អាជ្ញាធររុស្ស៊ី បានសម្រេចចូលរួមជាមួយចិន រឹតបន្តឹងការនាំចូលផលិតផល និងអាហារសមុទ្ររបស់ជប៉ុន ក្រោមហេតុផលបារម្ភពីបញ្ហាធាតុវិទ្យុសកម្ម បន្ទាប់ពីរដ្ឋាភិបាលជប៉ុន នៅតែមានះបង្ហូរទឹកកាកសំណល់វិទ្យុសកម្ម ដែលចម្រោះរួចពីរោងចក្រថាមពលអគ្គិសនី ដើរដោយថាមពលនុយក្លេអ៊ែហ្វូគូស៊ីម៉ាចូលទៅក្នុងសមុទ្រប៉ាស៊ីហ្វិក។
មុនឈានដល់ចាត់វិធានការបែបនេះ រដ្ឋាបាលទីក្រុងមូស្គូ បានចេញប្រតិកម្ម និងព្រមានរដ្ឋាភិបាលជប៉ុនម្តងរួចហើយ បន្ទាប់ពីជប៉ុនគ្រោងបង្ហូរទឹកកាកសំណល់នេះចូលទៅក្នុងសមុទ្រជាលើកទីពីរ។ នេះបើតាមការចុះផ្សាយរបស់ទូរទស្សន៍ NHK។
បើតាមអាជ្ញាធរដែលគ្រប់គ្រងការធ្វើចត្តាឡីស័ក និងភូតគាមអនាម័យរបស់រុស្ស៊ី ការរឹតបន្តឹងការនាំចូលអាហារសមុទ្រពីជប៉ុននេះ នឹងចាប់ផ្តើមអនុវត្តពីសប្តាហ៍នេះតទៅរហូតដល់មានការសម្រេចជាថ្មីអំពីសុវត្ថិភាពនៃអាហារសមុទ្រជប៉ុន ត្រូវបានផ្តល់និងចេញលទ្ធផលវិភាគថ្មីដោយនិយ័តកររុស្ស៊ី។
តាមរយៈការសម្រេចខាងលើ អាជ្ញាធររុស្ស៊ី និងស្ថាប័នជំនាញពាក់ព័ន្ធនឹងចាត់វិធានការរឹតបន្តឹងលើការគ្រប់គ្រង និងចែកចាយផលិតផលសមុទ្រ និងផលិតផលកែច្នៃគ្រប់យ៉ាង ដែលមានប្រភពមកពីប្រទេសជប៉ុន។
នេះគឺជាការសម្រេចចិត្តចុងក្រោយរបស់រុស្ស៊ី បន្ទាប់ពីបានអះអាងកាលពីខែមុនថា រុស្ស៊ីកំពុងពិចារណាចូលរួមជាមួយប្រទេសចិន ទាក់ទងនឹងការរឹតបន្តឹងលើការផ្គត់ផ្គង់អាហារសមុទ្រពីប្រទេសជប៉ុន។
អត្ថបទគួរអាន
គួររំលឹកថា ប្រទេសចិន បានប្រកាសផ្អាកការនាំចូលអាហារសមុទ្រពីប្រទេសជប៉ុន កាលពីចុងខែសីហា ដើម្បីជាការឆ្លើយតបទៅនឹងការបញ្ចេញទឹកកាកសំណល់ពីរោងចក្រនុយក្លេអ៊ែ ហ្វូគូស៊ីម៉ា ដៃអ៊ីជី ( Fukushima Daiichi) ដែលរងការខូចខាតដោយស៊ូណាមី ទោះបីជាជប៉ុន និង អង្គការសហប្រជាជាតិបានអះអាងថា ការបញ្ចេញទឹកកាកសំណល់ទាំងនេះ ត្រូវបានសម្អាតនិងចម្រោះយ៉ាងត្រឹមត្រូវតាមស្តង់ដាក៏ដោយចុះ។
ទីភ្នាក់ងារថាមពលអាតូមិកអន្តរជាតិ និយាយថា ប្រតិបត្តិការបញ្ចេញទឹកកាកសំណល់របស់ជប៉ុនទៅក្នុងសមុទ្រដែលបង្កការព្រួយបារម្ភដល់ចិន និងរុស្ស៊ី គឺស្របតាមស្តង់ដាសុវត្ថិភាពអន្តរជាតិ។
ពាក់ព័ន្ធនឹងបញ្ហានេះរដ្ឋាភិបាលជប៉ុន បាននិងកំពុងជំរុញក្រុងប៉េកាំង និងមូស្គូឱ្យដកការផ្អាកការនាំចូលដោយនិយាយថា វិធានការនេះមិនផ្អែកលើភស្តុតាងវិទ្យាសាស្ត្រទេ។ បើតាមទីភ្នាក់ងារសារព័ត៌មានក្យូដូ ក្រសួងកសិកម្ម រុក្ខាប្រមាញ់ និងនេសាទរបស់ជប៉ុន បាននិយាយថា បម្រាមរបស់រុស្ស៊ីគ្មានមូលដ្ឋានវិទ្យាសាស្ត្រ ហើយមិនយុត្តិធម៌ និងគួរឱ្យសោកស្ដាយ ហើយបានអំពាវនាវឱ្យលុបចោលវិញ។
នៅក្នុងសេចក្តីថ្លែងការណ៍មួយដែលបានចេញផ្សាយកាលពីថ្ងៃចន្ទ មុនពេលរុស្ស៊ីប្រកាសដាក់បម្រាម ក្រសួងការបរទេសជប៉ុន បាននិយាយថា ខ្លួនបានផ្តល់ព័ត៌មានបន្ថែមដល់ប្រទេសរុស្ស៊ី តាំងពីថ្ងៃទី១៥ ខែតុលា បន្ទាប់ពីកិច្ចសន្ទនាតាមអ៊ីនធឺណិតរវាងស្ថាប័នរដ្ឋពាក់ព័ន្ធកាលពីថ្ងៃទី ១០ ខែតុលា។ មុនពេលហាមឃាត់ ជប៉ុនអាចនាំចេញគ្រឿងសមុទ្រ ជាពិសេស គឺត្រីទៅចិន នៅក្នុងទឹកប្រាក់ប្រមាណជាង៥០០លានដុល្លារ ខណៈដែលទីផ្សារត្រីសមុទ្រជប៉ុននៅរុស្ស៊ី គឺមានទំហំតូចប៉ុណ្ណោះ៕
ដោយៈ សរ សុជាតិ
None
