ការចេញមុខរួមគ្នាផលិតវ៉ាក់សាំងពីសំណាក់ប្រទេសទាំង៤នេះ គឺធ្វើឡើងនៅចំពេលដែលប្រទេសចិនបាននិងកំពុងផលិតវ៉ាក់សាំង និងផ្គត់ផ្គង់ទៅកាន់ប្រទេសជាច្រើនទូទាំងសកលលោករួចទៅហើយ ដែលជាហេតុធ្វើឲ្យពួកគេបារម្ភថា ឥទ្ធិពលចិននៅក្នុងតំបន់ ក៏ដូចជាពិភពលោក នឹងកាន់តែមានធំឡើងៗ តាមរយៈជំនួយវ៉ាក់សាំងកូវីដ-១៩នេះ។ ដូច្នេះ ចង់ ឬមិនចង់ គេត្រូវការត្រៀមយុទ្ធសាស្ត្រដើម្បីទប់ទល់នឹងចិនឲ្យខាងតែបាន។
ក្រុមប្រទេសសេដ្ឋកិច្ចគ្រាក់ៗទាំង៤ ដែលគេហៅឈ្មោះកាត់ថា Quad មានបំណងពង្រីកការចាក់វ៉ាក់សាំងនៅក្នុងពិភពលោកផង និងចង់ប្រឆាំងនឹងយុទ្ធសាស្ត្រនយោបាយការទូតរបស់ចិនផង ដែលគេមើលឃើញថា កំពុងយកវ៉ាក់សាំងកូវីដ-១៩នេះ ផ្ដល់ជូនប្រទេសនានា ដើម្បីពង្រីកឥទ្ធិពលរបស់ខ្លួនកាន់តែខ្លាំងក្លានៅក្នុងតំបន់ ពិសេសនៅអាស៊ីអាគ្នេយ៍តែម្ដង។
អត្ថបទទាក់ទង!
ក្នុងចំណោមប្រទេសដែលកំពុងផលិតវ៉ាក់សាំងកូវីដ-១៩ គេមើលឃើញថា ប្រទេសឥណ្ឌា គឺជាអ្នកផលិតវ៉ាក់សាំងនេះ ធំជាងគេបំផុតក្នុងពិភពលោក។
រដ្ឋមន្ត្រីការបរទេសរបស់ឥណ្ឌា បានបញ្ជាក់ប្រាប់អ្នកសារព័ត៌មានដែរថា កិច្ចសហប្រតិបត្តិការរវាងប្រទេសសម្ព័ន្ធមិត្ត Quad គឺមានសារសំខាន់ខ្លាំងណាស់ និងមានតម្លៃបំផុតផងដែរ។
តាមរយៈកិច្ចសហប្រតិបត្តិការនេះ ប្រទេសឥណ្ឌា នឹងប្រើប្រាស់សមត្ថភាពរោងចក្រផលិតរបស់ខ្លួន ដើម្បីផលិតវ៉ាក់សាំងរបស់អាមេរិក ដោយប្រើប្រាស់លុយរបស់អាមេរិក និងជប៉ុន។
ប្រទេសអូស្ត្រាលី នឹងផ្ដល់ហិរញ្ញប្បទានសម្រាប់ការបណ្ដុះបណ្ដាល និងផ្ដល់ជូននូវការគាំទ្រយ៉ាងពេញទំហឹង សម្រាប់ការចែកចាយវ៉ាក់សាំង ហើយវ៉ាក់សាំងដែលផលិតបាននោះ នឹងត្រូវចែកចាយភាគច្រើនទៅកាន់កោះប៉ាស៊ីហ្វិក, តំបន់អាស៊ីអាគ្នេយ៍ និងប្រទេសស្ថិតនៅក្នុងតំបន់មហាសមុទ្រឥណ្ឌាជាដើម។
ទោះយ៉ាងណា គំនិតផ្ដួចផ្ដើមនេះ ត្រូវបានគេបារម្ភថា អាចនឹងត្រូវបានរារាំងដោយការរឹតត្បិតការនាំចេញពីសំណាក់អាមេរិក លើវត្ថុធាតុដើមសំខាន់ៗសម្រាប់ខ្សែចង្វាក់ផ្គត់ផ្គត់វ៉ាក់សាំងសម្រាប់ឥណ្ឌា។ ប៉ុន្ដែ បញ្ហានេះ គឺជាបញ្ហាទ្វេភាគីរវាងឥណ្ឌា និងអាមេរិក ដែលគេរំពឹងថា នឹងអាចដោះស្រាយបានឆាប់ៗនេះ។
មន្ត្រីជាន់ខ្ពស់របស់ឥណ្ឌា បានអះអាងថា ការចូលរួមជាមួយសម្ព័ន្ធមិត្ត Quad នៅក្នុងការផលិតវ៉ាក់សាំងផ្គត់ផ្គង់ទៅកាន់ប្រទេសនៅទ្វីបអាស៊ីនេះ នឹងមិនធ្វើឲ្យប៉ះពាល់ដល់ការផ្គត់ផ្គង់វ៉ាក់សាំងសម្រាប់ប្រជាពលរដ្ឋខ្លួន ១,៤ ពាន់លាននាក់នោះទេ៕
None
