បើតាមការវាយតម្លៃពី ADB អត្ថប្រយោជន៍ដែលសមាជិកនៃកិច្ចព្រមព្រៀង RCEP នឹងទទួលបាន គឺមានច្រើនជាង អ្វីដែលគេទទួលបានពីកិច្ចព្រមព្រៀងវឌ្ឍនភាព និងគ្រប់ជ្រុងជ្រោយ សម្រាប់ភាពជាដៃគូអន្តរប៉ាស៊ីហ្វិក ឬហៅកាត់ថា CP TPP ដល់ទៅពីរដងឯណោះ។
ADB ទទួលស្គាល់ថា គ្រប់សមាជិកទាំងអស់នឹងទទួលបានផលចំណេញរៀងៗខ្លួន យ៉ាងណាមិញ ផលប្រយោជន៍ដែលទទួលបាន មិនភាពស្មើគ្នានោះទេ។ ក្នុងន័យនេះ ADB ចង់សំដៅដល់ប្រទេសដែលមានទំហំពាណិជ្ជកម្ម និងសេដ្ឋកិច្ចធំជាង នឹងទទួលបានអត្ថប្រយោជន៍ច្រើនជាង។
ជាក់ស្តែង ប្រទេសនៅអាស៊ីអាគ្នេយ៍ ដូចជាវៀតណាម និងម៉ាឡេស៊ី ក៏ដូចជាយក្សសេដ្ឋកិច្ចរបស់អាស៊ី រួមមានចិន កូរ៉េខាងត្បូង និងជប៉ុនជាដើម នឹងទទួលបានផ្លែផ្កាច្រើនពីកិច្ចព្រមព្រៀងមួយនេះ។ បន្ថែមពីលើនេះ ប្រទេសដែលរួមចំណែកដល់ការផលិត និងខ្សែសង្វាក់ផ្គត់ផ្គង់សម្រាប់ប្រទេសធំៗ ក៏នឹងទទួលបានផលចំណេញបង្គួរដែរ ក្នុងនោះរួមមាន កម្ពុជា ឡាវ និងថៃជាដើម។
អត្ថបទគួរអាន
ADB ក៏បានប៉ាន់ប្រមាណពីការកើនឡើងយ៉ាងខ្លាំង ជាពិសេសនៅក្នុងទំនាក់ទំនង ពាណិជ្ជកម្ម និងវិស័យផលិតកម្ម។ ជាក់ស្តែង ការកើនឡើងនៃពាណិជ្ជកម្មក្នុងតំបន់នឹងមានប្រហែល ២ទៅ៣ដង ធំជាងការកើនឡើងនៃប្រាក់ចំណូលទៅទៀត។
គួរជម្រាបថា កិច្ចព្រមព្រៀង RCEP ជាកិច្ចព្រមព្រៀងពាណិជ្ជកម្មសេរីធំបំផុតលំដាប់ទី២ក្នុងតំបន់ បន្ទាប់ពីកិច្ចព្រមព្រៀង CPTPP ដែលមានសមាជិករហូតដល់១៥ប្រទេស គ្រប់ដណ្តប់លើប្រជាជនប្រមាណ ២ពាន់៣រយលាននាក់ និងគិតជាទំហំ GDP មានប្រមាណ ២៦ទ្រីលានដុល្លារអាមេរិក។
បច្ចុប្បន្នកិច្ចព្រមព្រៀងដដែលនេះ ត្រូវបានប្រទេសជាសមាជិកភាគច្រើនផ្តល់សច្ចាប័នរួចរាល់ហើយ នៅឡើយតែរង់ចាំការចូលជាធរមានប៉ុណ្ណោះ។ កាលពីពេលថ្មីៗនេះភាគីប្រទេសអូស្ត្រាលី និងដែលជាសមាជិកមួយរបស់ RCEP ផងដែរនោះ បានប្រកាសថា កិច្ចព្រមព្រៀង RCEP នឹងចូលជាធរមាននៅថ្ងៃទី០១ខែមករា ឆ្នាំ២០២២ ខាងមុខនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
