ដោយឡែក សម្រាប់ឆ្នាំ២០២២វិញ កន្លងមករាជរដ្ឋាភិបាលកម្ពុជាបានដាក់ការព្យាករណ៍ថា សេដ្ឋកិច្ចកម្ពុជានឹងមានកំណើន៤,២% ប៉ុន្ដែបើតាមការអះអាងរបស់ សម្តេចតេជោ នៅឆ្នាំក្រោយនេះសេដ្ឋកិច្ចកម្ពុជាអាចនឹងមានកំណើខ្ពស់ជាងអ្វីដែលបានរំពឹងទុកនេះទៅទៀត។
ការមានសុទិដ្ឋិនិយមខ្ពស់បែបនេះ គឺបន្ទាប់ពីសម្តេចមើលឃើញពីកំណើននៃការនាំចេញ ពិសេសផលិតផលកសិកម្មក្នុងឆ្នាំ២០២១ គួបផ្សំនឹងកិច្ចព្រមព្រៀងពាណិជ្ជកម្មសេរី និងកិច្ចព្រមព្រៀងពាណិជ្ជកម្មតំបន់មួយចំនួននឹងត្រូវចូលជាធរមាននៅឆ្នាំក្រោយនេះ ដែលវានឹងជាផ្នែកមួយដ៏សំខាន់ក្នុងការជំរុញការនាំចេញ និងការវិនិយោគនៅកម្ពុជា។
នៅក្នុងពិធីសម្ពោធដាក់ឲ្យប្រើប្រាស់ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ និងបើកការដ្ឋានសាងសង់ផ្លូវជាតិលេខ៧១C នៅព្រឹកថ្ងៃទី២៣ វិច្ឆិកា ឆ្នាំ២០២១ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានបង្កើនការព្យាករណ៍កំណើនសេដ្ឋកិច្ចកម្ពុជាពី ២,៤% មករង្វង់៣%នៅឆ្នាំ២០២១។ កំណើនសេដ្ឋកិច្ចនេះ អាចសម្រេចទៅបាន គឺវាអាស្រ័យលើសេដ្ឋកិច្ចកម្ពុជាមានដំណើរការល្អក្នុងរយៈពេលពីរខែ បន្ទាប់ពីរាជរដ្ឋាភិបាលប្រកាសបើកប្រទេសឡើងវិញលើគ្រប់វិស័យកាលពីថ្ងៃទី១ ខែវិច្ឆិកា ឆ្នាំ២០២១។
ជាមួយគ្នានេះ រាជរដ្ឋាភិបាលកម្ពុជាបានដាក់ការព្យាករណ៍ថា សេដ្ឋកិច្ចកម្ពុជានឹងមានកំណើន៤,២%នៅឆ្នាំ២០២២ ក៏ប៉ុន្ដែ បើតាមសម្តេចតេជោ ហ៊ុន សែន សង្ឃឹមថា កំណើនសេដ្ឋកិច្ចកម្ពុជានឹងហក់ឡើងលើស៥% ពោលគឺលើពីអ្វីដែលបានរំពឹងទុកទៅទៀត។ ការមានសុទិដ្ឋិនិយមខ្ពស់បែបនេះ គឺបន្ទាប់ពីសម្តេចមើលឃើញពីកំណើននៃការនាំចេញផលិតផលកសិកម្មក្នុងឆ្នាំ២០២១ នៅតែមានស្ថិរភាពល្អ ទោះបីកម្ពុជា ក៏ដូចជាពិភពលោកជួបវិបត្តិនៃជំងឺកូវីដ-១៩។
មួយវិញទៀត សម្តេចតេជោ ជឿជាក់ថា ការនាំចេញផលិតផលកសិកម្មទៅទីផ្សារអន្តរជាតិ ជាពិសេសប្រទេសចិន នឹងមានកំណើនកាន់តែខ្ពស់នៅឆ្នាំ២០២២ ក្រោយកិច្ចព្រមព្រៀងពាណិជ្ជកម្មសេរិកម្ពុជាចិន និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយថ្នាក់តំបន់(RCEP)ចូលជាធរមាននៅដើមឆ្នាំ២០២២។
អត្ថបទគួរអាន
ជាមួយគ្នានេះឯកឧត្តម ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មកម្ពុជាជឿជាក់ដែរថា ការនាំចេញផលិតផលពីកម្ពុជាទៅចិន ដែលកំពុងមានកំណើន នឹងបន្តកើនឡើងបន្ថែមទៀតក្រោយកិច្ចព្រមព្រៀងពាណិជ្ជកម្មសេរីកម្ពុជាចិនចូលជាធរមាននៅដើមឆ្នាំក្រោយ ដែលវានឹងជួយជំរុញទំហំពាណិជ្ជកម្មរវាងប្រទេសទាំងពីរឲ្យកាន់តែធំថែមទៀត។ រាជរដ្ឋាភិបាលកម្ពុជា និងចិនបានប្តេជ្ញារួមគ្នាថា ភាគីទាំងពីរនឹងជំរុញទំហំពាណិជ្ជកម្មរវាងប្រទេសទាំងពីរឲ្យឈានដល់១០ពាន់លានដុល្លារក្នុង១ឆ្នាំៗនាពេលអនាគត។
ជុំវិញកំណើនសេដ្ឋកិច្ចកម្ពុជានេះដែរ ស្ថាប័នអន្តរជាតិ Fitch Solutions បានបញ្ចេញនូវរបាយការណ៍ថ្មីចុងក្រោយមួយ ដោយក្នុងនោះ ក៏បានព្យាករពីកំណើនសេដ្ឋកិច្ចកម្ពុជាដែរថា នឹងមានកំណើន២,៥% នៅឆ្នាំ២០២១នេះ បន្ទាប់ពីមានការធ្លាក់ចុះ៣,១% កាលពីឆ្នាំ២០២០ ហើយនឹងបន្តកើនឡើង៤,៥% នៅឆ្នាំ២០២២។
បើតាមរបាយការណ៍របស់ Fitch Solutions វិស័យសេវាកម្ម និងទេសចរណ៍នឹងមានកំណើនយឺតនៅឆ្នាំ២០២២ ខណៈវិស័យកម្មន្តសាល និងកសិកម្មនៅតែអាចរក្សាបាននូវភាពធន់។ ការវាយតម្លៃបែបនេះ ធ្វើឡើងក្រោយ Fitch Solutions មើលឃើញថា កម្ពុជាបានជួបបញ្ហាវិបត្តិកូវីដ-១៩ធ្ងន់ធ្ងរខ្លាំងនៅឆ្នាំ២០២១ នេះ។
ទោះយ៉ាងណា ស្ថាប័ននេះ កត់សម្គាល់ឃើញថា ការឆ្លងរីករាលដាលកូវីដ១៩ មានការធ្លាក់ចុះជាបន្ដបន្ទាប់ ក្រោយពេលដែលកម្ពុជាសម្រេចបានការចាក់វ៉ាក់សាំងបានកាន់តែច្រើនរហូតដល់ជិត៨៨% នៃប្រជាជនសរុប១៦លាននាក់៕
None
