គម្រោងសមយុទ្ធយោធាម្តងទៀតនេះ ត្រូវបានប្រកាសឲ្យដឹងពីក្រសួងការពារជាតិបេឡារុស ដោយការសម្រេចចិត្តនេះ ត្រូវបានធ្វើឡើងដោយសារតែសកម្មភាពយោធានៅជិតព្រំដែននៃប្រទេសរុស្ស៊ី និងបេឡារុស្ស ក៏ដូចជាការផ្ទុះអាវុធចុងក្រោយនៅក្នុងតំបន់ Donbas ភាគខាងកើតអ៊ុយក្រែន។ ដែនដី Donbas គឺជាតំបន់ដែលក្រុមឧទ្ទាមចង់បំបែកទឹកដីភាគខាងកើតពីប្រទេសអ៊ុយក្រែន។ មែនទែនទៅ ការផ្ទុះអាវុធ រប៉េះរប៉ោះតែងតែមានជារឿយៗ បន្តិចបន្តួចប៉ុណ្ណោះនៅតាមខ្សែព្រំដែន រវាងអ៊ុយក្រែន និងតំបន់ផ្តាច់ខ្លួននេះ។ ប៉ុន្តែនៅ ២-៣ថ្ងៃចុងក្រោយនេះ ការផ្ទុះអាវុធ បាញ់ប្លោងដាក់គ្នា បានកើនឡើង ខ្លាំងជាងរាល់ដង។ ការផ្ទុះអាវុធនេះ គឺមានរាប់ទាំង ការបាញ់ប្លោងគ្រាប់កាំភ្លើងធំ ជាច្រើនរយគ្រាប់។
ប្រការនេះហើយធ្វើឲ្យលោកខាងលិច និងអ៊ុយក្រែនខ្លួនឯងបារម្ភថា វាអាចជាជំហានដំបូង ដែលនឹងបើកផ្លូវ ឲ្យរុស្ស៊ីមានហេតុផល ដើម្បីប្រើកម្លាំងវាយប្រហារអ៊ុយក្រែន ដោយអាចចោទប្រកាន់ថាអ៊ុយក្រែនជាអ្នករករឿងមុន។
យ៉ាងណាក៏ដោយ សមយុទ្ធជាថ្មីរវាងរុស្សី និងបេឡារុស នឹងឈានទៅបង្កើនកំដៅមួយកម្រិតទៀតដល់វិបត្តិនៅអ៊ុយក្រែន ស្របពេលដែលភាគីបេឡារុស មិនបានប្រាប់ពីរយៈដែលគេនឹងធ្វើសមយុទ្ធលើកទី២នេះទេ។ ប្រការនេះ នឹងអនុញ្ញាតឲ្យកងទ័ពរុស្សីមានវត្តមានកាន់តែយូរនៅក្នុងប្រទេសបេឡារុស ក្បែរព្រំដែនភាគខាងជើងអ៊ុយក្រែន។ អង្គការណាតូបានធ្វើការប៉ាន់ស្មានថា មកទល់នឹងពេលនេះ កងទ័ពរុស្សីយ៉ាងហោចណាស់ ៣ម៉ឺននាក់កំពុងមានវត្តមាននៅបេឡារុស។
អត្ថបទគួរអាន
គួរជម្រាបថា ផែនការសមយុទ្ធយោធានេះត្រូវបានប្រកាសឡើងដោយភាគីបេឡារុសមួយប៉ុណ្ណោះ ខណៈដែលរុស្សីមិនទាន់មានប្រតិកម្មយ៉ាងណាឡើយជុំវិញរឿងនេះ។
របាយការណ៍ថ្មីមួយពីរដ្ឋាភិបាលក្រុងវ៉ាស៊ីនតោនឲ្យដឹងថា រុស្ស៊ីបានបង្កើនកម្លាំងទ័ពដល់ ១៩ម៉ឺននាក់ នៅតំបន់ក្បែរព្រំដែនអ៊ុយក្រែន ទាំងនៅភាគខាងជើង ខាងកើត និងខាងត្បូង។ ការនេះបានជំរុញឱ្យអង្គការណាតូបញ្ជូនកម្លាំងបន្ថែមទៅកាន់តំបន់អឺរ៉ុបខាងកើតផងដែរ។
ស្របពេលដែល កម្ដៅនៃស្ថានការណ៍វិបត្តិអ៊ុយក្រែនមិនថមថយសោះនោះ លោកប្រធានាធិបតីអាមេរិកចូបៃឌិន បានយល់យល់ព្រមជាគោលការណ៍ ថានឹងជួបពិភាក្សាជាមួយនឹងលោក វ្ល៉ាឌីមៀ ពូទីន ប្រធានាធិបតីរុស្ស៊ី ប្រសិនបើរុស្ស៊ីមិនឈ្លានពាក្យអ៊ុយក្រែន ដែលវាត្រូវបានគេមើលឃើញថា គឺជាកិច្ចខិតខំប្រឹងប្រែងចុងក្រោយសម្រាប់ផ្នែកការទូតជុំវិញការបន្ថយសម្ពាធតានតឹងនៅអ៊ុយក្រែន និងអាចឈានទៅបញ្ជៀសការធ្វើសង្គ្រាមឈ្លានពានពីសំណាក់ក្រុមម៉ូស្គូទៅកាន់ប្រទេសនេះផងដែរ៕None
