លោក អួន ស៊ីឡុត ប្រធានសមាគមស្វាយចន្ទីកម្ពុជា បានគូសបញ្ជាក់ថា សមាគមស្វាយចន្ទីកម្ពុជា បានដាក់គោលដៅកាត់បន្ថយការនាំចេញគ្រាប់ស្វាយចន្ទីឆៅទៅក្រៅប្រទេសឱ្យបាន៧០% នៅ១០ឆ្នាំខាងមុខនេះ ខណៈបច្ចុប្បន្នបច្ចុប្បន្នគ្រាប់ស្វាយចន្ទីឆៅកម្ពុជា ប្រមាណជាង៩០% ត្រូវបាននាំចេញទៅលក់នៅទីផ្សារក្រៅប្រទេស ជាពិសេសទីផ្សារប្រទេសវៀតណាមតែម្តង។ ជាក់ស្តែងនៅក្នុងរយៈពេលជាង៤ខែកន្លងមកនេះ កម្ពុជាបាននាំចេញគ្រាប់ស្វាយចន្ទីឆៅទៅប្រទេសវៀតណាម បានប្រមាណ ៥០ម៉ឺនតោន។
បើតាមលោក អួន ស៊ីឡុត ដើម្បីសម្រេចបានគោលដៅនេះ ជាយុទ្ធសាស្ត្ររបស់សមាគមនឹងខិតខំស្វែងរកទីផ្សារពាក់កណ្តាលសម្រេចនៅក្រៅប្រទេស ដោយសមាគមកំពុងបង្វឹកអ្នកជំនាញរបស់ខ្លួន ដើម្បីអាចស្វែងរកទីផ្សារក្រៅប្រទេសតាមរយៈអង្គការ Harvest II និងគម្រោង Profit របស់ ADB។ ម្យ៉ាងទៀត គឺការសហការនាំចេញក្នុងច្រកតែមួយ ដោយសមាគមស្វែងរកក្រុមហ៊ុនដែលអាចនាំចេញ និងប្រមូលផលិតផលពាក់កណ្តាលសម្រេចពីសិប្បករ ហើយក្រុមហ៊ុននាំចេញស្វែងរកទីផ្សារដោយខ្លួនឯង។
តែយ៉ាងណាដើម្បីអាចធ្វើកិច្ចការនេះបាន កម្ពុជាត្រូវការរោងចក្រកែច្នៃគ្រាប់ស្វាយចន្ទីធុនមធ្យមយ៉ាងហោចណាស់៣៥រោងចក្រ ដើម្បីប្រមូលទិញ កែច្នៃគ្រាប់ស្វាយចន្ទី ដែលកសិករផលិតបានប្រចាំឆ្នាំ ខណៈបច្ចុប្បន្នកម្ពុជា មានរោងចក្រធុនមធ្យមតែចំនួន៦ប៉ុណ្ណោះ។
អត្ថបទគួរអាន
បើតាមប្រធានសមាគមរូបនេះ ការគ្រប់គ្រងគ្រាប់ស្វាយចន្ទីឆៅ ក្រោយប្រមូលផលនៅមិនទាន់បានល្អនៅឡើយទេ ដោយសារមិនមានហេដ្ឋារចនាសម្ព័ន្ធគ្រប់គ្រាន់ ស្របពេលកសិករពិបាកទទួលបានកម្ចីក្នុងអត្រាការប្រាក់អនុគ្រោះ ហើយបញ្ហានេះជាហេតុនាំឱ្យការកែច្នៃគ្រាប់ស្វាយចន្ទីក្នុងស្រុកមានត្រឹមតែ ១០% ប៉ុណ្ណោះក្នុងមួយឆ្នាំ។
កត្តាដែលធ្វើឱ្យសហគ្រាសទាំងនោះពិបាកក្នុងការទទួលបានកម្ចីក្នុងអត្រាការប្រាក់អនុគ្រោះ គឺដោយសារពួកគមិនអាចបំពេញបានតាមការតម្រូវរបស់គ្រឹះស្ថានធនាគារ និងមីក្រូហិរញ្ញវត្ថុ ជាពិសេសពាក់ព័ន្ធនឹងរបាយការណ៍ហិរញ្ញវត្ថុ និងផែនការអាជីវកម្ម។ យ៉ាងណមិញលោក អួន ស៊ីឡុត ស្នើឱ្យធនាគារមានការបន្ធូរបន្ថយលក្ខខណ្ឌកម្ចី ដើម្បីផ្តល់ឱកាសឱសហគ្រាសអាចទទួលបានដើមទុនក្នុងការពង្រីកអាជីវកម្មរបស់ខ្លួន។
បើតាមលោក អួន ស៊ីឡុត ជាផែនការយុទ្ធសាស្ត្ររបស់សមាគមស្វាយចន្ទីកម្ពុជា សមាគមនឹងផ្ដល់ការហ្វឹកហ្វឺនដល់កសិករ ដើម្បីទទួលបានផលច្រើនលើដីដដែល និងកែប្រែកសិករទៅជាកសិពាណិជ្ជករ ក្នុងគោលបំណងបង្កើនតម្លៃបន្ថែមជូនពួកគេ, ស្រាវជ្រាវអភិវឌ្ឍន៍ពូជស្វាយចន្ទីដែលធន់នឹងបម្រែបម្រួលអាកាសធាតុ, បង្កើន និងពង្រឹងសហគមន៍កសិកម្ម ដែលមានស្រាប់ ដោយផ្សារភ្ជាប់ជាមួយវិស័យឯកជន, កសាងឃ្លាំងសហគមន៍ ដើម្បីអាចឱ្យកសិកររក្សាទុកគ្រាប់ស្វាយចន្ទីឆៅផ្គត់ផ្គង់ការកែច្នៃពេញមួយឆ្នាំ, ទាក់ទាញការសាងសង់រោងចក្រកែច្នៃ ដើម្បីផ្ដល់តម្លៃបន្ថែមដល់កសិករ, ប្រែក្លាយខេត្តកំពង់ធំ ជាតំបន់ឧស្សាហកម្មស្វាយចន្ទី ទាំងដាំដុះ និងកែច្នៃ, ជួយសហគ្រាសកែច្នៃនូវសុវត្ថិភាពចំណីអាហារនិងការគ្រប់គ្រងគុណភាព, អភិវឌ្ឍន៍សិល្បៈនៃការវេចខ្ចប់ចូលទីផ្សារ និងរកទីផ្សារថ្មី និងស្វែងរកឱកាសទទួលបានកម្ចីអត្រាការប្រាក់អនុគ្រោះ៕
None
