យោងតាមអ្នកនាំពាក្យវិមានក្រឹមឡាំងលោក Dmitry Peskov បានឱ្យដឹងថា ភ្ញៀវបរទេសជាន់ខ្ពស់នៅក្នុងព្រឹត្តិការវេទិកាសេដ្ឋកិច្ចនៅទីក្រុង Vladivostok ប្រទេសរុស្ស៊ី គឺលោក Pany Yathotou អនុប្រធានាធិបតីឡាវ ហើយដែលលោក ពូទីន នឹងមានកិច្ចប្រជុំទ្វេភាគីដាច់ដោយឡែកផងដែរ។ ក្នុងនោះ លោក Zhang Guoqing ឧបនាយករដ្ឋមន្ត្រីចិន ក៏នឹងអញ្ជើញមានវត្តមាននៅក្នុងវេទិកានៅសប្តាហ៍ក្រោយនេះដែរ។
គួរជម្រាបថា វេទិកាសេដ្ឋកិច្ចប្រចាំឆ្នាំនេះ គឺសំដៅអភិវឌ្ឍកិច្ចសហប្រតិបត្តិការសេដ្ឋកិច្ចនៅក្នុងតំបន់ និងជំរុញការវិនិយោគបរទេស។ អ្នកចូលរួមកន្លងមករួមមាននាយករដ្ឋមន្ត្រីជប៉ុន និងប្រធានាធិបតីចិន ប៉ុន្តែ ដោយសារទណ្ឌកម្មរបស់លោកខាងលិចលើទីក្រុងម៉ូស្គូ នាពេលកន្លងមក បានកាត់បន្ថយភ្ញៀវចូលរួមបរទេសនៅក្នុងព្រឹត្តិការណ៍បែបនេះ។ កាលពីឆ្នាំមុន ខណៈពេលដែលរុស្ស៊ីកំពុងធ្វើសង្គ្រាមនៅអ៊ុយក្រែន វិមានក្រឹមឡាំងបានអញ្ជើញនាយករដ្ឋមន្ត្រីប្រទេសអាមេនី ម៉ុងហ្គោលី និងមីយ៉ាន់ម៉ា ដែលស្ថិតក្នុងចំណោមភ្ញៀវសំខាន់ ស្របពេលដែលនាយករដ្ឋមន្ត្រីឥណ្ឌាលោក Narendra Modi បានចូលរួមតាមប្រព័ន្ធអនឡាញតែប៉ុណ្ណោះ។
អត្ថបទគួរអាន
ជាមួយគ្នានេះ នៅថ្ងៃបិទបញ្ចប់នៃកិច្ចប្រជុំកំពូលពាណិជ្ជកម្ម និងវិនិយោគអាស៊ាន (ABIS-2023) នៅទីក្រុងហ្សាកាតា ប្រទេសឥណ្ឌូនេស៊ីកាលពីថ្ងៃទី៧ខែកញ្ញាកន្លងទៅ ភាគីរុស្ស៊ីលោក Ivan Polyakov ប្រធានក្រុមប្រឹក្សាធុរកិច្ចអាស៊ាន-រុស្ស៊ី បាននិយាយថា កិច្ចប្រជុំកំពូលអាស៊ាន-រុស្ស៊ីនៅឆ្នាំក្រោយ គួរតែប្រព្រឹត្តធ្វើឡើងនៅប្រទេសឡាវ។ យោងតាមលោក Polyakov ប្រទេសរុស្ស៊ីត្រូវធ្វើការជាមួយសមាជិកប្លុកអាស៊ានក្នុងវិស័យជាច្រើន ដើម្បីជួយជំរុញការអភិវឌ្ឍប្រកបដោយភាពស្វាហាប់ក្នុងតំបន់ និងពង្រីកលទ្ធភាព ក៏ដូចជាបើកផ្លូវឱ្យអាជីវកម្មអាស៊ាន ទៅកាន់ទីផ្សាររុស្ស៊ី និងតំបន់អឺរ៉ាស៊ី (អឺរ៉ុប-អាស៊ី)។
លោកក៏បានកត់សម្គាល់ថា ប្រទេសឡាវមានកំណត់ត្រាល្អក្នុងការសម្របសម្រួលភាពជាដៃគូសន្ទនារវាងប្រទេសរុស្ស៊ី និងប្រទេសអាស៊ានទាំង១០។
នៅក្នុងពិធីបិទបញ្ចប់កិច្ចប្រជុំកំពូលអាស៊ាននៅឥណ្ឌូនេស៊ីកាលពីថ្ងៃទី៧ កញ្ញា នាយករដ្ឋមន្ត្រីឡាវ លោក Sonexay Siphandone បានទទួលការប្រគល់តំណែងជាប្រធានអាស៊ានប្ដូរវេនជាផ្លូវការ ពីប្រធានាធិបតីឥណ្ឌូនេស៊ីលោក Joko Widodo។ ក្នុងនាមជាប្រធាននៅឆ្នាំក្រោយ ឡាវបានប្តេជ្ញាកសាងអាស៊ានឱ្យទំនាក់ទំនងឱ្យកាន់តែផ្សាភ្ជាប់គ្នា និងរឹងមាំជាងមុន។ បន្ថែមពីនេះ នាយករដ្ឋមន្ត្រីឡាវលោក Siphandone ក៏បានលើកឡើងដែរថា ឡាវនឹងខិតខំពង្រីកទំនាក់ទំនងខាងក្រៅរបស់អាស៊ាន ពង្រឹងភាពជាកណ្តាល និងឯកភាពរបស់អាស៊ាន ព្រមអភិវឌ្ឍស្ថាបត្យកម្មក្នុងតំបន់សម្រាប់ស្ថិរភាព សន្តិភាព និងការអភិវឌ្ឍក្នុងតំបន់អាស៊ានអំឡុងពេលធ្វើជាប្រធាននៅឆ្នាំក្រោយ។
