្ច និងការធ្វើពាណិជ្ជកម្មរបស់កម្ពុជា។ គិតត្រឹមដំណាច់ខែមីនា ឆ្នាំ២០២៤ ព្រលានយន្តហោះដែលមានតម្លៃវិនិយោគប្រមាណ១ពាន់៥រយលានដុល្លារអាម៉េរិកមួយនេះ សម្រេចការសាងសង់បានជិត៧០%ហើយ ដោយគ្រោងដាក់ឱ្យដំណើរការនៅអំឡុងឆមាសទី១ឆ្នាំ២០២៥ ខាងមុខ៕
អត្ថបទ៖ បូ ដូឡា
None
